Ena Veisoliyaki e Vuravura Raraba na iVola ni Veisureti ni iVakananumi!
1 “Dou dau cakava qo mo dou vakananumi au kina.” (Luke 22:19) Nida muria na dauveiqaravi i Jiova na ivakaro qori i Jisu, eda na soqovata kina kei ira na tataleitaki meda vakananuma nona mate ena 30 Maji, 2010. E dua gona na ivola ni veisureti lavotaki ni iVakananumi ena veisoliyaki e vuravura raraba me tekivu ena 13 Maji ina 30 Maji.
2 Kena Soli: E rawa mo solia vei taukeinivale na ivola ni veisureti me raica toka na iyaloyalo eliu, qai tukuna: “Ena yakavi ni 30 Maji, era na soqovata kina e milioni e veiyasa i vuravura mera vakananuma na mate i Jisu. Au na biuta toka na ivola ni veisureti qo me rawa ni dou tiko kina vakavuvale. O rawa tale ga ni sureti ira mai na nomu itokani. Qai nanuma tiko na gauna kei na vanua ena vakayacori kina na soqo qo.” Ena vakatau ena ituvaki, ke o via wilika na Luke 22:19 me baleta na ivakaro ya. Ia ni sega ni levu na gauna me kovuti kina na yalava, ena vinaka meda vosa ga vakalekaleka.
3 Ke levu na yalava ni ivavakoso, de dua eratou na tukuna na qase meda biuta na ivola ni veisureti ena vale e lala ena imatai ni gauna eda cakacaka kina. Ke veiganiti, solia na mekesini kei na ivola ni veisureti. Meda nanumi ira noda veisikovi lesu, vuli iVolatabu, ira eda cakacaka vata, vuli vata, ira na wekada, ira eda tiko veitikivi, kei ira tale eso eda veikilai meda sureti ira tale ga.
4 Tu Vakarau mo Vakaitavi Vakalevu: E gauna vinaka meda vakalevutaka kina noda cakacaka vakaitalatala na vula ni iVakananumi. Rawa beka mo veisautaka nomu ituvatuva mo painia veivuke? Era toso vinaka tiko vakayalo na luvemu se na nomu vuli iVolatabu? Ke vakakina, raici iratou na qase ke ra sa rawata na ivakatagedegede mera dautukutuku bera ni papitaiso, me rawa nira tomani keda ena cakacaka lavotaki qo. Noda vakavinavinakataka na loloma i Jiova ena nona vakarautaka na ivoli ena uqeti keda meda tiko ena iVakananumi da qai sureti ira e levu tale mera mai tomani keda.—Joni 3:16.
[Taro]
1. Na veisureti lavotaki cava e vuravura raraba sa tuvanaki tu ni bera na iVakananumi?
2. Eda na solia vakacava na ivola ni veisureti?
3. O cei eda rawa ni sureta?
4. Na cava eda na cakava meda vakavinavinakataka kina na loloma i Jiova ena nona vakarautaka na ivoli?