Kato ni Taro

◼ O cei me vakalewena na fomu se me kerekere ena Internet?

E dau biu ena noda ivola na fomu e rawa ni vakalewena e dua qai vakauta ina valenivolavola ni tabana me kerea kina na ivola se me sikovi koya e dua na iVakadinadina i Jiova. E rawa ni vakayagataki tale ga na web site na www.watchtower.org me kerea kina e dua me vuli iVolatabu. Qori na ivukevuke era sa vulica tiko kina na ka dina e levu. Ia sa dau yaco na leqa nira vakayagataka na dautukutuku na ivukevuke qori mera vukei kina vakayalo na wekadra kei na so tale.

Era kudruvaka eso ni vakau yani vei ira na ivola era sega ni kerea, era nanuma ni vakasosani ira na isoqosoqo i Jiova, sa rai tu tale ga na yacadra ena lisi me dau vakauta vei ira na isoqosoqo na ivola. Era sega ni dau taleitaka tale ga eso na nodra sikovi yani nira sega ni kerea, era madua ga kina na dautukutuku era kerei mera lai raici ira qori. O koya gona mera vakalewena ga na tataleitaki na fomu se kerekere ena web site, mera kua ni cakava ena vukudra na dautukutuku. Ke kila na valenivolavola ni tabana ni kerekere yani e dua na dautukutuku ena vukuna e dua tale, ena sega ni cakava kina e dua na ka.

Na cava o rawa ni cakava ke o via vukea vakayalo e dua na wekamu se nomu itokani? Ke o vinakata me dua na nona ivola, vakauta vakailoloma vua. Ke taleitaka me sikovi koya e dua na iVakadinadina o qai sega ni kila mo veitaratara vakacava kei ratou na qase ni ivavakoso ena vanua e tiko kina, vakalewena na fomu Kerekere me Lai Sikovi (S-43) qai solia vua na vunivola ni ivavakoso o lewena me raica ni bera ni vakauta ina valenivolavola ni tabana. Ia ke tiko o tataleitaki e valeniveivesu, vanua era dau qaravi kina na vakayagataka vakasivia na wainimate gaga se na valenibula ni matanitu, kua ni qiri se volavola ina valenivolavola ni tabana ena vukuna na tataleitaki qori. Kerei koya ga me veivosaki kei ira na tacida era dau veisiko yani ena vanua e tiko kina se me volavola sara ga ina valenivolavola ni tabana.