Nodra Vukei na Sega ni Kila Vinaka na Wilivola

1. Na cava e sega ni ka rawarawa kina meda vakavulica na iVolatabu vei ira na sega ni kila vinaka na wilivola?

¹ Ena rairai taleitaka na veika vakayalo na itaukeinivale e sega ni kila vinaka na wilivola, ia ena rawa ni dredre vua me wilika na iVolatabu kei na so tale na ivola. De dua ena dredre tale ga vua me wilika na ivola Kaya na iVolatabu. Ia eda na vukei ira vakacava? Era tarogi e vica na dautukutuku matua ena sivia na 20 na matanitu ena ka era dau cakava. Eda na dikeva qo na iwalewale era dau vakayagataka.

2. Na ivola cava ena yaga vakalevu vei ira na sega ni kila vinaka na wilivola?

² Ke sega ni kila vinaka se sega sara ga ni kila o gonevuli na wilivola, o rawa ni vakayagataka na brochure Vakarorogo Vua na Kalou se Vakarorogo Vua na Kalou mo Bula Tawamudu. Dua na painia mai Merika e dau vakaraitaka ruarua na brochure qai taroga se o cei vei rau e taleitaka vakalevu me vulica. E vola na valenivolavola ni tabana mai Kenya ni yaga vakalevu na ivola qori ena vanua vakaAferika, ni nodra ivakarau ni veivakavulici na lewenivanua e kea me vakayagataki na italanoa, sega ni veitarotarogi. De dua o ira na vuli vinaka era na taleitaka na vuli e caka kina na veitarotarogi, ia ena sega so ni mana qori vei ira na sega ni vuli vinaka. Ke kila toka vakalailai na wiliwili o gonevuli, levu na dautukutuku era dau tekivuna na vuli ni vakayagataki na brochure iTukutuku Vinaka Mai Vua na Kalou! se E Rawa Mo iTokani ni Kalou!, se na ivola iTalanoa Mai na iVolatabu.

3. Na cava meda kila tiko me laulau kina na nodra vakavulici na sega ni kila na wilivola?

³ Veivakacaucautaki: Era na rairai madua o ira na sega ni kila na wilivola, e levu tale ga era dau beci ira. Meda vukei ira mera kua ni lomaleqa, qori sara ga na imatai ni kalawa meda vakavulici ira kina ena ka dina. E levu vei ira na sega ni kila na wilivola era dau lomakasa qai rawarawa nira vuli. Mo dau veidokai, kua ni beci ira. (1 Pita 3:15) Era na via tomana tiko ga nodra vuli ke ra kila ni yaga tiko nodra sasaga, ra qai toso tale tiko ga vakayalo. Mo vakacaucautaki ira gona mai vu ni lomamu.

4. Eda na uqeti ira vakacava na sega ni kila vinaka na wilivola mera vakavakarau ena vuli?

⁴ Ke sega ni kila vinaka na wilivola o gonevuli, uqeti koya me dau vakavakarau vinaka ena nona vuli. Eso na dautukutuku e Sauca Aferika era dau uqeti nodra gonevuli mera kerea e dua na lewe ni nodra vuvale se itokani e vinaka nodra wilivola me vukei ira. Me rawa ni vukea nona gonevuli me vakavakarau, dua na dautukutuku e Peritania e dau solia nona ivola vei gonevuli ni rau vulica e vica na parakaravu me liaca kina na rawarawa ni nona raica na isau ni taro nira sa makataki rawa tu. Dua na tacida tagane mai Idia e dau kerei ira nona gonevuli mera raica rawa tiko na iyaloyalo ena lesoni ena vulici ena macawa tarava, mera vakasamataka tale ga.

5. Eda na vakaraitaka vakacava na vosovoso nida caka vuli iVolatabu?

⁵ Mo Vosovoso: Se mani ivola cava o vakayagataka, vakasamataka ga na veitikina bibi e tiko kina, vukei ira sara nomu gonevuli mera kila vinaka. Ni se qai tekivu, de vinaka me 10 se 15 ga na miniti na nomudrau vuli. Me kua ni levu na ka drau vulica, de dua me vica toka ga na parakaravu ena dua na gauna ni vuli. Mo vosovoso ke berabera nona wilivola o gonevuli. Na levu ga ni nona taleitaka nona vulici Jiova, ena uqeti koya qori me vakavinakataka nona wiliwili. Me rawa ni cakava qori o gonevuli, ena vinaka mo sureti koya me tiko ena soqoni ni se qai tekivu ga nomudrau vuli.

6. Eda na vukei ira vakacava eso mera kila na wilivola?

⁶ Ke ra vulica na wilivola na gonevuli, ena totolo nodra toso vakayalo. (Same 1:1-3) Levu era vakayagataka tale e vica na miniti ni oti na vuli mera vukei nodra gonevuli ni vakayagataki na ivola Apply Yourself to Reading and Writing. Ke yalolailai o gonevuli, o rawa ni vukei koya me nuidei ena nomu tukuna eso na ka sa vulica kei na ka sa cakava rawa. Vakadeitaka vua ni na vakalougatataka o Jiova na nona sasaga qai uqeti koya me masuta na nona veivuke. (Vkai. 16:3; 1 Joni 5:14, 15) Eso na dautukutuku e Peritania era dau uqeti ira nodra gonevuli mera tekia eso nodra isausau lalai—de dua mera kila vinaka na matanivola, mera cega ra qai wilika na tikinivolatabu, mera wilika tale ga na ivola vakaivolatabu sa vakarawarawataki. Na noda vukei ira eso tale mera kila na wilivola, e okati kina na noda uqeti ira sara ga mera taleitaka, sega ni noda vakavulici ira ga ena wiliwili.

7. Na cava meda kua kina ni tusuka ni vakatavulica na ka dina vei ira na sega ni kila vinaka na wilivola?

⁷ O Jiova e sega ni beci ira na sega ni vuli vinaka. (Jope 34:19) E dikeva ga o koya na lomadra na tamata. (1 Vei. 28:9) Kua gona ni tusuka ni vakatavulica na ka dina vei ira era sega ni kila vinaka na wilivola. E levu dina na ivola o rawa ni vakayagataka me tekivutaki kina qori. Ni toso na gauna, e rawa ni dewa na vuli ena Kaya na iVolatabu qai rawa ni rabailevu kina nona kila na tikinivolatabu.