Marautaka Nomu Vakavakarau ina iVakananumi
1. Na cava e gauna vinaka kina na iVakananumi?
1 Na iVakananumi ena Tusiti, 26 Maji, e gauna vinaka meda marautaka kina na veika e cakava na Kalou me baleta na noda vakabulai. (Aisea 61:10) Ni bera mada ga na soqo qori, na marau ena uqeti keda meda vakavakarau vinaka. E rawa vakacava qori?
2. Na cava ena uqeti keda meda vakavakarau ina iVakananumi?
2 Vakavakarau ena Soqo: Na iVakayakavi ni Turaga e soqo bibi qai rawarawa na ka e caka kina. Ia e se bibi ga na lalawa vakailiu me vakarautaki kina na ka kece e gadrevi me baleta na soqo. (Vkai. 21:5) E dodonu me digitaki na gauna kei na vanua veiganiti ni soqo. Me donu na madrai kei na waini e vakayagataki. Me samaki qai vakarautaki rawa na vanua ni soqo. O koya e lesi me vunau e dodonu me vakavakarau vinaka, mera kila tale ga na ka mera cakava o ira na dauveivukei kei ira era na veisoliyaka na madrai kei na waini. Sa rairai vakayacori oti e levu na ka qori. Na noda vakavinavinakataka na ivoli e vakarautaki meda vakabulai kina ena uqeti keda meda vakavakarau vinaka ena soqo bibi qo.—1 Pita 1:8, 9.
3. Eda rawa ni vakarautaka vakacava na lomada ena iVakayakavi ni Turaga?
3 Vakarautaka na Lomada: E bibi tale ga meda vakarautaka na lomada meda kila kina na ibalebale ni iVakananumi. (Esera 7:10) Eda rawa ni cakava qori ena noda tuvanaka sara ga na gauna meda dikeva kina na tikinivolatabu ni iVakananumi da qai vakasamataka vakatitobu na iotioti ni vica na siga a bula kina e vuravura o Jisu. Na noda vakasamataka vakatitobu na nona vakuai koya o Jisu ena uqeti keda meda vakatotomuri koya.—Kala. 2:20.
4. Na cava o marautaka vakalevu duadua me baleta na yaga ni ivoli?
4 Na nona mate na Karisito e vakacerecerei kina na veiliutaki i Jiova. Ena sereki keda mai na ivalavala ca kei na mate. (1 Joni 2:2) E rawa nida veiyaloni kina kei na Kalou qai dolava na sala ina bula tawamudu. (Kolo. 1:21, 22) Ena vakaukauataki keda meda vakayacora na noda yalayala vei Jiova da qai muri Karisito tiko ga. (Maciu 16:24) Mo marautaka mada ga vakalevu na nomu vakavakarau kei na nomu tiko ena iVakananumi eda vakanamata tu kina qo!