Soqoni ni Cakacaka Vakavunau

1. Na cava eda kauaitaka kina me tuvanaki vinaka noda cakacaka vakavunau?

¹ E ivakaraitaki o Jisu ena iwalewale yaga e tuvanaki matau kina na vunautaki ni Matanitu ni Kalou. O ira tale ga na liutaka na cakacaka vakavunau e vuravura raraba nikua, era saga mera muria na iwalewale ya. E yaga gona na kena tuvanaki na soqoni ni cakacaka vakavunau meda vakarautaki kina na daukacivaka na Matanitu ni Kalou.​​—⁠Maciu 24:​45-​47, VV; 25:21; Luke 10:​1-7.

2. Na cava me caka ena soqoni ni cakacaka vakavunau?

² iTuvatuva Yaga: E yaga na soqoni qo meda vakayaloqaqataki, meda vakavulici kina ena iwalewale ni vunau. Ke salavata na tikinivolatabu ni siga ya kei na cakacaka vakaitalatala, me veivosakitaki ga vakalekaleka. E rawa ni veivosakitaki ena so na gauna na vakatutu ena Noda Cakacaka Vakaitalatala, ivola na Reasoning, se Vuli Vunau. Rawa tale ga ni vakatasuasuataki vakalekaleka na ivola e soli. Me sa kilai rawa tu o cei eda na cakacaka vata kei na yalava ena cakacakataki ni bera ni tini na soqoni ni cakacaka vakavunau ena masu. Me 15 ga na miniti na soqoni, oti meda lako sara ena yalava.

3. O cei ena tuvanaka na soqoni ni cakacaka vakavunau?

³ Tuvanaki ni Cakacaka. Na ivakatawa ni cakacaka ena tuvanaka na soqoni ni cakacaka vakavunau. Ena muanimacawa, e nodra itavi sara ga na ivaka­tawa ni iwasewase lailai se nodra ivukevuke mera cakacaka vata kei na iwasewase lailai era qarava. De dua era rawa ni veitomani ena vunau ena lomanimacawa eso na ivakatawa se so na dauveiqaravi ni ivavakoso. Me veirauti na yalava era cakacaka kina ena muanimacawa, e vinaka mera na cakacaka vakavoleka sara na ivakatawa ni iwasewase lailai kei na ivakatawa ni cakacaka. Ena tuvanaka na ivakatawa ni cakacaka o cei me liutaka na cakacaka vakavunau ena lomanimacawa.

4-6. (a) Ena yaga vakacava na soqoni ni cakacaka vakavunau ena tarai ni yalava ni ivavakoso? (b) Na cava me vakasamataki me kilai kina na gauna kei na vanua ni soqoni ni cakacaka vakavunau?

⁴ Gauna kei na Vanua me Vakayacori Kina. Mera kua ni sota na lewe ni ivavakoso kece ena dua ga na vanua. E vinaka me vakayacori na soqoni ni cakacaka vakavunau ena vanua e veiganiti, vakauasivi ena nodra vale na mataveitacini era tiko ena yalava, me rawa ni cakacakataki vinaka kina na yalava. E rawa tale ga ni vakayacori qo ena Kingdom Hall. Levu na ivavakoso era dau cakava ya ni oti ga vakalailai na vunau soqovi levu kei na vulici ni Vale ni Vakatawa ena Sigatabu. E vinaka me kua ni yawa na yalava ni vunau mai na vanua ni sota. Me dikevi gona vakawasoma na ituvatuva ke se veiganiti tiko ga na vanua ni sota ena cakacakataki vinaka ni yalava.

⁵ Na gauna vinaka me vakayacori kina na soqoni, me vakavica ena dua na macawa se na siga me caka kina, e vakatau ena yalava e cakacakataki. De dua me vakasamataki na taro era toka e ra, me kilai kina na vanua kei na gauna vinaka me vakayacori kina na soqoni ni cakacaka vakavunau.

⁶ Na yalava cava ena gadrevi kina eso na veisau? Gauna cava e vinaka kina na vunau e veivale? Me tuvanaki beka na vunau e veivale se na veisikovi lesu ena yakavi? Na ituvatuva kece ni cakacaka vakavunau me kabi ena papa ni itukutuku ni ivavakoso. Eda vinakata na dautukutuku kece meda cakacakataka vinaka sara na yalava eda lesi kina, ena kena ivakatagedegede me rawa nida tukuna tale ga na nona vosa na yapositolo o Paula: “Sa oti na noqu cakacaka e na yasayasa oqo.”​​—⁠Roma 15:​23, VV.

