Rawati na Marau ena Vuvale Duidui Vakabauta

“O kila vakacava ni o na sega ni vakabulai watimu?”​—1 KOR. 7:16.

O NA SAUMA VAKACAVA?

Na cava mera cakava na lotu vaKarisito mera veiyaloni tiko ga kina kei na lewe ni nodra vuvale duidui vakabauta?

Na cava mera cakava na lotu vaKarisito me rawa nira ciqoma na nodra lewenivuvale na sokalou dina?

Na cava eda rawa ni cakava meda vukei ira kina na tacida era tiko ena vuvale duidui vakabauta?

1. Ni dua e ciqoma na ka dina, ena tarai ratou vakacava na lewe ni nona vuvale?

DUA na gauna a talai ratou na nona yapositolo o Jisu, e qai tukuna: “Ni dou lai vunau, dou kaya, ‘Sa voleka na matanitu vakalomalagi.’” (Maciu 10:1, 7) Na itukutuku vinaka qori ena vakacegui ira na ciqoma, era na marautaka tale ga vakalevu. Ia e vakasalataki ratou na nona yapositolo o Jisu, ni levu era na tusaqata na nodratou cakacaka vakaitalatala. (Maciu 10:16-23) Na kena e mosimosi duadua, oya na nodra veitusaqati na lewenivuvale.​—Wilika Maciu 10:34-36.

2. Na cava e se rawa tiko ga kina ni vakilai na marau ena vuvale duidui vakabauta?

² Kena ibalebale qori, ni sega ni rawa ni vakilai na marau ena vuvale duidui vakabauta? Sega! Ena so na vuvale ena rairai kaukaua kina na veitusaqati, ia eso tale e sega. Ena rairai sega tale ga ni dau dede na veitusaqati e vale. Se mani cava na keda ituvaki, e rawa tiko ga nida marau ke donu tiko ga na noda rai nira tusaqati keda na noda lewenivuvale se nira sega ni taleitaka na ka dina. O Jiova tale ga ena vakalougatataki ira na yalodina vua, ena vukei ira mera marau tiko ga nira sotava na ituvaki dredre. E rawa nira marau na lotu vaKarisito ke ra (1) guta tiko ga na veiyaloni ena vuvale, (2) saga tale ga mera vukei ira na lewe ni nodra vuvale mera ciqoma na ka dina.

GUTA NA VEIYALONI E VALE

3. Ena vuvale duidui vakabauta, na cava e bibi kina vua na lotu vaKarisito me guta tiko ga na veiyaloni?

³ Ena rawa nira ciqoma na ka dina na lewe ni nomu vuvale ke vakilai na veiyaloni. (Wilika Jemesa 3:18.) Ke ra sega mada ga ni qaravi Jiova na lewenivuvale kece, e se vinakati ga vua na lotu vaKarisito me guta tiko ga na veiyaloni. Ena cakava vakacava qori?

4. O na lomavakacegu tiko ga vakacava?

⁴ E bibi mo lomavakacegu tiko ga. Me rawati qori, ena vinakati mo kerea “na vakacegu ni Kalou.” (Fpai. 4:6, 7) E rawati ga na vakacegu kei na marau ni o vulica na veika me baleti Jiova, o qai muria na ivakavuvuli vakaivolatabu. (Aisea 54:13) O na marau qai lomavakacegu tale ga ke o vakaitavi ena soqoni vaKarisito, gumatua tale ga ena cakacaka vakaitalatala. Ke o tiko ena vuvale duidui vakabauta, o se rawa ga ni vakaitavi ena cakacaka vaKarisito. Kena ivakaraitaki o Enza,a e dau tusaqati koya vakaca o watina. Ni bera ni gole ena cakacaka vakavunau, ena cakava rawa na cakacaka ni vale. E tukuna: “Na gauna kece au vakaitavi kina ena cakacaka vakavunau, e vakalougatataka o Jiova na noqu sasaga.” Qori e vakacegui koya sara ga, e marau tale ga kina.

5. Na ituvaki dredre cava era sotava na tacida ena vuvale duidui vakabauta, era na vukei vakacava?

⁵ E vinakati dina na sasaga mo veiyaloni tiko ga kina kei ratou na lewe ni nomu vuvale era sega ni vakabauta. Ena rairai dredre toka qo baleta ena so na gauna, eratou na vinakata mo cakava na ka e veisaqasaqa kei na ivakavuvuli vakaivolatabu. Ena rawa ni vakacudrui ratou nomu muria na ivakavuvuli vakaivolatabu. Ia me kua ni tarova qori na nomu cakava na ka e dodonu. Ni o sasaga tiko ga, de dua dou na qai veiyaloni ena dua na gauna. Ke caka eso na ka e vale e sega ni veisaqasaqa kei na iVolatabu, e sega ni cala mo tokona, ni na sega ni basika kina na duidui. (Wilika Vosa Vakaibalebale 16:7.) Ni o sotava na ituvaki dredre, e bibi mo qara na ivakasala vakaivolatabu e tabaka na dauveiqaravi e yalodina e vuku kei na nodra veidusimaki na qase ni ivavakoso.​—Vkai. 11:14.

