‘Me Dokai na Yaca ni Kalou’
1. Na cava na usutu ni soqo ni tabacakacaka ni 2012? E yavutaki ena tikinivolatabu cava?
1 E dua dina na ka dokai nida kacivi ena yaca i Jiova na Kalou Cecere Duadua! O koya sara ga e vinakata meda vakatokai ena yacana. Me tekivu ena 1931 eda sa kilai na iVakadinadina i Jiova ena yaca e kilaitani kina na Kalou. (Aisea 43:10) O Jisu na Luvena duabau na Kalou e doka vakalevu na yaca i Jiova ni cavuta sara ga eliu ena masu a vakavulica vei iratou na nona imuri. (Maciu 6:9) Ena yabaki ni cakacaka ni soqosoqo ni 2012, e usutu ni noda soqo ni tabacakacaka na vosa i Jisu: “Me Dokai na Yaca ni Kalou.”
2. Na cava eso na ivunau meda nanamaki kina?
2 Veika Eda na Rogoca: Na ivunau ena Vakarauwai, “Meda Vakatakila na Yaca ni Kalou Nida Veiqaravi Vakatabakidua,” ena vakamacalataki kina na vuna e marautaki kina na cakacaka vakaitalatala vakatabakidua. Na vosa veitaravi, “Qarauna me Kua ni Vakarogorogocataki na Yaca i Jiova,” ena vukei keda meda kua ni sikalutu ena va na dai. Na taro: Na cava ena vukei keda meda gumatua tiko ga kina na vunau ke ra sega ni tataleitaki o ira eda sotava? Na cava ena vukei keda me vuavuaivinaka kina na noda cakacaka vakaitalatala? Ena saumi qori ena ivunau, “Vuna me Dokai Kina na Yaca ni Kalou.” Eda na matalau tale ga na rogoca e va na vosa veitaravi ena Sigatabu me baleta na noda rawa ni doka na yaca ni Kalou ena ka eda vakasamataka, ka eda tukuna, noda vakatulewa, kei na noda itovo. Era na marautaka na tataleitaki na ivunau, “Ena Vakalagilagia o Jiova na Yacana Cecere ena Amaketoni.”
3. Na cava na noda itavi dokai, ena vukei keda vakacava na porokaramu ni soqo ni tabacakacaka?
3 Sa na vakarau cakava e dua na ka o Jiova me vakatabui se dokai kina na yacana. (Isik. 36:23) Ia ena gauna qo, e noda itavi dokai meda qaravi Jiova ena noda vinaka taucoko da qai tokona na ka kece e kilai kina na yacana tabu. Eda nuidei ni na yaga vei keda yadua na porokaramu ni soqo ni tabacakacaka meda vakayacora kina na noda itavi bibi nida vakatokai ena yaca ni Kalou.