Vakayagataka Vinaka na Mekesini Makawa

Ena sega ni yaga na mekesini makawa ke ra maroroi toka ga se ra viritaki laivi, e dodonu gona meda veisoliyaka. Dua mada ga na mekesini e rawa ni uqeta e dua me taleitaka na ka dina, e rawa tale ga ni uqeti koya me masuta na yaca i Jiova. (Roma 10:13, 14) Qo eso na vakatutu e rawa ni vakayagataki vinaka kina na mekesini makawa.

• Ni o vunau tiko ena yalava sega ni tarai wasoma, de dua o rawa ni biuta ena vale e lala, me kua tale ga ni laurai levu.

• Nida vunau e matanalevu ena vanua era dau wawa kina e levu, me vaka na vanua ni wawa basi se ikelekele ni motoka, tarogi ira na tu ekea ke ra via wilika na ivola vakaivolatabu, vakaraitaka vei ira e vica na itabataba makawa ni mekesini, ra qai digia na kena era via wilika.

• Nida gole ina vale era qaravi kina na malumalumu, vale ni bula, se so tale na vanua va qori ena nomu yalava ni ivavakoso, biuta toka e vica na mekesini makawa ena vanua ni wawa. Ke tiko o koya e liutaka na vanua va qori, e vinaka meda kerea e liu nona veivakadonui. Ke o raica ni sa tu ekea eso na noda mekesini, kua ni biuta tale eso.

• Ni o vakavakarau tiko ena veisikovi lesu, vakasamataka vinaka na ka era kauaitaka yadua o ira o na lai sikova. Vakacava e vakavuvale? E dau taleitaka na gade? Vakacava e dau taleitaka na teitei? Vakadikeva na ka era tabaki ena mekesini makawa mo kila ke dua na ulutaga e tiko kina ena rairai taleitaka, qai vakaraitaka sara vua ni o lesuvi koya.

• Ni drau sota kei na tataleitaki o saga vakavica tiko mo sotavi koya ena nona vale, vakaraitaka sara vua eso na mekesini makawa e se bera ni raica.