Lalawataka qo mo Vakalevutaka Nomu Cakacaka Vakaitalatala

1. Na cava na ka bibi e dau caka ena vula ni iVakananumi, o na vakarautaki iko vakacava?

¹ E gauna vinaka meda “vakavinavinaka vakalevu vei Jiova” na vula ni iVakananumi e veiyabaki. (Same 109:30) O na rawa ni vakalevutaka nomu cakacaka vakaitalatala ena vula o Maji, mo vakaraitaka kina na nomu vakavinavinakataki koya a vakarautaka na ivoli? Meda lalawataka sara ga qo na ka meda cakava.—Vkai. 21:5.

2. Na cava o a vakila kei ira tale eso e veiyasa i vuravura ena ituvatuva me vakalailaitaki na aua ni painia veivuke ena vula o Epereli ni yabaki sa oti?

² Painia Veivuke: Ena yabaki sa oti e levu na ivavakoso era marautaka na kena kacivaki ni na vakalailaitaki na aua ni painia veivuke ena vula o Epereli. A vola e dua na tacida tagane: “Au se vuli tiko ena sekeneri ia au sega ni rawa ni painia tudei. Au na vakalewena na fomu ni painia me 30 ga na aua qai saga meu yacova e 50 na aua ena vula o Epereli.” A vola e dua na tacida yalewa e cakacaka saumi: “E rawarawa sara me rawati e 30 na aua!” Na gauna e kacivaki kina na ituvatuva vou qo, a kaya e dua na marama a painia tu e liu, sa yabaki 80 vakacaca nikua: “Qo sara ga na gauna au waraka tiko! E kila o Jiova ni gauna vinaka duadua ni noqu bula na gauna au painia tu kina!” O ira era sega ni rawa ni painia veivuke e nodra isausau mera vakalevutaka nodra cakacaka vakaitalatala.

3. Na cava eso na vuna meda saga meda painia veivuke kina ena vula o Maji, Epereli kei na Me?

³ E vula vinaka ni painia veivuke na vula o Maji nida rawa ni digitaka meda rawata e 30 se 50 na aua. Kena ikuri, ena Vakarauwai, 17 Maji eda na vakaitavi tiko ena dua na veisureti lavotaki mera sureti eso tale mera tomani keda ena iVakananumi ena 5 Epereli. E levu era na marautaka na nodra vakalevutaka nodra cakacaka vakaitalatala era na vinakata mera painia veivuke tale ga ena vula o Epereli kei na Me, ia mera rawata e 50 na aua.

4. Sala cava eda rawa ni vakalevutaka kina noda cakacaka vakaitalatala, na cava eda na vakila?

⁴ Ena nomudou Sokalou Vakavuvale tarava, vakacava mo dou veivosakitaka na sala dou rawa ni vakalevutaka kina nomudou cakacaka vakaitalatala ena vula ni iVakananumi? (Vkai. 15:22) Dou kerei Jiova me vakalougatataka na nomudou sasaga. (1 Joni 3:22) Ni o saga mo vakalevutaka nomu cakacaka vakaitalatala o na vakacaucautaki Jiova, o na marau tale ga vakalevu.—2 Kor. 9:6.