6, 7. (a) Na cava era dau tusaqati kina na lewenivuvale era se qai vulica ga na iVolatabu? (b) Na cava me cakava na vuli iVolatabu se dua na iVakadinadina ke tusaqati?

⁶ Ena rawati na veiyaloni ena vuvale ke o nuitaki Jiova, o qai kila vinaka na ka era dui gadreva na nomu lewenivuvale era sega ni vakabauta. (Vkai. 16:20) E rawa tale ga nira cakava qo o ira na se qai vuli iVolatabu. Eso na tagane kei na yalewa vakawati era sega ni vakabauta, era na rairai vakadonuya me vuli iVolatabu o watidra. De dua era nanuma ni na yaga qori ina nodra vuvale. Ia eso tale era na veitusaqati. O Esther sa iVakadinadina nikua, e tukuna ni dau “katakata sara ga” ena gauna e vuli iVolatabu kina o watina kei ira na iVakadinadina i Jiova. E kaya: “Au dau viritaka laivi na nona ivola, eso na gauna au vakama sara ga.” O Howard a tusaqati watina ena gauna e vuli iVolatabu kina, e tukuna: “E levu na tagane era leqataka ni lawakitaki o watidra mera lewena e dua na isoqosoqo vakalotu era dauqaravi tamata. Ena ituvaki va qo ena sega sara ga ni kila o tagane na ka me cakava, na ka ga ena rairai cakava oya me veitusaqati.”

⁷ E bibi meda vukei ira na noda vuli iVolatabu mera tomana tiko ga nodra vuli ke tusaqati ira o watidra. Ena rawa ni vinaka na ituvaki e vale ke dau yalomalua qai dokai watina tiko ga. (1 Pita 3:15) E tukuna o Howard: “Au vakavinavinakataki watiqu ena nona dau yalomalua, sega tale ga ni yalokatakata!” E tukuna o watina: “A tukuna o Howard me cegu na vuli. A tukuna niu vesumonataki. Au sega ni via veiba, au vakaraitaka ga vua ni rawa ni dina na ka e tukuna, ia au se bera mada ga ni vakadinadinataka e dua na ka va qori. Au kerei koya me wilika na ivola au vulica tiko, e mani wilika sara, sega tale ga ni bau vakacala na ka e tukuni kina. E tarai koya sara ga qori.” Meda nanuma tiko, ni gauna e biubiu kina e dua na tacida me vakaitavi ena cakacaka vaKarisito, ena rairai nanuma o watina sega ni vakabauta ni na vakaleqa qori na nodrau bula vakawati se vakavuna na galili. Bibi gona vei ira na vuli iVolatabu kei ira na iVakadinadina mera dau vakamacalataka vakayalovinaka qori vei watidra, mera kua kina ni lomaleqa.

VUKEI IRA MERA CIQOMA NA KA DINA

8. Na ivakasala cava e tukuna o Paula vei ira na lotu vaKarisito e sega ni tiko ena dina o watidra?

⁸ E vakaroti ira na lotu vaKarisito o Paula mera kua ni biuti watidra, dina ga nira sega ni vakabauta.b (Wilika 1 Korinica 7:12-16.) Ni o tiko ena vuvale duidui vakabauta, e se rawa ga ni o marau, qori ke o vakabauta ni rawa ni qaravi Jiova tale ga o watimu ena dua na gauna. Ni o saga mo wasea vei watimu na ka dina, e tiko eso na ka mo qarauna, me vaka eda na raica ena so na ivakaraitaki tarava.

