Vakavulici Ira Era Sega ni Kila Vinaka na Wilivola
1. Na cava e dua na ka dredre e rawa ni sotavi ena cakacaka vakaitalatala?
1 Nida sotava ena noda cakacaka vakaitalatala e dua e sega ni kila vinaka na wilivola, ena dredre toka me vakavulici ena ka dina. Na cava e rawa nida cakava?
2. Na sala cava eda na dokai ira kina era sega ni kila vinaka na wilivola, cava na vuna?
2 Veidokai: E bibi vei Jiova na ivakarau ni lomana e dua, sega ni ivakatagedegede ni nona vuli. (1 Sam. 16:7; Vkai. 21:2) Meda kua gona ni beci ira era sega ni kila vinaka na wilivola. Nida veidokai, da qai vosota, de dua era na taleitaka meda vukei ira. (1 Pita 3:15) Ena rairai okati tale ga e ke noda sega ni surevaka vei ira mera wilika e dua na tikinivolatabu se parakaravu. Ni toso vinaka nodra vulica na ka dina ena iVolatabu, de dua era na uqeti mera toroya cake na ivakatagedegede ni nodra wilivola, mera marautaka kina na wilika na Vosa ni Kalou “e na siga kei na bogi.”—Same 1:2, 3.
3. Na iwalewale cava ni vuli eda rawa ni vakayagataka vei ira era sega ni kila vinaka na wilivola?
3 iWalewali ni Vuli iVolatabu: E dua na iwalewale uasivi ni veivakavulici na vakayagataki ni iyaloyalo, ena nanuma vinaka kina o gonevuli na ka e vulica. O rawa ni taroga vua na nona nanuma me baleta e dua na iyaloyalo ena ivola drau vulica tiko. Me matata nomu taro, me rawa ni kila kina na ka e tukuni tiko ena iyaloyalo. Mo vakayagataka eso na tikinivolatabu e vakabibitaka eso na tikina mai na iyaloyalo. Ena rawa tale ga ni vakayagataki na iyaloyalo ena railesuvi. Me kua ni sivia na ka drau vulica ena dua na gauna ni vuli. Mo vakabibitaka ga na usutu kei na tikina e vulici, mo kua ni veivosakitaka na tikina e sega ni lako vata kei na ulutaga. Na tikinivolatabu me wiliki sara ga mai na iVolatabu, mo taroga na taro mo vakadeitaka kina ni sa kila o gonevuli na ka e wiliki. Qo ena rairai uqeti koya me toroya cake sara na ivakatagedegede ni nona wilivola me rawa ni vakekeli vakataki koya ena iVolatabu.
4. Ena rawa vakacava nida vukei ira na noda vuli iVolatabu mera toroya cake na ivakatagedegede ni nodra wilivola?
4 iVukevuke Yaga: O ira na sega ni kila vinaka na wilivola se sega ni taladrodro nodra wiliwili, rairai era dau kila, era nanuma vinaka tale ga na veika e tukuni. E rawa gona nida uqeti ira mera dau rogoca na noda ivola katoni. Nira vakarogoci koya vinaka e wiliwili tiko, ra vakamuria toka ena nodra ivola ra qai cavuta toka e ra na vosa era rogoca, e yaga vakalevu qo me toroya cake tiko ga na ivakatagedegede ni nodra wilivola. Ena so na vanua, era na rairai tuvanaka tale ga na qase na vuli wilivola ena ivavakoso. E yaga na vakatutu qo ena noda vukei ira na sega ni kila vinaka na wilivola mera kila ‘na iVolatabu,’ ena vakavukui ira me rawa kina nira vakabulai.—2 Tim. 3:15.