Meda Vakaraitaka Noda Vakavinavinaka
Ena iVakananumi ena Caka ena 17 Epereli
1. Na vosa cava ni daunisame e ganita vinaka na vula ni iVakananumi?
1 Ni vakavinavinakataka na daunisame na levu ni cakacaka loloma i Jiova kei na nona veivakabulai, e taroga: “A cava me’u cakava vei Jiova e na vuku ni nona cakacaka loloma kecega vei au?” (Same 116:12) E levu sara na vuna meda vakavinavinaka kina na tamata ni Kalou nikua. Ni oti e vica na senitiuri na volai ni vosa uqeti vakalou qo, a vakarautaka o Jiova ina kawatamata e dua na isolisoli uasivi duadua—na ivoli. Nida vakavakarau meda vakananuma na nona mate na Karisito ena 17 Epereli, e tiko gona na vuna vinaka meda vakavinavinaka kina.—Kolo. 3:15.
2. Na cava eso na vuna meda vakavinavinakataka kina na ivoli?
2 Veika e Rawati ena iVoli: Ena vuku ni ivoli e rawa kina “ni vosoti na noda ivalavala ca.” (Kolo. 1:13, 14) Eda sokaloutaki Jiova kina ena lewaeloma savasava. (Iper. 9:13, 14) Eda na doudou tale ga ni torovi koya ena masu. (Iper. 4:14-16) O ira era vakabauta na ivoli era na rawa ni nuitaka mera bula tawamudu!—Joni 3:16.
3. Eda na vakaraitaka vakacava vei Jiova noda vakavinavinakataka na ivoli?
3 Na Ka Meda Cakava: Dua na sala eda na vakaraitaka kina noda vakavinavinaka, oya na noda wilika e veisiga na tikinivolatabu ni iVakananumi da qai vakasamataka vakatitobu. Me vukei keda ena tikina qori e vakarautaki kina na ulutaga, “O sa Vakavakarau ena Siga Bibi Duadua ni Yabaki?” ena Vale ni Vakatawa, 1 Feperueri, 2011. Ena noda masu mai vu ni lomada e rawa tale ga nida vakavinavinakataka vei Jiova na ivoli. (1 Ces. 5:17, 18) Nida muria na ivakaro i Jisu meda tiko ena iVakananumi e ivakaraitaki ni noda vakavinavinaka. (1 Kor. 11:24, 25) Kuria qori, noda rawa ni vakatotomuria na loloma tawavakaiyalayala ni Kalou nida sureti ira e levu tale mera mai tomani keda.—Aisea 55:1-3.
4. Na cava meda nakita dei?
4 Eda na vakavinavinakataka na tamata i Jiova na iVakananumi nida okata me duatani sara mai na soqoni tale eso. Qo na soqo bibi duadua ni yabaki! Ni sa voleka na iVakananumi, meda nakita dei meda cakava na ka e vola na daunisame: “Mo vakavinavinaka vei Jiova, na yaloqu, ia mo kakua ni guilecava na nona ka ni loloma kecega.”—Same 103:2.