O na Vakayagataka Vakavinaka na Gauna?
Sa Voleka na iVakananumi Meda Vakaraitaka Kina Noda Vakavinavinaka
1. Na cava e rawa nida cakava ena gauna ni iVakananumi?
1 Na iVakananumi ena ika14 ni Epereli e gauna vinaka meda bucina da qai vakavinavinakataka kina na yalovinaka i Jiova. E volatukutukutaki ena Luke 17:11-18 na nodrau rai o Jiova kei Jisu me baleta na vakavinavinaka. E ka ni rarawa ni dua ga vei ratou na le tini na vukavuka e vakavinavinakataka na nona vakabulai. Ia ena vuku ni dra i Jisu, ena vakaoti vakadua na tauvimate kece ena veigauna e se bera mai, sa na qai yaco dina na bula tawamudu! Macala ga ena gauna ya, eda na vakavinavinakataki Jiova e veisiga ni vakarautaka na veivakalougatataki va qori. Ia eda na vakaraitaka vakacava na noda vakavinavinaka ena vica na macawa mai qo?
2. Na cava eda rawa ni cakava meda vakavinavinakataka kina na isoro?
2 Bucina na Yalo ni Vakavinavinaka: E bucini na yalo ni vakavinavinaka ena ka eda vakasamataka. E vakarautaki na ituvatuva ni wili iVolatabu ni iVakananumi me rawa nida vakavinavinakataka tiko ga kina na isoro, e rawa ni laurai qori ena ivola na Dikeva na iVolatabu e Veisiga se na noda ivolanivula ni 2014. Vakacava mo dou raica vata vakavuvale? Nida cakava qori, eda na vakavinavinakataka kina vakalevu na isoro. Ena rawa tale ga ni vakavinakataka na noda itovo.—2 Kor. 5:14, 15; 1 Joni 4:11.
3. Na sala cava soti eda na vakaraitaka kina na noda vakavinavinaka ena gauna ni iVakananumi?
3 Vakaraitaka Nomu Vakavinavinaka: Ena laurai na noda vakavinavinaka ena ka eda cakava. (Kolo. 3:15) A saga vagumatua na turaga tauvi vukavuka me vaqarai Jisu me vakavinavinakataka na nona vakabulai. A talanoataka tale ga na nona vakabulai. (Luke 6:45) Nida vakavinavinakataka na isoro i Jisu, vakacava ena uqeti keda qori meda veisureti vagumatua ena iVakananumi? Dua tale na sala eda na vakaraitaka kina noda vakavinavinaka, oya noda painia veivuke se noda vakaitavi vakalevu ena cakacaka vakaitalatala ena gauna ni iVakananumi. Eda na vakaraitaka na noda vakavinavinaka ena yakavi ni iVakananumi, ena noda kidavaki ira na vulagi era gole yani da qai tu vakarau meda sauma na nodra vakatataro.
4. Na cava eda na cakava meda kua kina ni veivutunitaka na iVakananumi qo?
4 Sa iotioti beka ni iVakananumi na yabaki qo? (1 Kor. 11:26) Eda sega ni kila qori. Ia eda kila ga ke sa kena iotioti qori, sa na sega tale ni dua na gauna meda na vakaraitaka kina na noda vakavinavinaka. Vakacava o na vakayagataka vinaka na gauna vakasakiti qo? E vakarautaka vakayalololoma o Jiova na isoro, koya gona me vakamarautaki koya mada ga noda vosa ni vakavinavinaka kei na ka e vakananuma na lomada.—Same 19:14.