Na Sala me Veirawai Kina Noda Vosa
1 E kilai na yapositolo o Paula ni dua na italatala dau veirawai nona vosa. (Caka. 19:26) O Tui Akaripa sara mada ga a tukuna vua: “Sa vo e lailai mo rawai au me’u lotu va-Karisito.” (Caka. 26:28) E veirawai vakacava na cakacaka vakaitalatala i Paula? E dau vakayagataka na iVolatabu me vakadinadinataka kina na ka dina, qai dau moica na nona ivakamacala me ganiti ira na vakarorogo.—Caka. 28:23.
2 Nida vakatotomuri Paula, e gadrevi tale ga vei keda me veirawai na noda cakacaka vakaitalatala. Ena sala cava? Ena noda yalomatuataka na noda veivosaki kei na noda vakarogoci ira na tani. (Vkai. 16:23) Oqo e tolu na ikalawa bibi meda na vakayacora vinaka kina.
3 Vakarorogo Vinaka: Ni vosa tiko o itaukeinivale, rogoca vinaka na ka e tukuna mo yavutaka kina na nomudrau veivosaki. Ke sega ni duavata o koya kei na nomu ivakamacala, saga mo kila se cava na vuna e sega ni duavata kina kei iko. Ena yaga sara vakalevu ke o kila na ka e vakabauta, na cava e vakabauta kina, kei na cava e uqeti koya me vakabauta kina. (Vkai. 18:13) Mo qaseqasetaka na nomu saga mo kila na veika oya.
4 Taro: Ke dua e tukuna ni vakabauta na Letoluvakalou, tarogi koya: “Sa dede nomuni vakabauta na Letoluvakalou?” Tomana: “Oni sa bau vulica mada se cava e kaya na iVolatabu me baleta na Letoluvakalou?” De o na via taroga tale: “Ke tiki ni Letoluvakalou na Kalou, eda na raica sara ga ena iVolatabu ni vakamacalataki tu kina vakamatata, se vakaevei?” O na rawa ni vakamacalataka na ka e tukuna na iVolatabu mai na nona isaunitaro.
5 Me Laulau Nomu iVakamacala: E dua na iVakadinadina a taroga e dua na marama e vakabauta ni rau tautauvata na Kalou kei Jisu: ‘Ke oni via tukuna vei au ni rau tautauvata e le rua, na veiwekani cava oni rawa ni vakamacalataki rau kina?’ E sauma na marama oya: “Au na kaya ni rau veitacini.” E tomana na iVakadinadina: “Se oni na kaya ni rau vaka sara ga na drua. Ia ni vakavulici keda o Jisu meda raica ni Kalou e Tama, o koya e Luvena, na iyaloyalo cava e via vakaraitaka o koya?” E taura rawa sara na marama oya ni dua e qase vei rau qai lewa e levu na ka. (Maciu 20:23; Joni 14:28; 20:17) E tara sara ga na nona vakasama kei na lomana na marama oqo na iwalewale ni veivosaki e rawai kina oya.
6 E dina ni sega ni tamata kece ena taleitaka na ka dina, se mani vakacava sara na maqosa kei na dina ni nomu ivakamacala. Ia me vakataki Paula ga, meda gumatua tiko mada ga ni vaqarai ira na lomadina ena noda yalava, da qai saga meda rawai ira mera ciqoma na itukutuku ni Matanitu ni Kalou.—Caka. 19:8.