“Dou Dau Cakava Qo”
iVakananumi ena Vakayacori ena 5 Epereli
1. Na cava e bibi kina na iVakananumi?
1 “Dou dau cakava qo mo dou vakananumi au kina.” (Luke 22:19) A tukuna tiko qori o Jisu me ratou dau vakananuma na nona imuri na nona mate vakaisoro. Nida vakasamataka na ka e rawati ena ivoli, e sega tale ni dua na siga e bibi qai talei vei keda na lotu vaKarisito me vakatauvatani kei na siga ni iVakananumi e veiyabaki. Ni sa roro voleka mai na iVakananumi ena 5 Epereli ni yabaki qo, eda na vakaraitaka vakacava nida vakavinavinakataki Jiova?—Kolo. 3:15.
2. Eda na vakavinavinakataka vakacava na iVakananumi ena noda vuli vakataki keda kei na noda vakasama vakatitobu?
2 Vakavakarau: Eda dau vakavakarau ina ka e bibi vei keda. Eda rawa ni vakarautaka na lomada ena iVakananumi nida vulica vakavuvale da qai vakasamataka vakatitobu na veika a yaco ena iotioti ni vica na siga a bula kina e vuravura o Jisu. (Esera 7:10) Eso na tikinivolatabu eda rawa ni wilika e tiko ena noda ivolanivula kei na ivola Dikeva na iVolatabu e Veisiga, ia e tabaki ena Vale ni Vakatawa 1 Feperueri, 2011, tabana e 23-24 na tikinivolatabu taucoko kei na wase ni ivola na Tamata Rogo e vakamacalataki kina.
3. Sala cava eda rawa ni vakavinavinakataka kina na iVakananumi nida vakaitavi vakalevu ena cakacaka vakaitalatala?
3 Vunau: Dua tale na sala eda vakavinavinakataka kina na ivoli, oya na noda vakaitavi vakalevu ena cakacaka vakaitalatala. (Luke 6:45) Ena vakayacori tiko e veiyasa i vuravura na veisureti ina iVakananumi me tekivu ena Vakarauwai, 17 Maji. E rawa beka mo veisautaka nomu ituvatuva mo vakaitavi kina vakalevu ena cakacaka vakaitalatala, de dua o rawa ni painia veivuke? Vakacava mo dou veivosakitaka qo ena nomudou Sokalou Vakavuvale?
4. Ena yaga vakacava na noda tiko ena iVakananumi?
4 E yaga dina na noda dau tiko ena iVakananumi e veiyabaki! Eda na marau da qai lomani Jiova vakalevu nida vakasamataka na nona lomasavu ni solia na luvena e dua bau me mate me keda ivoli. (Joni 3:16; 1 Joni 4:9, 10) Qori e uqeti keda meda kua ni bula ena vukuda ga. (2 Kor. 5:14, 15) Eda na uqeti tale ga meda vakacaucautaki Jiova e matanalevu. (Same 102:19-21) Era nanamaki na dauveiqaravi mamarau i Jiova ena iVakananumi ena 5 Epereli mera ‘vakatakila kina na mate ni Turaga.’—1 Kor. 11:26.