9. Na cava meda qarauna tiko nida via wasea na ka dina vei ira na lewe ni noda vuvale era sega ni tiko ena dina?

⁹ E tukuna o Jason me baleta na imatai ni gauna a vulica kina na iVolatabu: “Au vinakata sara ga meu tukuna vei ira na tamata kece!” Na levu ni nona marautaka na gonevuli na ka e vulica tiko, ena vinakata sara ga me tukuna tu ga e veigauna. De dua ena vinakata mera ciqoma totolo na ka dina o ira na lewe ni nona vuvale, ia era na rairai saqati koya. Ia na cava nona rai o wati Jason? E tukuna o watina: “Au vuturi tale niu rogoci koya tiko.” Dua tale na yalewa e qai iVakadinadina i Jiova e muri ni oti 18 na yabaki nona ciqoma na dina o watina, e tukuna: “E taura na gauna meu vulica na iVolatabu.” Ke o vakavulica tiko e dua qai sega ni vinakata o watina me veitomani ena sokalou dina, vakacava mo vakaraitaka vua na sala me vakamacala kina vakayalololoma vei watina? E tukuna o Mosese: “Ena tau na noqui vakavuvuli me vaka na uca, ena mimiri na noqu vosa me vaka na tegu, me vaka na uca mimiri ki na co sa qai tubu.” (Vkru. 32:2) Ke wasei toka ga vakalalai na ka dina, qai caka tale ga vakamatau ena kena gauna donu, ena yaga sara vakalevu qori mai na noda tukuna tu ga yani e levu na ka ena dua ga na gauna.

10-12. (a) Na cava a tukuna na yapositolo o Pita vei ira na lotu vaKarisito e sega ni tiko ena dina o watidra? (b) A vukei vakacava e dua na gonevuli me muria na ivakasala ena 1 Pita 3:1, 2?

¹⁰ Na yapositolo o Pita e vakasalataki ira na yalewa vaKarisito ena vuvale duidui vakabauta: “Moni vakamalumalumu vei ira na dui watimuni, baleta ke ra sega ni talairawarawa ina vosa ni Kalou, ena rawa ni veisautaki ira na nomuni itovo, ke oni sega mada ga ni tukuna e dua na ka, nira na raica ga na nomuni itovo savasava kei na nomuni veidokai dina.” (1 Pita 3:1, 2) Nira talairawarawa ra qai veidokai dina na yalewa vaKarisito, ena rawa nira ciqoma na ka dina o watidra. Ena cakava tale ga qori na tagane vaKarisito, ena vakaraitaka na itovo vaKalou, ena liutaki ratou vakayalololoma na nona vuvale, dina ni na tusaqati koya o watina.​—1 Pita 3:7-9.

¹¹ E levu ena gauna qo era vakadinadinataka na yaga ni ivakasala i Pita. Dua vei ira qori o Selma. Ena gauna a vulica kina na iVolatabu kei ira na iVakadinadina i Jiova, a sega sara ga ni taleitaka o Steve na watina. E tukuna o Steve: “Au cudru, vuvu qai lomaleqa vakalevu.” E tukuna o Selma: “Ni bera mada ga niu vulica na iVolatabu, e sega ni rawarawa na bula vata kei koya. E dau yalototolo. Niu sa vulica na iVolatabu, sa qai ca ga na nona itovo.” Na cava e qai cakava o Selma?

¹² A nanuma lesu na ka e vakavulici koya kina na nona qasenivuli. E tukuna: “Ena dua na siga, au sega ni via vuli iVolatabu. Baleta ni keirau veiba kei Steve ena bogi, e qai mokuti au. Au rarawa sara ga qai yalolailai. Au mani tukuna vei qasenivuli na ka e yaco kei na ka e tu e lomaqu. E tukuna meu wilika na 1 Korinica 13:4-7. Niu wilika na tikinivolatabu qori, au qai tukuna, ‘E sega ni bau vakaraitaka mada ga o Steve e dua na itovo vinaka e tukuni tiko ena tikinivolatabu qo.’ Ia e vukei au na tacida qo meu veisautaka na noqu rai ena nona tarogi au: ‘Vakacava, o sa bau vakaraitaka vei watimu eso na itovo qori?’ Au sauma, ‘Sega ni dua, ni sa dredre sara ga na bula vata kei koya.’ E tukuna vakavinaka noqu qasenivuli, ‘Selma, o cei e saga tiko me lotu vaKarisito? O iko se o Steve?’ Au qai kila ni dodonu meu veisautaka na noqu rai, au kerei Jiova me vukei au meu lomani Steve vakalevu. Ni toso na gauna, e laurai na veisau.” Ni oti e 17 na yabaki, e qai ciqoma o Steve na dina.

RAWA NIRA VEIVUKE ESO TALE

13, 14. Na cava eda rawa ni cakava na lewe ni ivavakoso meda vukei ira kina na tacida era tiko ena vuvale duidui vakabauta?

¹³ Me vaka ga na mirimiri ni uca e dau vakasuasuataka na qele, e vukea tale ga me bula na kau, na lewe tale ga ni ivavakoso e rawa nira vukei ira na tacidra era tiko ena vuvale duidui vakabauta mera marau tiko ga. E tukuna o Elvina mai Brazil: “Na nodra yalololoma na taciqu e vukei au meu dei tiko ga ena dina.”