7. Na cava e nona itavi o koya e lesi me liutaka na cakacaka vakavunau?

⁷ Liutaki ni Soqoni: Ena vakaraitaka o koya e lesi me liutaka na soqoni ni doka na ituvatuva qo, ke vakavakarau vinaka. Ni vakayacori ena loma ga ni 10 ina 15 na miniti, dodonu gona me tekivu ena kena gauna, me yaga, qai lekaleka. Me sa kila rawa tiko o koya e liutaka na soqoni na yalava ni cakacaka. Ni sa oti na soqoni e sega ni gadrevi mera waraki na bera, me biu toka ga e dua na itukutuku me baleta na vanua e cakacakataki. Me kua na vakaoti gauna, meda lako sara ena yalava ni oti ga na soqoni. Ke tuvanaki vinaka qai yaga na soqoni, era na vakarautaki vinaka na lai vunau ena siga ya.​​—⁠Vkai. 11:⁠14.

8. Eda na vakaraitaka vakacava na tiko ena soqoni ni cakacaka vakavunau nida tokoni ira na liutaka?

⁸ Tokona na Soqoni: E bibi na veitokoni. (Iper. 13:17) Ke sega ni dua drau cakacaka vata, ena tuvanaka qori o koya e liutaka na cakacaka. E vinaka mera dau tiko na dautukutuku matua me rawa nira cakacaka vata kei ira na dautukutuku vou se o ira era se sega ni matau ena cakacaka qo. Ena yaga tale ga vakalevu nodra lomasoli eso me veiveisau o ira era cakacaka vata. (Vkai. 27:17; Roma 15:​1, 2, VV) Meda saga kece meda dau yaco totolo yani. Eda na cakava qori ke da doka na ituvatuva vakalou qo da qai nanumi ira na tacida.​​—⁠2 Kor. 6:​3, 4; Fpai. 2:⁠4.

9. E yaga vakacava nodra tokona na painia na ituvatuva qo?

⁹ Nodra Veitokoni na Painia: E yaga qai veivakayaloqaqataki vei keda kece nira tokona na painia na soqoni ni cakacaka vakavunau. E levu dina na nodra icolacola na painia. Sega ni caka vuli iVolatabu ga kei na veisikovi lesu, ia e rairai oka ena nodra ituvatuva e veisiga na qaravi ni nodra vuvale kei na nodra cakacaka saumi. Mera kua gona ni nanuma na painia ni vinakati mera tiko ena soqoni kece ni cakacaka vakavunau e tuvanaka na ivavakoso, vakauasivi ke caka e veisiga. Ia era rawa ni tokona na painia e vica na soqoni qo e veimacawa. Qo e dua na sala eda vakavulici kina na lewe ni ivavakoso. Ena yaga kina vakalevu na nodra kilaka vakaivolatabu na painia, kei na nodra maqosa ena iwalewale ni cakacaka vakaitalatala. Era maqosa ena cakacaka qo nira cakava wasoma. Qo e rawa nida vuli kina eso tale. Meda vakatotomuria nodra gugumatua ena cakacaka vakaitalatala kei na nodra dau tiko ena soqoni ni cakacaka vakavunau. Na nodra dau vakaitavi ena soqoni qo e marautaki vakalevu.

10. Na cava meda tokona kina mai vu ni lomada na ituvatuva qo?

¹⁰ Levu na ka e rawati ena vunautaki ni Matanitu ni Kalou ena vunau e veivale me vaka ga a cakava o Jisu kei ira nona imuri. Na inaki ni soqoni ni cakacaka vakavunau meda vakayaloqaqataki, me laulau tale ga na iwalewale ni noda vunau. Meda tokona kece mai vu ni lomada na dau kacivaka na itukutuku vinaka na ituvatuva vakalou ya. (Caka. 5:​42; 20:20) Ke da cakava qori, ena tokoni keda o Jiova, ena marau tale ga na noda iLiuliu o Jisu Karisito nida vunautaka na itukutuku vinaka ni Matanitu ni Kalou.​​—⁠Maciu 25:​34-​40; 28:​19, 20, VV.