Na Cava Eda Vunau Tiko ga Kina?

1. Na taro cava e dau vure cake mai me baleta na cakacaka vakavunau?

¹ E dau tarai vakawasoma na yalava ena levu na vanua. Dau talevi vaka vica na vale era kaya nira sega ni taleitaka na itukutuku eda kauta tiko yani. Ia, na cava eda vunau tiko ga kina vei ira na sega ni tataleitaki vaka oqo?

2. Na cava eda qacoya tiko kina na cakacaka vakavunau?

² Noda Lomani Jiova kei Ira na Tamata: Na vuna levu eda qacoya tiko kina na cakacaka vakavunau baleta nida lomani Jiova. E uqeti keda na lomada meda tukuni koya na noda Kalou cecere. (Luke 6:​45) E uqeti keda tale ga noda lomani Jiova meda talairawarawa vua da qai vukei ira e so tale mera cakava vaka kina. (Vkai. 27:11; 1 Joni 5:⁠3) Na noda yalodina tiko ni cakava na cakacaka oqo e sega ni vakatau ena nodra vakarorogo se sega na tamata. O ira mada ga na lotu Vakarisito ena imatai ni senitiuri era ‘sega ni mudu’ ni vunau dina ga nira vakacacani. (Caka. 5:​42) Me kua ni vakayalolailaitaki keda nodra sega ni via vakarorogo e so, ia meda yalodina tiko ga, ni oqo e vakaraitaka na titobu ni noda lomani Jiova kei na noda yalodina ni qaravi koya.

3. E uqeti keda vakacava noda lomani ira na wekada meda vunau tiko ga kina?

³ Dua tale na vuna eda qacoya kina na cakacaka vakavunau baleta nida lomani ira na wekada. (Luke 10:27) E sega ni vinakata o Jiova me rusa e dua. (2 Pita 3:⁠9) Na vanua e dau tarai vakawasoma e se kunei tiko ga kina e so era via mai qaravi Jiova. Kena ivakaraitaki ena vanua o Guadeloupe, e rauta ni 1 mai na 56 na lewenivanua era iVakadinadina i Jiova, ra qai papitaiso ena yabaki sa oti era lewe 214. Rauta ni lewe 20,000 era tiko ena iVakananumi, na kena ivakatautauvata ni rauta ni 1 mai na 22 na lewenivanua e Guadeloupe!

4. Na veisau cava e dau yaco ena yalava?

⁴ Veisau e Dau Yaco ena Yalava: E dau veiveisau tu ga o ira na tiko ena yalava. Kena ivakaraitaki, e sega beka ni taleitaki keda e dua na lewenivuvale, ia nida lako tale yani ena dua na gauna, ena rairai tataleitaki e dua tale na lewenivuvale oqori e se sega ni rogoci keda vakadua. Rawa tale ga ni toki mai ena noda yalava e dua e tataleitaki. Sa qai tiko o ira na gone e dau tusaqati ira na nodra itubutubu. Nira sa tubu cake na gone vaka oqo, era na rairai marautaka na vakarorogo ena gauna era sa toki kina ena dua na yalava.

5. Na cava e rawa ni veisautaka na nodra rai na tamata mera vakarorogo?

⁵ E dau veisau tale ga na tamata. Kena ivakaraitaki na yapositolo o Paula, e ‘dauvosavakacaca, dauvakacaca, qai dauveivakasewasewani’ e liu. (1 Tim. 1:​13) E vaka tale ga oqori e levu na dauveiqaravi i Jiova nikua, era sega tu ni taleitaka na ka dina e liu. So era dau saqata sara ga na itukutuku vinaka eda kacivaka. Ia ni dau veisau na veika e yaco e vuravura, e rawa ni uqeti ira sara ga mera rogoci keda. E so tale era dau rogoci keda nira sotava na leqa me vaka na takali ni dua na lewenivuvale, na kena sega na cakacaka, leqa vakailavo, se tauvimate.

6. Na cava meda gumatua kina ni vunau?

⁶ Sa malumu sobu tiko na ituvaki kei vuravura nikua, ia ena yasana kadua sa qai vakatotolotaki tiko ga na cakacaka vakavunau kei na veivakatisaipelitaki. (Aisea 60:22) Meda gumatua tiko ga ni vunau, da qai saga me tiko vei keda na rai dodonu. Eda sega ni kila de o koya eda sotava tarava ena rairai vakarorogo. Oya na vuna e bibi kina meda vunau tiko ga! ‘Nida kitaka oqo eda na vakabulai keda kei ira tale ga era rogoci keda.’​​—⁠1 Tim. 4:​16.