Na Cava mo Kauaitaka Kina na Watidra na Dautukutuku Era Sega ni Tiko ena Dina?
1. Sega ni o ira ga na lotu vaKarisito ena vuvale e duidui nodra vakabauta era vinakata me vukei watidra mera kila na ka dina, o cei tale?
1 Eso beka na dautukutuku ena ivavakoso e sega ni tiko ena dina o watidra tagane se o watidra yalewa? Ke vaka kina e sega ni vakabekataki nira vinakata me tomani ira o watidra ena sokalou dina. Ia e sega ni o ira ga era vinakata qori. Na lewe ni vavakoso tale ga era vakatotomuria na Kalou ena nodra vinakata “me bula na veimataqali tamata kece, mera kila tale ga na ka dina.” (1 Tim. 2:4) Na cava eda na kauaitaka kina na watidra na dautukutuku ena ivavakoso era sega ni tiko ena dina?
2. E yaga vakacava na yalomatua meda vukei ira kina na sega ni tiko ena dina?
2 Kena imatai, meda kauaitaka na nodra itovo ni rai na tagane kei na yalewa era sega ni tiko ena dina. Levu vei ira era lomana na nodra vuvale, era saga mera tagane se yalewa vakawati vinaka, mera itubutubu vinaka tale ga. De dua era dau yalodina na muria na nodra ivakavuvuli vakalotu e duidui mai na noda. Na veika era kila me baleti keda na iVakadinadina i Jiova era rogoca mai vei ira na nodra itokani era lecaika ra qai sega ni dau taleitaki keda. Eso era dau cata ni o watidra e sa vakayagataka na gauna era dau tiko vata kina e liu vakavuvale me gauna ni nodra sokalou. Ia ke da yalomatua eda na veidokai, yalololoma, eda na sega tale ga ni ririko na veimaliwai kei na dua e sega ni tiko ena dina.—Vkai. 16:20-23.
3. Na sala vinaka cava o na rawa kina e dua e sega ni tiko ena dina?
3 Dau Veikauaitaki: Na sala vinaka meda rawa kina na watida ina dina ena imatai ni gauna na noda itovo, sega ni kena veivosakitaki na iVolatabu. (1 Pita 3:1, 2) Ena tikina qo e bibi kina na veikauaitaki. Kemuni na tacida yalewa moni kauaitaki ira na yalewa vakawati era sega ni tiko ena dina, moni cakava tale ga qo na tacida tagane vei ira na tagane vakawati era sega ni tiko ena dina. Ena sala cava?
4. Eda na kauaitaki ira vakacava na sega ni tiko ena dina?
4 De dua o rawa ni sikova e dua e sega ni tiko ena dina ni o sa veitalanoa oti kei watina e lotu vaKarisito. Mo kua ni rarawataka ke sega ni kauaitaka nomu veisiko yani o koya e sega ni tiko ena dina. Ia na noda yalovinaka kei na veikauaitaki ena rairai veisau kina na nona rai me baleti keda. (Roma 12:20) Eso na lotu vaKarisito matua vakayalo era sureti koya e sega ni tiko ena dina kei na nona vuvale ena vakayakavi, na kena inaki mera veikilai kina qai vakaseavutaka na nona rai cala. Era na tekivu veitalanoataka na veika e taleitaka o koya e sega ni tiko ena dina, era na sega ni usuraka me veivosakitaki na veika vakayalo. Ia ena qai kau cake mai na tikina qori ni o vakila e sa rawarawa na veimaliwai kei koya. Se rairai ena vakadonuya na veisureti me lako mai na soqoni me rogoca sara ga na ka e vulica tiko o watina, vakauasivi ni sa veikilai tiko kei na so ena ivavakoso. Ke se sega mada ga ni via kila e levu na ka me baleta na ka dina, me vakavinavinakataki na nona dau tokoni watina lotu vaKarisito.
5. Era na kauaitaki ira vakacava na sega ni tiko ena dina na qase ni ivavakoso?
5 O ira sara ga na qase ni ivavakoso mera liu ena nodra kauaitaki na watidra na dautukutuku era sega ni tiko ena dina ra qai tu vakarau ena gauna veiganiti mera vunau kina vei ira. Ena rairai taleitaka na itukutuku veivakacegui ena iVolatabu e dua e sega ni tiko ena dina ni curu tu e valenibula se ni tauvimate bibi. Ke yaco na leqa ena dua na vuvale e duidui nodra vakabauta, me vaka nona takali e dua ena vuvale, me sureti koya tale ga e sega ni tiko ena dina na qase ni ivavakoso me rogoca na vosa ni veivakacegui.
6. Na cava na vuna meda kauaitaki ira kina na sega ni tiko ena dina?
6 Vakasamataka mada na nona marau e dua na lotu vaKarisito ena ivavakoso ni sa ciqoma qai lako mai na dina o watina! Ena marautaka tale ga qori o Jiova, o ira na agilosi, kei na vo ni lewe ni ivavakoso. (Luke 15:7, 10) Ia ke se sega ni tataleitaki o koya e sega ni tiko ena dina, meda lomavakacegu ni noda sasaga e vakamarautaki Jiova, e ‘sega ni vinakata me rusa e dua, e vinakata ga meda veivutuni kece.’—2 Pita 3:9.
[Caption on page 6]
Na sala vinaka meda rawa kina na watida ina dina ena imatai ni gauna na noda itovo, sega ni kena veivosakitaki na iVolatabu