Doudou ni Vunau Vei Ira na Tagane
1. E levu dina na ka me caka ena vuku ni Matanitu ni Kalou, ia na cava e lailai?
1 E levu dina na ka me caka ena vuku ni Matanitu ni Kalou ena iotioti ni veisiga qo. Ia e lailai na tagane era rawata na ivakatagedegede vakaivolatabu mera veidusimaki ena cakacaka kece qo. (Mari. 4:30-32; Caka. 20:28; 1 Tim. 3:1-13) E levu ga na yalewa era ciqoma na itukutuku vinaka ena so na vanua. Era nanuma na tagane ena so na vanua ni itavi nei yalewa me vakavulici ira na gone ena veika vakayalo. Eda na vukei ira gona vakacava e levu tale na tagane mera kauaitaka nodra bula vakayalo, ra mai tomani keda ena sokalou dina?
2. A yaga vakacava nodrau vunau vei ira na tagane o Paula kei Pita?
2 Vunau Vei Ira na Tagane: E dau rawarawa nodra gole mai na sokalou dina na lewe ni dua na vuvale ke ciqoma o ulunivale na ka dina. Rau vakadinadinataka qori o Paula kei Sailasa ena gauna e rau a bala kina i valeniveivesu ena vuku ni nodrau vunau. Mani ciqoma kina na ka dina na ivakatawa ni valeniveivesu rau a vunau vua, ratou qai papitaiso vakavuvale. (Caka. 16:25-34) Ena nona vunau voli mai Korinica o Paula, ‘a vakabauta na Turaga o Kirisipo na turaga ni valenilotu, kei ira kece nona lewe ni vale.’ (Caka. 18:8) A uqeti Pita tale ga o Jiova me vunau vei Konilio, e dua na turaganivalu e kilai ni ‘tamata daulotu, qai rerevaka na Kalou.’ Mani papitaiso kina o Konilio, o ira na wekana kei ira nona itokani voleka.—Caka. 10:1-48.
3. Me vakataki Filipi, o vakasamataka e dua na “vakailesilesi” o rawa ni vunau vua?
3 Ena yaga sara vakalevu noda vunau vei ira na tagane era “veiliutaki.” (1 Tim. 2:1, 2, VV) Dua vei ira qori e “vakailesilesi levu,” e nona dauniyau na ranadi kei Iciopea. Ena veidusimaki ni agilosi i Jiova, a vunau vua o Filipi. A rogoca ni ‘wilika tiko vakadomoilevu na ivola i Aisea,’ sa qai vakamacalataka vua o Filipi na itukutuku vinaka me baleti Jisu. Na turaga ni Iciopea qo a qai dua tale ga na tisaipeli, kena irairai ni tukuna tale ga na ka e rogoca ni lesu i nona vanua. De dua a vunau tale ga vua na ranadi kei ira nona vakailesilesi. Sa vinaka mada ga, ni o ira va qori e dredre na vunau vei ira nira dau osooso.—Caka. 8:26, 27, VV, 28-39.
4. E rawa vakacava nida vunau vakalevu vei ira na tagane?
4 Gauna o Rawa ni Vunau Kina: E levu na tagane era cakacaka ena siga. Vakacava mo veisautaka na nomu ituvatuva, mo vunau vakalevu ena yakavi, muanimacawa, se olodei? Ni o vunau wasoma ena yalava ni bisinisi, o na sotavi ira e levu na tagane era sega ni dau tiko e vale. Moni saga vagumatua na tacida tagane oni cakacaka saumi, moni vunau tawalokuci vei ira na tagane oni cakacaka vata. Nida vunau e veivale vakabibi ena yalava e tarai wasoma, moni kerea ena so na gauna na tacida tagane moni vosa sara ga vei ulunivale.
5. Na cava meda cakava na yalewa ke tataleitaki na tagane?
5 Ke da vunau na yalewa vua e dua na tagane e tataleitaki, meda kua ni lesuvi koya duadua. Me tomani keda e dua na dautukutuku, se lako vata kei watimu ke o vakawati. Ke se tataleitaki tiko ga ni toso na gauna, e vinaka mo kerea e dua na tacida tagane matua me lai tomana na veitalanoa.
