Me Vakasuasuataki na Sorenikau me Rawa ni Tubu
1. Na cava me vakasuasuataki me rawa ni tubu?
1 Me tubu na sorenikau, e dodonu me vakasuasuataki. E va tale ga qori na sore ni ka dina e teivaki e lomadra era tiko ena noda yalava. (1 Kor. 3:6) E dodonu meda veisikovi lesu da qai vakayagataka na iVolatabu me vakasuasuataka na sorenikau vakaivakatakarakara ke da vinakata me kadre, tubu qai vua.
2. Na cava meda cakava meda rawa ni veisikovi lesu?
2 Taro: Ni o vakavakarau, vakarautaka tale ga e dua na taro vakavure vakasama mo qai sauma ena nomu veisikovi lesu. Mo taroga qori ni o vakarau biubiu ena imatai ni gauna drau veivosaki kina qai vakadeitaka mo sikovi koya lesu ena siga o lokuca. Era raica e levu ni vinaka mera digia e dua na ulutaga ena ivola Kaya na iVolatabu me rawa nira vakaraitaka kina na sala me vulici kina na iVolatabu.
3. Na cava soti o rawa ni vola ni oti ga na nomudrau veivosaki ena imatai ni gauna?
3 Vola: Ni oti ga na nomudrau veivosaki ena imatai ni gauna, vola na yacana, nona itikotiko, na gauna kei na siga drau veivosaki kina, ka drau veitalanoataka, kei na ivola o solia. E lewe beka ni dua na lotu? E vakavuvale? E tukuna na ka e taleitaka se kauai kina? Qori eso na ka e rawa ni yavutaki kina na nomudrau veivosaki ni o sikovi koya lesu. Mo vola tale ga na siga o na sikovi koya kina kei na taro drau na veivosakitaka.
4. Na cava meda lesuvi ira tiko ga kina na tataleitaki?
4 Kua ni Soro: Ena sega ni cegu o Setani me “kauta tani na vosa” e kaburaki ena lomana e dua. (Mari. 4:14, 15) Mo kua gona ni soro ke dau yali o tataleitaki ni o sikovi koya lesu. O rawa ni vakauta e dua na ivola se vola vakalekaleka e dua na itukutuku qai biuta ena ruku ni nona katuba. A tekivuna e dua na painia na vuli iVolatabu ena imatai ni gauna a sikova kina e dua na marama, ia a sega ni kunei koya tale e vale mani vakauta e dua na ivola. Ena gauna erau sota kina ena nona vale, a tarai koya sara ga na marama oya na nona kauai na tacida. Nida vakasuasuataka na sore ni ka dina, eda na marau nida raica nira tubu mera matua, “eso e tolusagavulu na vuadra, eso e onosagavulu, eso tale e drau.”—Mari. 4:20.