Kua ni Tu Vakasuka
1. Na ituvaki cava ena vinakati kina na doudou, na vuna?
1 O sega beka ni vunau e koronivuli ni o rerevaka na veivakalialiai? Ena vinakati mo doudou na vosa, vakabibi ke o dau mamadua. Na cava o rawa ni cakava?
2. O rawa ni lewa vinaka vakacava ni o vunau e koronivuli?
2 Lewa Vinaka: E rawa ni nomu yalava ni vunau na koronivuli, nanuma tiko ga ni sega ni tukuni mo veivosakitaka na veika vakayalo kei ira kece o sotava e koronivuli me vaka o na cakava ena vunau e veivale. Mo lewa vinaka na gauna mo vakamacala kina. (Dauv. 3:1, 7) Ena rairai veivosakitaki e dua na ka ena kalasi se o lesi mo vakarautaka e dua na ivakamacala o rawa ni vakaraitaka kina na ka o vakabauta. Se tarogi iko e dua na nomu icaba se cava o sega ni vakaitavi kina ena so na ka. Ni se qai tekivu ga na yabaki, eso na lotu vaKarisito era tukuna rawa vei ira na qasenivuli nira iVakadinadina i Jiova ra qai solia eso na ivola e vakamacalataki kina na ka eda vakabauta. Eso tale era dau biuta ena nodra desi na ivola me rawa nira taro kina nodra icaba e koronivuli.
3. O na vakavakarau vakacava mo vunau e koronivuli?
3 Vakavakarau: O na yalodei ke o dau vakavakarau. (1 Pita 3:15) Vakasamataka na ka o rawa ni tarogi kina kei na ka o na tukuna. (Vkai. 15:28) O rawa ni biuta tu e koronivuli na nomu iVolatabu kei na so tale na ivola o rawa ni vakayagataka me vaka na Reasoning, Young People Ask, kei na ivola me baleta na veika e bulia na Kalou. Kerei rau na nomu itubutubu mo dou vakatovotovotaka ena gauna ni sokalou vakavuvale na ka mo tukuna.
4. Na cava mo vunau tiko ga kina e koronivuli?
4 Rai Donu: Kua ni nanuma nira na vakalialiai iko tu ga na nomu itokani ni o tukuna vei ira na ka dina. Era na rairai qoroya eso na nomu yaloqaqa ra qai rogoci iko. Ia kua ni yalolailai ke sega ni dua e vakarorogo. Ena marautaka o Jiova na nomu sasaga mo vunau. (Iper. 13:15, 16) Kerei koya tiko ga me ‘vakadoudoutaki iko mo vosa.’ (Caka. 4:29; 2 Tim. 1:7, 8) Vakasamataka na marau o na vakila ni dua e rogoci iko. De dua o koya e vakarorogo qori ena mai qaravi Jiova tale ga!