E iTavi Dokai na Vunautaka na Matanitu ni Kalou
1 E yaga vei ira e vica vata na bilioni na lewe i vuravura na isolisoli loloma i Jiova mera bula kina e veisiga. (Maciu 5:45) Ia e lailai wale sara era kila ni tiko nodra itavi dokai mera vakaraitaka nodra vakavinavinaka vua na Dauveibuli, oya na nodra vunautaka na itukutuku vinaka ni Matanitu ni Kalou. (Maciu 24:14) E vakacava sara mada na levu ni noda mareqeta na itavi dokai oqo?
2 Na vunautaki ni Matanitu ni Kalou e vakarokorokotaki kina na Kalou, e veivakacegui qai solia tale ga na inuinui vei ira na rarawataka tu na drakidrakita ni bula nikua. (Iper. 13:15) O ira ga na ciqoma na itukutuku oqo era na rawa ni nuitaka na bula tawamudu. (Joni 17:3) Ia na cakacaka cava e tu nikua ena rawa ni solia na inuinui oqori? Na yapositolo o Paula e mareqeta na nona cakacaka vakavunau ena sala e vakayacora kina. E raica me ka talei.—Caka. 20:20, 21, 24; 2 Kor. 4:1, 7.
3 Mareqeta Noda iTavi Dokai Oqo: Dua na sala eda na vakaraitaka kina na noda mareqeta na itavi dokai oqo, oya na noda kauaitaka na ivakatagedegede ni noda cakacaka vakavunau. E tiko beka na gauna eda dau vakarautaka kina e dua na iucu me na uqeti ira na vakarorogo? Rawa beka nida solia noda maqosa taucoko ena noda vakamacalataka na iVolatabu vei ira tale e so? Eda dau cakacakataka vakavinaka beka na yalava e lesi vei keda? E rawa beka nida tekivutaka e dua na vuli iVolatabu? Me vakataki ira ga na lotu Vakarisito yalodina era bula e liu vaka kina o ira na bula nikua, e dodonu tale ga me uqeti keda na rai dodonu ni cakacaka vakavunau, da qai mareqeta na itavi dokai oqo.—Maciu 25:14-23.
4 Ke da sa vakila tiko na leqa ni bula vaqase, tautauvimate, se so tale na ituvaki dredre, e veivakacegui dina nida kila ni mareqeti na noda sasaga meda vakaitavi ena cakacaka vakavunau. E vakadeitaka vei keda na Vosa ni Kalou ni dau kauaitaka o Jiova na noda sasaga meda qaravi koya, okati kina na sasaga lalai e rairai ra sega ni dau kauaitaka e so.—Luke 21:1-4.
5 E dau veivakacegui dina na vunautaka na Matanitu ni Kalou. E kaya e dua na tacida yalewa e yabaki 92: “Sa dua na ka talei niu railesuva na 80 vakacaca na yabaki ni noqu cakacaka ena yalodina vua na Kalou, au sega ni veivutunitaka! Keu rawa ni taleva na bula, au vinakata meu na muria ga na ivakarau ni bula au sa lakova oti mai, ‘Ni sa vinaka na loloma ni Kalou ka ca na bula.’ ” (Same 63:3) Meda vakamareqeta mada ga na itavi dokai e lesi keda kina na Kalou, oya na noda vunautaka na Matanitu ni Kalou.