Vakayagataka na Brochure iTukutuku Vinaka ni o Veivakavulici
1. E vakarautaki vakacava na brochure iTukutuku Vinaka?
1 E vakamacalataki ena noda Cakacaka Vakaitalatala ni Julai, ni dua na iyaya bibi ni veivakavulici na brochure iTukutuku Vinaka Mai Vua na Kalou! E sega ni lavetaki na tikinivolatabu, me rawa nira marautaka sara ga na itaukeinivale na nodra vuli ena iVolatabu. Levu na volavolai ni noda ivola sa vakarawarawataka vei ira na wiliwili mera vulica ga vakataki ira, ia e vakarautaki na ivola qo me vulici kei na dua. Koya gona, nida veisoliyaka, meda saga meda vakaraitaka vei itaukeinivale na icakacaka ni vuli me rawa ni raica ni marautaki na vulici ni itukutuku vinaka ena iVolatabu.—Maciu 13:44.
2. Eda na vakayagataka vakacava na brochure iTukutuku Vinaka ena imatai ni veisiko?
2 Ena iMatai ni Veisiko: O rawa ni kaya: “Au gole mai nikua baleta niu kauaitaka na vanua sa mua tiko kina na noda vuravura. Vakacava o nanuma ni na vinaka na ituvaki kei vuravura? [Waraka me sauma.] E tiko ena iVolatabu na itukutuku vinaka eda na nuidei kina. Qo eso na taro ena saumi vakaivolatabu.” Solia vei itaukeinivale na brochure, qai kerei koya me digia na taro ena daku ni brochure. Vakaraitaka sara na icakacaka ni vuli ni drau dikeva vata na imatai ni parakaravu. Dua tale na iwalewale oya mo tarogi taukeinivale na taro vakavure vakasama ena ulutaga o digitaka, qai vakaraitaka na sala e rawa ni vukei koya na brochure me raica na kena isau ena iVolatabu. Ke tiko ena jw.org na vidio e tautauvata na kena ulutaga, era rawa ni vakaraitaka na vidio qo na dautukutuku.
3. O na caka vuli vakacava ena brochure iTukutuku Vinaka? Vakamacalataka.
3 iCakacaka ni Vuli: (1) Wilika na taro e katabuto me vukei taukeinivale me raica na tikina bibi. (2) Wilika sara na parakaravu. (3) Wilika na tikinivolatabu e vakalai qai taroga vakamaqosa na taro me vukei itaukeinivale me raica ni tiko na isaunitaro ena iVolatabu. (4) Ke tiko e dua tale na parakaravu ena ruku ni taro, muria tale na naba 2 kei na 3. Ke tiko e dua na vidio e lakovata kei na taro, o se bera tale ga ni vakaraitaka vei itaukeinivale, saga mo vakaraitaka ena gauna drau veitalanoa tiko kina. (5) Kena iotioti, kerei koya me sauma na taro mo kila kina ni sa matata vua. Ni oti e vica na veisiko, o qai raica ni sa dei na nomudrau ituvatuva ni vuli, sa rawa ni drau vulica na ivola Kaya na iVolatabu se tomana tiko ga na brochure me yacova sara ni oti.
4. Na cava ena vukei keda meda maqosa ni vakayagataka na iyaya talei qo?
4 Saga mo kila vinaka na iyaya talei qo. Vakayagataka ena gauna veiganiti kece. Ni bera ni o caka vuli, vakasamataki gonevuli kei na sala vinaka mo vakamacala kina vua ni o vakayagataka na tikinivolatabu ena lesoni. (Vkai. 15:28; Caka. 17:2, 3) Ni toso nomu kila kei na nomu maqosa ni vakayagataka na brochure, de dua o na raica ni qo e dua vei ira nomu iyaya taleitaki ni veivakavulici ena ka dina!