Sere Vou ni Sokalou!
1 Ena bose vakayabaki ni Watch Tower Bible and Tract Society of Pennsylvania, e vakayacori ena 4 Okotova, 2014, e kacivaki ni na vakavoutaki na noda ivolanisere. iTukutuku rogorogo vinaka dina oya! E vakananumi vei ira na tiko ena bose ni tiki bibi ni noda sokalou na sere ni Matanitu ni Kalou.—Same 96:2.
2 O na rairai vaqaqa, ‘Na cava me vakavoutaki kina na ivolanisere?’ Qo eso na vuna. iMatai, e toso cake tiko ga na noda kila na iVolatabu, qori ena rawa ni veisau kina na qaqanisere. (Vkai. 4:18) Dua tale na vuna e vakavoutaki kina: Levu na vosa kei na matavosa e vakayagataki ena noda ivolanisere ena gauna qo e yavutaki mai ena New World Translation makawa. Ena veisau na qaqanisere qori me salavata kei na itabataba vou. E cakacaka levu na vakavoutaki ni qaqanisere, e nanumi kina me vakacurumi so na sere vou.
3 Vakacava eda na waraka me tabaki na ivolanisere vou meda qai lagata? Sega. E ka ni marau me vakaraitaki yani ni vica na vula qo ena biu ena noda Web site na jw.org eso na sere vou. Ni biu e dua na sere vou, ena tuvanaki me lagati ni cava na Soqoni ni Cakacaka, ena volai “sere vou.”
4 Vulici ni Sere Vou: Sega ni ka rawarawa meda vulica e dua na sere vou. Me vakataki koya na daunisame, eda vinakata meda lagasere ena soqoni ni ivavakoso, eda na “sega ni galu.” (Same 30:12) Meda vulica e dua na sere vou, muria e vica na ka qo.
Vakatagitaka vakavica na sere ena biu yani ena noda Web site. Na levu ga ni nomu vakarogoca, na rawarawa tale ga ni nomu nanuma.
Vulica na qaqana, tovolea mo kila vinaka sara.
Lagata na qaqanisere me salavata kei na ivakatagi. Cakava qori me yacova ni o sa kila vinaka na sere.
Vakatovotovotaka vakavica na sere vou ena nomudou Sokalou Vakavuvale me yacova ni ratou sa kila vinaka na lewenivuvale.
5 Ena vica na vula mai qo ni tuvanaki me lagati ni sa cava na Soqoni ni Cakacaka, ena rogoci mada na ivakatagi. Eda na qai lagata na sere nida muria na ivakatagi, me vaka ga eda dau cakava ena vo ni sere.
6 Ke da vakasamataka, na noda laga sere ena soqoni e vakaduavatataki keda meda vakacaucautaki Jiova ena marau. Koya gona, kevaka e rawa meda kua ni curu e tuba ena gauna ni lagasere ena noda soqoni vaKarisito.
7 Dua tale na sala eda rawa ni vakavinavinakataka kina na noda ivakatagi ni sokalou. Ena soqo ni tabacakacaka kei na soqo ni veiwasewase, e dau vakatagitaki na sere ni bera ni tekivu na porokaramu. Vakarua ena dua na yabaki, era soli ira na mataveitacini mera gole i Patterson, Niu Yoka mai na veiyasai vuravura, mera katona na ivakatagi totoka ena vakayagataki ena noda sokalou. Era sauma ga na nodra ivodovodo mera gole yani. O koya gona, ni kacivaka na jeameni meda dabe meda rogoca na ivakatagi e vakarautaki, meda cakava sara qori. Noda cakava qori eda vakarautaka kina na lomada ena porokaramu.—Esera 7:10.
8 Eda na tinia na noda soqoni nikua nida lagata na sere vou e kena ulutaga “Sa Tu na Matanitu—Me Yaco Mai!” Na sere qo e lagati ena bose vakayabaki sa qai oti ga qo, me vakananumi kina na 100 na yabaki ni kena tauyavutaki na Matanitu ni Kalou.
9 Na sere vou era buli qo e “ka vinaka” dina mai vei Jiova. (Maciu 12:35a) Meda saga mada ga meda vulica da qai lagata mai vu ni lomada, meda vakacaucau da qai vakaraitaka na veidokai e ganita na noda Kalou!—Same 147:1.