Vukei Taukeinivale me Vakasama Qai Vakatulewa Vinaka
1. Na iwalewale ni vunau cava ena laulau?
1 Na iwalewale ni vunau cava ena laulau—meda suguraka ga noda ile se da vukei taukeinivale me vakasama qai vakatulewa vinaka? Ni vukei ira na Jiu e Cesalonaika na yapositolo o Paula mera vakasama ra qai vakatulewa vinaka, “era mani vakabauta eso.” (Caka. 17:2-4) Na cava e okati ena noda vukei ira eso tale mera vakasama ra qai vakatulewa vinaka?
2. Eda na vakatotomuria vakacava na ivakaraitaki i Paula nida vunautaka na itukutuku vinaka?
2 Ka Era Vakabauta, Nodra Rai: Eda na rawa ni vukei taukeinivale me vakasama qai vakatulewa vinaka ke da kauaitaka na vakabauta sa takalevu tu kei na nodra rai ena yalava. Ena itekivu ni nona ivunau ena Areopakasi, a tukuna o Paula na ka era sa rairai kila se ciqoma tu na kai Kirisi era sega ni vakabauta. (Caka. 17:22-31) Ni o vakarautaka na ka mo tukuna, vakasamataka na vakabauta sa takalevu tu kei na nodra rai na tu ena yalava. (1 Kor. 9:19-22) Ke saqata o taukeinivale na noda ivakamacala, meda tukuna e dua na ka eda duavata kina da qai yavutaka kina na veivosaki.
3. Eda na rawa vakacava ni vakayagataka vakamaqosa na taro meda vukei taukeinivale kina me vakasama qai vakatulewa vinaka?
3 Taro Vakamaqosa: Ke da sa kila rawa na vanua e yaco kina e dua na vulagi, eda na qai rawa ni vukei koya me yaco ina vanua e gole tiko kina. Eda na rawa ni vakadodonutaka tale ga na rai nei taukeinivale ke da kila rawa na nona rai. Ni bera ni vosa o Jisu vei ira na vakarorogo, e dau taro e liu me kila na nodra rai. Kena ivakaraitaki, ni tarogi koya e dua: “Na cava meu cakava meu bula tawamudu kina?,” a taroga e liu o Jisu na nona rai qai sauma na nona taro. (Luke 10:25-28) A cala tale ga na isaunitaro i Pita ena dua na gauna, mani taro vakamaqosa o Jisu me vakadodonutaka na nona rai. (Maciu 17:24-26) Ke taro o taukeinivale se cala na nona rai, eda rawa tale ga ni taro me vakasamataka kina na ka eda tukuna.
4. Na cava meda vukei taukeinivale kina me vakasama qai vakatulewa vinaka?
4 Nida vukei taukeinivale me vakasama qai vakatulewa vinaka, eda sa vakatotomuria tiko na Qasenivuli Levu o Jisu kei na so tale era maqosa na vunau ena imatai ni senitiuri. Eda vakaraitaka tale ga nida kauaitaki taukeinivale da qai dokai koya. (1 Pita 3:15) De dua ena vakadonuya o taukeinivale meda lesuvi koya tale.