Ena Vakaukauataki Keda Tiko ga Vakayalo na Cakacaka Vakavunau
1. E yaga vakacava vei keda na cakacaka vakavunau?
1 Nida gumatua ena cakacaka vakavunau, eda na vakaukauataki vakayalo, eda na marau vakalevu tale ga. Na inaki levu ni noda vunau meda vakamarautaki Jiova. Ia nida talairawarawa ina ivakaro meda “vunautaka na Vosa,” ena vakalougatataki keda o Jiova, ena yaga tale ga ena basoga tale eso ni noda bula. (2 Tim. 4:2; Aisea 48:17, 18) Ena rawa vakacava ni vakaukauataki keda, vakamarautaki keda tale ga na cakacaka vakavunau?
2. E vakaukauataki keda vakacava na cakacaka vakaitalatala?
2 Vakaukauataki, Vakalougatataki: E uqeti keda na vunau meda vakasamataka ga na veivakalougatataki ni Matanitu ni Kalou, sega ni leqa e yaco tu nikua. (2 Kor. 4:18) Ena vaqaqacotaki noda vakabauta na yalayala i Jiova, da taleitaka vakalevu cake tale ga na ka dina nida vakamacalataka na ivakavuvuli vakaivolatabu. (Aisea 65:13, 14) Nida veivuke ena nodra vakaukauataki vakayalo eso tale mera ‘kua ni vakavuravura,’ eda na vakaukauataki tale ga meda dei ena noda sega ni vakavuravura.—Joni 17:14, 16; Roma 12:2.
3. E yaga vakacava na cakacaka vakaitalatala ena noda bucina na itovo vaKarisito?
3 Na cakacaka vakaitalatala e yaga ena noda bucina na itovo vaKarisito. Eda na qai yalomalumalumu sara vakalevu nida saga meda ‘ka kece ga vei ira na tamata kece ga.’ (1 Kor. 9:19-23) Eda na yalololoma, da veikauaitaki tale ga nida veitalanoa kei ira era ‘biu wale tu me vaka na sipi e sega na kedra ivakatawa.’ (Maciu 9:36) Eda na vosota ke da sega ni soro koso nida tawa kauaitaki se tusaqati. Sa qai levu sara noda marau nida soli keda ena nodra vukei eso tale.—Caka. 20:35.
4. Na cava na nomu rai me baleta na cakacaka vakaitalatala?
4 E ka dokai dina noda cakacaka vakaitalatala nida vakacaucautaki koya kina e dodonu duadua ga meda sokaloutaka! E vakaukauataki keda, eda na vakalougatataki tale ga nida ogaoga ena kena ‘vunautaki vakavinaka sara na itukutuku vinaka.’—Caka. 20:24, NW.