Vukei Ira na Tamata Mera Vakarorogo Vua na Kalou

1. Na brochure cava a sevutaki ena Soqo ni Tikina “Me Yaco Mai na Matanitu ni Kalou!”? Na cava e yaga kina na brochure qori?

¹ A sevutaki e rua na brochure vou ena Soqo ni Tikina “Me Yaco Mai na Matanitu ni Kalou!” Vakarorogo Vua na Kalou mo Bula Tawamudu kei na dua tale na kena itabataba rawarawa, Vakarorogo Vua na Kalou. E rawarawa qai totolo na kena vakadewataki ni sega ni levu sara na ka e volai kina. Ena gauna e sevutaki kina na brochure Vakarorogo Vua na Kalou mo Bula Tawamudu, e vakadonui me na vakadewataki ena 431 na vosa.

2. E yaga vei cei na brochure?

² E baleti cei sara mada na brochure qo? Dikeva mada na ituvaki qo e sotavi vakalevu e veiyasa i vuravura:

• E dua na dautukutuku e veitalanoa kei taukeinivale ena imatai ni gauna ena cakacaka vakavunau se veisikovi lesu, e siqema ni sega ni kila o taukeinivale na wilivola se volavola, se sega ni vinaka nona wilivola.

• E vunau tiko e dua na dautukutuku vei ira era vosataka na vosa e sega ni tabaki kina vakalevu na noda ivola se sega sara ga. Se levu ena yalava era sega ni wilika rawa na ivola e tabaki ena vosa era kila vinaka.

• E vosa vagalu e dua na dautukutuku ni vunau vua e dua na didivara ena yalava.

• E vinakata e dua na itubutubu me vakavulica na ka dina vei luvena e se sega ni kila na wilivola.

3. A vakarautaki vakacava na brochure Vakarorogo Vua na Kalou?

³ Kena Vakarautaki: E sega ni levu na ka e volai ena brochure Vakarorogo Vua na Kalou, e dua ga na yatuvosa rawarawa kei na dua na tikinivolatabu e toka sara e ra ena tabana yadua e laurai kina na tikina bibi. Na cava na vuna? Raitayaloyalotaka mada ke solia vei iko e dua na brochure e volai tu ena vosa o sega ni rawa ni wilika, de dua o se qai raica vakadua na kena matanivola. O na wilika na ivola qori ke o raica mada ga kina eso na iyaloyalo totoka? De dua o na sega ni via wilika. E va tale ga qori o ira era sega ni kila na wilivola, era sega ni taleitaka na ivola e volai kina e levu na ka. Ia e vakarautaki vinaka na iyaloyalo kece e laurai ena brochure qo, e tiko tale ga na idusi me dewa kina na veivosaki mai na dua na iyaloyalo ina dua tale.

4. Na cava o na raica ena brochure Vakarorogo Vua na Kalou mo Bula Tawamudu?

⁴ E tautauvata ga na iyaloyalo ena brochure Vakarorogo Vua na Kalou mo Bula Tawamudu kei na Vakarorogo Vua na Kalou. Na inaki ni ivola ruarua qo mera vakavulici kina o ira era sega ni wilivola vinaka se ra vuli wilivola tiko. E rawa ni vakayagataka tale ga o qasenivuli na brochure Vakarorogo Vua na Kalou mo Bula Tawamudu ni vakavulica tiko e dua ena brochure Vakarorogo Vua na Kalou. Na lesoni yadua e rua na tabana, e toka sara e cake ena yasana imawi na taro ena saumi tiko ena lesoni ya. Na iyaloyalo kece e tiko kina e dua na ivakamacala kei na tikinivolatabu e sega ni lavetaki. E tiko ena levu na tabana ena brochure e dua na kato e kata na rokana, qori eso tale na ikuri ni ivakamacala kei na tikinivolatabu e rawa ni veivosakitaki, ena vakatau ena kena ituvaki o gonevuli.

