‘Mo Kakua ni Rere’
1. Me vakataki Jeremaia, na cava eso na ka eda na tu suka kina ni vunau?
1 Ena gauna a lesi kina o Jeremaia me parofita a nanuma ni sega ni ganiti koya. Ia a vakadeitaka vua o Jiova: ‘Mo kakua ni rere,’ qai vakayaloqaqataki koya ni na vakayacora vinaka na nona ilesilesi. (Jere. 1:6-10) Ena rairai vakaleqa tale ga na noda vakaitavi ena cakacaka vakavunau na mamadua kei na noda sega ni yalodei. De dua eda na tu suka ni vunau ena so na gauna nida leqataka na ka era na rairai tukuna eso kei na nodra rai. Ia na cava meda cakava meda kua kina ni rere? Na cava eso na veivakalougatataki eda na vakila?
2. Ena yaga vakacava na noda dau vakavakarau ena cakacaka vakavunau?
2 Vakavakarau Vinaka: Eda na sega ni rere ke da vakavakarau vinaka ena cakacaka vakavunau. Kena ivakaraitaki, nida raica rawa na ka meda kaya ke so era ulubale, eda na kila na ka meda tukuna ena so na taro e dau tarogi vakalevu. (Vkai. 15:28) Ia vakacava mo dou vakatovotovotaka ena Sokalou Vakavuvale na ka mo dou tukuna me baleta eso na ituvaki dredre e koronivuli se na cakacaka vakavunau?—1 Pita 3:15.
3. Ena vukei keda vakacava na noda nuitaki Jiova?
3 Nuitaki Jiova: Na iwali vinaka duadua ni rere, meda nuitaka na Kalou. Sa yalataka tu o Jiova me na vukei keda. (Aisea 41:10-13) O koya na noda ivukevuke levu duadua. Kuria qori, a yalataka o Jisu ni na vukei keda na yalo tabu i Jiova ena ka meda tukuna ke mani yaco eso na ituvaki tawanamaki. (Mari. 13:11) Meda masuta wasoma gona na yalo tabu i Jiova.—Luke 11:13.
4. Na cava eso na veivakalougatataki eda na vakila nida gumatua ena cakacaka vakavunau?
4 Veivakalougatataki: Ke da gumatua tiko ga ena cakacaka vakavunau nida sotava na veivakatovolei, eda na dei ke da vakatovolei ena dua na gauna e muri. Eda na bucina tale ga na yaloqaqa kei na doudou—na itovo era kilai kina o ira era dusimaki ena yalo tabu. (Caka. 4:31) Nida valuta na rere ena veivuke i Jiova, ena vakaukauataka na noda vakabauta da qai nuitaka na ligana dauveivakabulai. (Aisea 33:2) Eda na marau da qai lomavakacegu nida kila ni vakamarautaka na Tamada vakalomalagi na noda sasaga. (1 Pita 4:13, 14) Meda kua gona ni rere ni tukuna ena doudou na tukutuku ni Matanitu, da nuitaka tale ga na veivuke ni Kalou!