Meda Kenadau ena Vakayagataki ni iVolatabu

1. Na cava e yaga vakalevu kina na iVolatabu?

¹ Ke da kenadau ena vakayagataki ni iVolatabu, eda na wasea vakadodonu na ivakavuvuli dina, da qai vakavotuya na ivakavuvuli lasu kei na vakasama vakatamata.​​—⁠2 Tim. 2:​15; 1 Pita 3:​15.

2. Eda na kenadau vakacava ena qarai ni veitikinivolatabu?

² Kila Vinaka na iVolatabu: O na kila vinaka e dua na iyaya ni cakacaka ke o dau vakayagataka wasoma. E va tale ga qori na iVolatabu, ke o wilika na imatai ni tabana yaco sara ina kena iotioti, o na kila vinaka na usutu e vakabibitaka. O na nanuma vinaka tale ga na veitikinivolatabu, qai rawarawa nomu kunea. Ni o kila vinaka na iVolatabu, ena gu na lomamu, o na nuidei tale ga na tukuna vei ira tale eso ni o vunau tawalokuci se vunau e veivale.​​—⁠1 Ces. 1:⁠5.

3, 4. (a) Na cava eso tale na sala eda na kila vinaka kina na iVolatabu? (b) E tiko beka eso tale na kena iwalewale o vakayagataka?

³ Meda vakamatauna meda cega na iVolatabu qai muria na kena wiliki ena gauna ni soqoni. Meda wilika tale ga na veitikinivolatabu era lavetaki ena noda ivola nida vuli vakataki keda se da vakavakarau ena soqoni, da qai vakasamataka na sala meda muria kina na kena ivakavuvuli. Era raica e levu ni nodra wiliwili sara ga mai na iVolatabu e vinaka cake mai na nodra wiliwili ena kompiuta se na kena ilavelave e tabaka na kompiuta. E rawarawa kina nodra kunea na tikinivolatabu ena cakacaka vakaitalatala.​​—⁠Joni 14:⁠26.

⁴ Eso na vuvale era tuvanaka na gauna mera wiligusutaka kina na tikinivolatabu. Era rairai vakayagataka na kati (flash card), e volai na tikinivolatabu ena dua na yasana, kei na ka e tukuna ena yasana adua. Sa ra qai saga mera vakilakila na tikinivolatabu, se ra cavuqaqataka na ka e tukuna. Eda na kenadau tale ga ena vakayagataki ni iVolatabu ke da vakayagataka ena noda vakatovotovotaka na ka eda lai tukuna e veivale, vua e dua e sabaya na noda ivakamacala se vakatataro.

5. Cava na vuna meda saga kina meda kenadau ena vakayagataki ni iVolatabu?

⁵ E sega tale ni dua na ivola e yaga me vaka na iVolatabu. Ni volai kina na itukutuku e ‘vakavukui keda me rawa nida bula.’ (2 Tim. 3:​15) E levu ena noda yalava era sega tu ni kila na iyau talei e volai ena iVolatabu. Me rawa gona nida vakamacalataka vei ira na ka e tukuna, e bibi meda saga meda kenadau ena vakayagataki ni iVolatabu.​​—⁠Vkai. 2:​1-5.