Vakatotomuria na iVakaraitaki i Maika
1. Na taro cava a rairai vakasamataka o Maika, ia cava a yaga kina na nona vunau?
1 ‘Gauna cava ena takali kina na ituvaki ca kei vuravura qo?’ A rairai vakasamataka tale ga na taro va qori na parofita o Maika ena nona kacivaka voli na itukutuku ni veivakarusai i Jiova ena matanitu o Isireli kei Juta. Ia a yaga na nona vunau. Ena gauna se bula voli kina o Maika ena 740 B.S.K., sa qai vakayacori na vosa i Jiova vei Samaria. (Maika 1:6, 7) E muri sa qai vakarusai o Jerusalemi ena 607 B.S.K. (Maika 3:12) Eda na vakatotomuri Maika vakacava nida waraka tiko na nona mai tauca o Jiova nona lewa ena noda gauna?
2. Eda na vakaraitaka vakacava na vosovoso nida waraka tiko na siga i Jiova, cava e bibi kina qori?
2 Meda Vosovoso: E vola o Maika: “Koi au, ka’u na rai ga vei Jiova; ka’u na waraki koya na Kalou, na noqui vakabula.” (Maika 7:7) Ni waraka voli na icavacava o Maika, a sega ni vakasavuliga. Me vaka ni parofita i Jiova, a ogaoga tiko ga. Nida waraka tiko na siga i Jiova, e dodonu tale ga meda ogaoga ena ‘ivalavala dodonu kei na qaravi Kalou.’ (2 Pita 3:11, 12) E se vosovoso tiko o Jiova me rawa nira veivutuni na lewenivanua. (2 Pita 3:9) Koya gona, meda muria mada ga na ivakasala vakalou ena noda vakatotomuria na nodra dau vosovoso na parofita.—Jeme. 5:10.
3. Na cava meda kerea kina vakawasoma na yalo tabu i Jiova?
3 Nuitaka na Kaukaua i Jiova: E sega ni rawarawa na ilesilesi i Maika, ia e nuitaka na kaukaua i Jiova me qarava kina nona itavi. (Maika 3:8) Sa rauta me uqeti keda na iVolatabu meda nuitaka na kaukaua i Jiova. E solia vakayalololoma na nona kaukaua vei ira sa oca me rawa nira qarava na nodra itavi vakalou. (Same 84:5, 7; Aisea 40:28-31) Vakacava o vakadinadinataka qori ena nomu veiqaravi tabu? O dau kerea wasoma na veivuke ni yalo tabu i Jiova me vakaukauataki iko?—Luke 11:13.
4. E ivakaraitaki vinaka vakacava vei keda nikua na ivakarau ni bula i Maika?
4 A vakaliuca tu ga o Maika na vakayacori ni loma ni Kalou ena nona bula. O Maika e maliwai ira na tamata e ca nodra itovo, ia a vakadeitaka me yalodina tiko ga. E vakatovolei tale ga e veisiga na noda yalodina. Koya gona, meda vakadeitaka nida na “muria ga na yaca i Jiova na noda Kalou ka sega ni mudu ka sega ni mudu.”—Maika 4:5.