6. Me vakataka ga na yapositolo o Paula, e rawa vakacava nida ‘rawai ira e levu’?
6 Digia na Ulutaga Era Kauai Kina: O Paula e dau nanumi ira na vakarorogo, e dau veisautaka tale ga nona iwalewale ni vunau me ‘rawai ira e levu.’ (1 Kor. 9:19-23) E bibi meda vakasamataka da qai vakavakarau vinaka ena ulutaga era na rairai kauai kina na tagane eda sotava. E levu na tagane era dau kauaitaka na leqa vakailavo, veiliutaki ca, era vinakata tale ga mera taqomaki se tiko vinaka na nodra vuvale. De dua era kauaitaka tale ga na inaki ni bula, na ka ena yaco ina vuravura, se na vuna e vakatara tu kina na rarawa na Kalou. Ke da vakasamataka tiko qori nida lai vunau, ena ciqomi na itukutuku eda vakasavuya.—Vkai. 16:23.
7. Eda na rawa vakacava ni vukea na tagane tawavakabauta e gole mai na soqoni?
7 Vukei Ira na Tagane Tawavakabauta: Nodra itovo vinaka na yalewa lotu vaKarisito ena uqeti ira vakalevu na watidra tawavakabauta. Ia eda rawa ni veivuke tale ga na lewe ni ivavakoso. (1 Pita 3:1-4) Kaya mada ke gole mai kei watina ena soqoni, na noda veikauaitaki ena rawa sara ga ni tarai koya. Kena irairai e gole mai na soqoni ni via kila na ka dina, ena taleitaka kina me vuli iVolatabu.
8. Era rawa ni veivuke vakacava na tagane lotu vaKarisito vei ira na tagane tawavakabauta era sega ni taleitaka na ka dina?
8 Ena yasana adua, eso na tagane era sega ni dau taleitaka na ka dina. Ia ni toso na gauna, era na rairai vinakata mera veivosakitaka na iVolatabu kei na tacida era veikilai vinaka. Ena dua na ivavakoso, nira dau veisiko na tacida ina dua na vuvale era sega ni qaravi Jiova kece na lewena, era dau saga mera veitalanoataka kei ulunivale na veika e kauai kina. A dewa sara ena iVolatabu na veitalanoa, papitaiso tale ga o ulunivale. Ena dua tale na vanua, e dua na tacida a vukea e dua na tagane tawavakabauta me viribaitaka na nona vale. Na veikauaitaki ya e tekivu kina na vuli iVolatabu. (Kala. 6:10; Fpai. 2:4) Vakacava moni vakaliuliu na tagane lotu vaKarisito moni vukei ira na tagane tawavakabauta?
9. Ena yaga vakacava nodra vakavulici na tagane lotu vaKarisito?
9 Vakavulici Mera Cola iTavi: Sega ni vakabekataki nira na ciqoma eso na tagane na itukutuku vinaka ni Matanitu ni Kalou, ra qai tadolova na itavi ena ivavakoso. De ra dua sara na ‘isolisoli tamata,’ se qase ni ivavakoso era vakayagataka na nodra kila kei na taledi ena ivavakoso. (Efeso 4:8; Same 68:18) E vu mai lomadra nodra cola itavi, ra cakava tale ga ena marau. (1 Pita 5:2, 3) Io, era vu ni veivakalougatataki vei keda!
10. E yaga vakacava vei ira e levu na sasaga i Ananaiasa me vukei Paula?
10 O Saula a dau tusaqati ira e liu na lotu vaKarisito, ia e muri a qai “nodrai apositolo na veimatanitu tani.” (Roma 11:13) Ni dau veitusaqati o Saula, a sega kina ni via vunau vua o Ananaiasa. Ia ni dusimaki koya na Turaga, mani vunau vua na tagane a qai kilai e muri me yapositolo o Paula. E se yaga tiko ga me yacova mai qo na cakacaka vakaitalatala i Paula. Qori era vakadinata e le udolu vakacaca era rogoci koya sara ga ni vunau, kei ira era uqeti ena veika a vola ena Vosa ni Kalou.—Caka. 9:3-19; 2 Tim. 3:16, 17.
11. Na cava meda yalorawarawa kina ke gadrevi meda veisau meda doudou kina ni vunau vei ira na tagane?
11 Meda yalorawarawa mada ga ke gadrevi meda veisau meda doudou kina ni vunau vei ira na tagane. Ke noda isausau qori, ena vakalougatataka o Jiova noda sasaga meda cakava na lomana, da qai cakava vinaka na cakacaka e vauca na Matanitu ni Kalou.