O na Painia Veivuke?
1. Na cava e gauna vinaka kina meda vakarabailevutaka na noda cakacaka vakaitalatala ena vula ni iVakananumi?
1 Na vula ni iVakananumi e gauna vinaka meda vakarabailevutaka kina na noda cakacaka vakaitalatala. Qori na gauna meda vakasamataka kina na loloma levu i Jiova ena nona soli Luvena me ivoli. (Joni 3:16) Eda vakavinavinakataka dina na ka e cakava ena vukuda o Jiova, qori e uqeti keda sara ga meda tukuni koya vei ira tale eso kei na ka e cakava tiko vei keda na tamata. (Aisea 12:4, 5; Luke 6:45) E gauna vinaka tale ga meda vakaitavi ena veisureti lavotaki, meda sureti ira noda veikilai kei na so tale ena yalava mera tiko tale ga ena iVakananumi. Ni oti na soqo, eda na saga me tomani na veivosaki kei ira na tataleitaki era tiko kina. Vakacava o na vakarabailevutaka na nomu cakacaka vakaitalatala ena nomu painia veivuke ena Maji, Epereli se Me?
2. Na cava e vula vinaka kina ni painia veivuke na Maji?
2 Me Vula Lavotaki na Maji: E vula vinaka dina ni painia veivuke o Maji. O ira na via painia veivuke e rawa nira digia mera rawata na 30 se 50 na aua e lavaki. Ke veisiko mai na ivakatawa ni tabacakacaka ena vula o Maji, e rawa vei ira na painia veivuke mera tiko tale ga ena nodra bose na painia tudei kei na painia lavotaki me yacova sara ni oti. Ena yabaki qo na iVakananumi ena vakayacori ena Tusiti, 26 Maji, 2013, sa vakabalavutaki tale ga na veisureti ina iVakananumi ni na tekivu tiko ena 1 Maji. E lima tale tiko ga na muanimacawa ena Maji. Vakacava mo vakasamataka vakabibi ke rawa ni o tokona na veika e tuvanaki me rawa ni vula lavotaki kina ena yabaki qo na Maji.
3. Na cava meda cakava meda vakalevutaka kina na noda cakacaka vakaitalatala?
3 Lalawa Rawa Qo: Qo na gauna mo railesuva kina na nomu ituvatuva qai raica se veisau cava mo cakava mo rawa ni painia. Ena vinakati na nodra veitokoni e vale, mo dou veivosakitaka vinaka gona ena nomudou bogi ni Sokalou Vakavuvale na isausau vakavuvale qai biuta e dua na ituvatuva. (Vkai. 15:22) Ke o sega ni rawa ni painia veivuke, kua ni yalolailai. Vakacava o rawa ni veisautaka na nomu ituvatuva, me dede tale vakalailai na nomu cakacaka ena siga o lai vunau kina? O rawa ni tuvanaka e dua tale na siga ena loma ni macawa mo vakaitavi kina ena cakacaka vakavunau?
4. Eda na vakalougatataki vakacava nida vakalevutaka na noda cakacaka ena Maji, Epereli kei na Me?
4 Nida vakalevutaka na noda cakacaka ena Maji, Epereli kei na Me, eda na marau qai lomavakacegu vakalevu ena noda qaravi Jiova kei na noda solika vei ira na so tale. (Joni 4:34; Caka. 20:35) E bibi sara ni na marautaka o Jiova na noda dau vakuai keda.—Vkai. 27:11.