Kua ni Lokuyara

Ni sa vakavoutaki na noda Web site, e levu era sa kerea mera vuli iVolatabu. Eso tale era kerea mera vuli iVolatabu ni tauyavutaki na iwalewale vou ni vunau e matanalevu. Ena qarava vakatotolo na kerekere qori na valenivolavola ni tabana. Kena ivakaraitaki ke sa caka na kerekere ena jw.org, era na ciqoma na qase ni ivavakoso era tiko ena nona yalava na tataleitaki e dua na ivola ni veivakadeitaki mai na valenivolavola ni tabana ni oti ga e rua na siga. E laurai mai na so na ripote ena yalava, ni so era kerea mera vuli iVolatabu, ia era se bera tu ga ni sikovi ni oti e vica na macawa. Eda na vakadeitaka vakacava me vukei o koya e via vuli iVolatabu ni bera ni seavu nona tataleitaki?—Mari. 4:14, 15.

Ke dua e tataleitaki qai sega ni tiko ena nomu yalava, mo vakalewena vakatotolo na fomu Kerekere me Lai Sikovi (S-43) qai solia vua na vunivola ni ivavakoso ena soqoni ga e tarava. Ena loma ga ni dua se rua na siga, e dodonu vua na vunivola me vakauta na fomu qori ina ivavakoso e qarava na yalava e tiko kina na tataleitaki se ina valenivolavola ni tabana ni vakayagataka na jw.org. E bibi vei ira na qase mera rai wasoma ena noda Web site. Ke ra ciqoma na qase na fomu ni kerekere me sikovi e dua, mera raica sara me sikovi totolo o ira qori. Ni dua na dautukutuku e kerei me raica na tataleitaki, e dodonu me taura vakabibi. Ke sega ni tiko e vale o koya e tataleitaki, me qai biuta toka eso na itukutuku kei na sala me rau qai veitaratara kina.