¹⁴ Nodra yalololoma kei na nodra dau veikauaitaki na mataveitacini ena ivavakoso, e rawa ni veisautaka na nodra rai na lewenivuvale era sega ni tiko ena dina. Dua na tagane mai Nigeria, e ciqoma e liu o watina na dina. Ni oti e 13 na yabaki sa qai dua na iVakadinadina. E tukuna: “Niu gole tiko kei na dua na iVakadinadina, e mani ca na nona motoka. E vaqarai ira na iVakadinadina ena koro voleka, ra qai vakaicilitaki keirau ena bogi. Era veikauaitaki dina, vaka ga ni keimami sa veikilai makawa. Au vakadinadinataka e kea na loloma vaKarisito e dau tukuna o watiqu.” Dua tale ga na yalewa mai Igiladi, a ciqoma e liu o watina na dina. Ni oti e 18 na yabaki sa qai dua na iVakadinadina. E tukuna: “Era dau sureti keirau na iVakadinadina me keimami lai kana vata. Era dau kauaitaki au tu ga.”c A tukuna tale ga e dua na tagane vakawati mai Igiladi e qai ciqoma e muri na dina: “Era dau sikovi keitou na mataveitacini, se era dau sureti keitou ina nodra vale, au raica nira dau veikauaitaki. Au vakadinadinataka qo niu curu e valenibula, e levu sara ga na iVakadinadina era mai raici au.” Vakacava, o rawa tale ga ni qara eso na sala mo kauaitaki ira kina na vuvale era duidui vakabauta?

15, 16. Ena vuvale duidui vakabauta, na cava mera cakava na tacida mera marau tiko ga kina?

¹⁵ Macala ga nira na sega ni ciqoma kece na dina o ira na lewe ni noda vuvale se o ira na wekada, dina ke vica vata na yabaki na noda vunau voli ena veidokai da qai caka vinaka vei ira. Eso era sega ga ni taleitaka na dina, se era na veitusaqati tiko ga. (Maciu 10:35-37) Ia ena yaga vakalevu ke da vakaraitaka tiko ga na itovo vakalou. E tukuna e dua na tagane vakawati a qai ciqoma na dina: “Na gauna e vakaraitaka kina na iVakadinadina na itovo vakalou vei watina, eda sega ni kila se na tarai watina vakacava. Koya gona, kua vakadua ni soro, vukei ira tiko ga na watimuni.”

¹⁶ Ke sega mada ga ni via ciqoma na dina na noda lewenivuvale, e se rawa ga nida marau. Dua na tacida yalewa, e solia na nona vinaka taucoko me vunau vei watina ena loma ni 21 na yabaki, ia e sega ni via ciqoma na dina. E kaya: “Qo na ka au cakava meu marau tiko ga kina, au saga meu vakamarautaki Jiova, qori ena noqu yalodina tiko ga vua, meu vakavinakataka tale ga na noqu bula vakayalo. Niu ogaoga ena veika vakayalo​—vuli vakataki au, soqoni, cakacaka vakavunau, kei na noqu vukei ira na taciqu vakayalo​—keirau veivolekati sara ga kina kei Jiova, e taqomaka tale ga na lomaqu.”​—Vkai. 4:23.

KUA NI SORO!

17, 18. Na cava mera cakava na lotu vaKarisito ena vuvale duidui vakabauta, me dei tiko ga kina na nodra inuinui?

¹⁷ Ke o dua na lotu vaKarisito yalodina, kua ni soro ni o tiko ena vuvale duidui vakabauta. Nanuma tiko, “ni na sega ni laivi ira na nona tamata ko Jiova e na vuku ni yacana levu.” (1 Sam. 12:22) Ena tokoni iko ke o volekati koya. (Wilika 2 Veigauna 15:2.) Koya gona, ‘mo rekitaki Jiova qai laiva vua na nomu sala, vakararavi tale ga vua.’ (Same 37:4, 5) Mo “gumatua ena masu,” mo vakabauta tale ga ni na vukei iko na Tamada Vakalomalagi mo vosota kina na ituvaki dredre kece ga.​—Roma 12:12.

¹⁸ Mo kerei Jiova me dusimaki iko na yalona tabu mo veiyaloni tiko ga kina e vale. (Iper. 12:14) Io, na nomu dau veiyaloni e rawa ni uqeti ira na lewe ni nomu vuvale era sega ni vakabauta. O na marau, o na vakila tale ga na vakacegu ni o “cakava na ka kece me dokai kina na Kalou.” (1 Kor. 10:31) Mo nuidei tale ga nira tiko na tacimu vakayalo, era na lomani iko, era na tokoni iko tale ga!

[iVakamacala e ra]

[iYaloyalo ena tabana e 28]

Digia na gauna veiganiti mo dau vakamacalataka kina na nomu vakabauta

[iYaloyalo ena tabana e 29]

Dau kauaitaka na watidra na lotu vaKarisito era sega ni vakabauta