E Marautaki na iWalewale Vou ni Vunau e Matanalevu
1. Na cava e uqeti mera cakava na ivavakoso e tiko ena kena yalava na vanua era dau tavali kina vakalevu na lewenivanua?
1 E uqeti na ivavakoso e tiko ena kena yalava na vanua era dau tavali kina vakalevu na lewenivanua mera tuvanaka na vunau e matanalevu, ni vakayagataki na teveli kei na qiqi. Ke vakayagataki na qiqi, me duri se dabe voleka tiko e dua na dautukutuku. Ia me rua na dautukutuku ni vakayagataki na teveli. O ira na lesi ena itavi qo mera veikauaitaki, matadredredre, mera torovi rawarawa. Ke kauai e dua ena ivola e vakaraitaki tu, rawa ni tekivuna na veivosaki e dua na dautukutuku ni kaya, “O bau vakasamataka se cava e kaya na iVolatabu me baleta na ulutaga qori?” Rawa ni rau vunau tawalokuci toka vakavoleka e dua se rua na dautukutuku.
2. Tukuna e dua na irogo e laurai kina na yaga ni vunau e matanalevu.
2 Na iwalewale qo sa tekivu kina e levu na vuli iVolatabu. A vinakata e dua na gonevuli ni univesiti me vola eso na ka me baleti ira na iVakadinadina i Jiova, ia e sega ni raica e dua na Vale ni Soqoni. Na macawa tarava e raica ena univesiti e dua na teveli e tuvani tu kina na noda ivola. E tekivu sara na vuli iVolatabu, sa dua na dautukutuku papitaiso ena gauna qo qai vakaitavi tiko ena vunau e matanalevu.
3. Na cava era kaya eso me baleta na iwalewale ni vunau qo?
3 E kaya e dua na tacida yalewa e taleitaka na iwalewale ni vunau qo: “Eso era mai taura na ilavelave vovou ni mekesini. Eso tale era se sega ni sotavi ira na iVakadinadina i Jiova. Au kila na iwalewale qo era na sotavi kina e levu.” E kaya e dua tale na tacida yalewa: “E marautaki na iwalewale vou qo ni vunau nira torovi iko na lewenivanua, ra qai lomatarotaro ke ra sega mada ga ni tataleitaki.”
4. Na cava me kua ni veiveisau kina e veimacawa na vanua kei na gauna e vakaraitaki kina na ivola?
4 E vinaka me dua ga na vanua e vakaraitaki kina na ivola, me tautauvata na siga kei na gauna e veimacawa. Ena matau kina vei ira na lewenivanua mera raica na ivola, era na doudou mera lai taro yani se tauri ivola. Sa tuvanaka na nomu ivavakoso na vunau e matanalevu? Ke vaka kina, o rawa ni vakaitavi ena iwalewale marautaki qai vuavuaivinaka qo ena kena ‘kacivaki ina veivanua kece na itukutuku ni matanitu ni Kalou.’—Luke 9:60.