5. Gauna cava e rawa ni soli kina na brochure, ena soli vakacava?

⁵ Sala me Vakayagataki Kina: E rawa ni soli na brochure ena vunau e veivale ke veiganiti me soli, ke sega mada ga ni tuvanaki me soli ena vula qori na brochure. (Raica na kato “Sala me Soli Kina.”) O rawa ni vakayagataka ena veisikovi lesu ena nomu kaya vei tataleitaki ni o via solia vua e dua na ka, solia sara vua na brochure.

6. Eda na vakayagataka vakacava na brochure ruarua meda vakavulica kina e dua ena iVolatabu?

⁶ Ni sega ni volai na taro ena brochure Vakarorogo Vua na Kalou, ena sega ni veitarotarogitaki me vaka na kena dau vulici na ivola Kaya na iVolatabu. Ena levu na vanua era taleitaka na tamata mera rogo italanoa. Mo vakayagataka gona na iyaloyalo ena brochure qori mo talanoataka kina na itukutuku uqeti vakalou ena iVolatabu. Vakamacalataka na iyaloyalo. Me bulabula na nomu ivakamacala. Kerea vei gonevuli me vakamacalataka na ka e raica se nanuma. Wilika na tikinivolatabu e volai toka e ra ena tabana yadua, drau qai veivosakitaka na ka e tukuni ena tikinivolatabu qori. Mo dau taro me rawa ni vakaitavi o gonevuli, mo rawa ni kila tale ga se sa taura rawa o koya na ka e vulica se sega. Ke vakayagataka tiko o koya na brochure Vakarorogo Vua na Kalou mo Bula Tawamudu, drau wilika vata na yatuvosa kei na tikinivolatabu ni drau veivosakitaka na iyaloyalo yadua.

7. Eda na vukei noda gonevuli vakacava me toso?

⁷ Vukei Gonevuli me Toso: De dua ena uqeti gonevuli na nomudrau veivosaki me vulica na wilivola me vulica kina vakataki koya na veika me baleti Jiova. (Maciu 5:3; Joni 17:3) Koya gona ni drau veivosakitaka tiko na ivola Vakarorogo Vua na Kalou, o na rawa ni vukei koya me wilivola ni o raica ni sa veiganiti, oti drau rawa ni dewa sara ena kena vulici na brochure Vakarorogo Vua na Kalou mo Bula Tawamudu. Se mani brochure cava drau vakayagataka, ena sega ni rawa ni papitaiso o gonevuli ni drau sa vulica oti na brochure qori. Me na dewa na vuli ena ivola Kaya na iVolatabu se dua tale na ivola veiganiti ena rawa ni vukei koya me kila vakavinaka na iVolatabu.

8. Na cava o vakavinavinakataka kina na iyaragi vou e vakarautaki me baleta na cakacaka vakaitalatala?

⁸ E dodonu mera vakarorogo na tamata vua na Turaga Cecere Duadua ni lomalagi kei vuravura ke ra via bula tawamudu. (Aisea 55:3) E loma i Jiova mera bula “na veimataqali tamata kece,” o ira tale ga era sega ni kila na wilivola mera vulica na sala mera vakarorogo kina vua. (1 Tim. 2:3, 4) Eda vakavinavinakataka dina na iyaragi vou qo eda rawa ni vakayagataka meda vakavulici ira kina na tamata ena sala mera vakarorogo kina vua na Kalou!

[Kato ena tabana 3]

Sala me Soli Kina

Vakaraitaka vei taukeinivale na tabana e 2-3, qai kaya: “O via bula ena dua na vuravura va qo? [Waraka me sauma.] E yalataki tu ena iVolatabu ni sa vakarau veisautaka na vuravura qo na Kalou me dua na vanua totoka qai vakilai kina na vakacegu, ena sega kina na dravudravua kei na tauvimate. Raica mada na ka meda cakava meda bula kina ena vuravura ya. [Wilika Aisea 55:3, ena tabana e 3.] E tukuni ena tikinivolatabu qori meda ‘lako vua na’ Kalou qai ‘vakarorogo’ vua. Ia eda na vakarorogo vakacava vua na Kalou?” Cega na tabana e 4-5 qai veivosakitaka kei taukeinivale na kena isau. Ke osooso o taukeinivale, solia vua na brochure qai lokuca na gauna mo lesuvi koya kina mo drau veivosakitaka na isau ni taro.