Maqosa Tiko ga ena Cakacaka Vakaitalatala—Ka me Tukuni ke Bese ni Vakarorogo o iTaukeinivale

Vuna e Bibi Kina: Kaya mada ke o kila ni voleka ni yaco e dua na leqa tubukoso me vaka na cagilaba. Era na mate na lewenivanua ke ra sega ni dro ina dua na vanua mera taqomaki kina. O mani gole mo vakasalataki ira oni tiko veitikivi, ia ni o se vakamacala tiko era kaya cake mai nira osooso. E macala ga ni o na saga tiko ga mo vukei ira! Levu ena noda yalava era dau sega ni ciqomi keda, era sega ni kila ni itukutuku eda kacivaka e rawati kina na bula. Era osooso tu beka ena gauna eda sikovi ira kina. (Maciu 24:37-39) Se ra rairai sega ni taleitaki keda ena vuku ni itukutuku lasu era rogoca me baleti keda. (Maciu 11:18, 19) De dua era nanuma nida tautauvata ga kei ira na lotu nikua era sega ni vuataka na vua vinaka. (2 Pita 2:1, 2) Ke sega ni veiciqomi na itaukeinivale ena imatai ni gauna, meda saga tiko ga meda vukei ira.

Kena iWalewale:

Ni bera nida lai vunau e veivale, vakasamataka rawa eso na ka era na tukuna na itaukeinivale mera kua kina ni vakarorogo, da qai vakasamataka na ka meda tukuna ena ituvaki qori.
Ke sega ni via vakarorogo na itaukeinivale, saga vakayalovinaka me tomani na nomudrau veivosaki. De dua o rawa ni cakava qori ena nomu vakavinavinakataki koya. Kena ivakaraitaki, ke tukuna ni sa tiko nona lotu, o rawa ni kaya vua, “Au dau via sotava sara ga e dua e kauaitaka nona bula vakayalo me vakataki kemuni.” So na gauna, nida vakacaucautaki ira na itaukeinivale se na ituvaki era tu kina, e rawa ni tomani kina na veivosaki. Kena ivakaraitaki, ke tukuna ni osooso, o rawa ni kaya: “Sa donu. Ia ni bera niu gole, au na via solia vei iko qo.” Dua tale na ka eda rawa ni cakava ke sega ni via vakarorogo na itaukeinivale, oya meda tarogi koya, “Kena ibalebale oni sega ni taleitaka na iVolatabu, se oni sega ni taleitaka na lotu?”
Vakatulewa vinaka. O Jiova e sega ni dau veivakasaurarataki. (Vkru. 30:19) Eda na dui colata ga na noda icolacola vakayalo. (Kala. 6:5) Ke sega ni yalorawarawa na itaukeinivale, de vinaka meda biubiu ga. Nida doka na nona nanuma na itaukeinivale, de dua ena qai dolava nona katuba ena gauna e vunau tale yani kina e dua na dautukutuku.—1 Pita 3:15.

Tovolea Qori ena Loma ni Vula Qo:

Ni o sa biubiu mai ena dua na itikotiko a sega kina ni via vakarorogo o itaukeinivale, veivosakitaka kei koya drau cakacaka vata na ka a rawa ni tukuni vei itaukeinivale me tomani kina na veivosaki.