Ena Tekivu Veisoliyaki na iVola ni Veisureti ena 2 Epereli
1. Eda na veisoliyaka ena gauna cava na ivola ni veisureti ni iVakananumi ena caka ena yabaki qo? Na cava e laurai ena veisureti e caka e veiyabaki?
1 Ena 2 Epereli ina 17 Epereli, eda na veisoliyaka tiko kina na ivola ni veisureti ni soqo bibi duadua ni yabaki—na iVakananumi ni mate i Karisito. E laurai ena veiyabaki sa sivi ni levu na tataleitaki era ciqoma na veisureti qo. Me kena ivakaraitaki, ena siga ni iVakananumi a qirita na valenivolavola ni tabana e dua na marama, qai kaya: “Au raica e dua na ivola ni veisureti ena mata ni noqu katuba niu lesu mai vale. Au via lako, ia au sega ni kila na gauna ena caka kina.” A mani vakamacalataka na tacida tagane erau veivosaki tiko ni kena ivakamacala e tiko ena ivola ni veisureti. Ni bera ni cava nodrau veivosaki a tukuna sara na marama qo: “Au na tiko ena nomuni soqo ena bogi nikua!”
2. Na cava eda rawa ni kaya nida solia na ivola ni veisureti?
2 Ka Eda Rawa ni Cakava: Ni lailai na gauna me kovuti kina na yalava, e vinaka meda vosa ga vakalekaleka. Eda rawa ni kaya: “Bula. Au via sureti kemudou tiko vakavuvale ena dua na soqo bibi ena caka e vuravura raraba ena Sigatabu, 17 Epereli. [Solia na ivola ni veisureti.] Na tikinisiga qo ena vakananumi kina na mate i Jisu. Ena dua tale ga na vunau e yavutaki ena iVolatabu ena vakamacalataki kina na kena yaga vei keda na ivoli i Karisito. Na vanua kei na gauna ena caka kina e tiko ena ivola ni veisureti qo.”
3. E rawa vakacava meda sureti ira e levu tale?
3 Ke levu na yalava ni ivavakoso, de dua era na tukuna na qase meda biuta na ivola ni veisureti ena vale e lala, ia me kua ni laurai levu na vanua eda biuta kina. Meda kua ni guilecava meda sureti ira na noda veisikovi lesu, ira na wekada, ira eda cakacaka vata, vuli vata, kei ira eda veikilai. Nida solia na ivola ni veisureti ena muanimacawa, meda solia tale ga na mekesini ke veiganiti. O na rawa ni painia veivuke ena Epereli qai vakaitavi vakalevu ena cakacaka marautaki ni veisureti?
4. Na cava eda vinakata kina mera tiko ena iVakananumi na tataleitaki?
4 Era na rogoca na tataleitaki era na tiko ena iVakananumi e dua na ivakadinadina levu! Na nona vakarautaka o Jiova na ivoli ena levu ni nona loloma. (Joni 3:16) Era na vulica na veika yaga ena cakava na Matanitu ni Kalou ina kawatamata. (Aisea 65:21-23) Ke ra via vulica e levu tale na ka ena iVolatabu mera kerei ira na dauveivuke. Meda masulaka me levu tale era via kilai Jiova era na ciqoma na veisureti qo ra qai tomani keda ena iVakananumi!