Sere Vei Jiova!

“Ka’u na sere vua na noqu Kalou ena gauna kecega ka’u sa bula kina.”​—SAME 146:2.

1. Na cava e vakavuna na nona bulia eso na same na cauravou o Tevita?

NI SE cauravou o Tevita, e vica vata na aua e dau vakatawana voli kina na sipi nei tamana volekati Peceliema. Ni cakava voli qori, a rawa ni sarava kina na ibulibuli veivakurabuitaki i Jiova me vaka na veikalokalo e lomalagi, ‘na manumanu ni vanua,’ kei na “manumanu vuka.” E tarai koya dina na ka e raica​—e vakavuna sara ga me bulia na sere ni veivakacaucautaki veiuqeti vua e bulia na veika totoka qori. E rawa ni wiliki ena Same e levu na sere a bulia o Tevita.a​—Wilika Same 8:​3, 4, 7-9.

2. (a) E rawa ni yaga vakacava vua e dua na ivakatagi? Tukuna na kena ivakaraitaki. (b) Na cava eda vulica me baleta na nodrau veiwekani o Tevita kei Jiova me vaka e tukuni ena Same 34:​7, 8 kei na Same 139:​2-8?

² Kena irairai ni a saga tale ga o Tevita ni se cauravou me dua na daunivakatagi maqosa. A rawata vinaka qori, mani sureti me lai qiri api vei Tui Saula. (Vkai. 22:29) Ni sotava na leqa na tui, e dau vakacegui koya na ivakatagi i Tevita me vaka ga na veivakacegui ni ivakatagi vinaka nikua. Ena gauna kece e qiria kina o Tevita na api, “a sa vakacegu ko Saula, ka sa vinaka ko koya.” (1 Sam. 16:23) E se yaga tiko ga nikua na sere a vola na daunivakatagi qori e dau rerevaka na Kalou. Vakasamataka mada qo! Sa oti qo e sivia na 3,000 na yabaki mai na gauna a sucu kina o Tevita, ia e le milioni vakacaca mai na veiyasa i vuravura e duidui na kedra ituvaki era dau wilika na same i Tevita mera vakacegui kina, me yavu tale ga ni nodra inuinui.​—2 Vei. 7:6; wilika Same 34:​7, 8; 139:​2-8; Emosi 6:5.

iTavi ni iVakatagi ena Sokalou Dina

3, 4. Na cava a tuvanaki me baleta na ivakatagi totoka ena gauna i Tevita?

³ E tiko vei Tevita na taledi qai vakayagataka na taledi qori ena sala vinaka duadua, oya me vakalagilagi Jiova. Ni sa tui kei Isireli, a tuvanaka o Tevita me okati ena veiqaravi ena valeniveitavaki na ivakatagi totoka. E sivia na duanaikatini ni Livai kece era veiqaravi ena valeniveitavaki​—qori e rauta nira le 4,000 era lesi mera ‘vakavinavinaka,’ ra qai le 288 era ‘vakavulici mera sere vei Jiova.’​—1 Vei. 23:​3, 5; 25:7.

⁴ A bulia sara ga o Tevita e levu na sere era lagata na Livai. Ke tiko e dua na Isireli ena gauna e lagati kina na same i Tevita, ena rairai uqeti koya sara ga na ka e rogoca. Ni kau i Jerusalemi ena dua na gauna e muri na kato ni veiyalayalati: “A sa kaya ko Tevita kivei ira sa liu vei ira na Livai, me ra lesi ira na wekadra me ra dau-ni-sere, kei na ka domo vinaka, na api, kei na soliteri kei na sibali, ka tabalaka na domodra e na marau.”​—1 Vei. 15:16.

5, 6. (a) Na cava e kauaitaki kina vakabibi na ivakatagi ena gauna ni veiliutaki i Tevita? (b) Eda kila vakacava ni bibi na ivakatagi ena sokalou e Isireli makawa?

⁵ Na cava e kauaitaki kina vakabibi na ivakatagi ena gauna i Tevita? E sega ni baleta wale ga ni daunivakatagi na tui, ia e dua tale na vuna a qai vakatakilai ena veisenitiuri tarava ni tekivuna tale na tui dau caka dodonu o Esekaia na veiqaravi e valenisoro. Eda wilika ena 2 Veigauna 29:25: “Ka sa lesi ira na Livai [o Esekaia] me ra tu e na vale i Jiova, ka me ra taura na sibali kei na soliteri, kei na api, me vaka nai vakaro i Tevita, kei Kata na nona rairai na tui, kei Necani na parofita: ni sa vakakina na vosa i Jiova e na gusudra na parofita.”

⁶ Io, a veidusimaki o Jiova ena vukudra na nona parofita mera vakacaucautaki koya ena sere na nona dauveiqaravi. Era dau vagalalataki mera kua ni cakacaka na daulagasere mai na yavusa vakabete, me levu kina na gauna ni nodra buli sere, kena irairai mera dau vakatovotovo tale ga.​—1 Vei. 9:​33.

7, 8. Nida lagata na sere ena noda ivolanisere, na cava e bibi cake mai na taledi?

⁷ O na rairai kaya: “Au sa rui domoca, au sa na sega tu ga ni digitaki meu lagasere vata kei ira na kenadau ena valeniveitavaki!”Ia era sega ni kenadau kece ena lagasere na Livai. Me vaka e tukuni ena 1 Veigauna 25:​8, era tiko tale ga eso era se ‘vuli.’ E vinaka meda nanuma tiko ni so na lewe ni yavusa tale eso e Isireli era rairai kenadau tale ga ena ivakatagi kei na lagasere, ia o Jiova e lesi ira ga na Livai mera daunivakatagi ra daunilagasere. Eda nuidei se ra mani ‘kenadau’ se ra se ‘vuli,’ era solia na nodra vinaka kece ena nodra itavi o ira kece na Livai yalodina.

⁸ A taleitaka na ivakatagi o Tevita qai kenadau kina. Ia vakacava e bibi duadua ga vei Jiova na taledi? A vola ena Same 33:3 o Tevita: “Qiriqiri vakavinaka [“kena vinaka duadua,” NW] ka me rogo levu.” E vakamatatataki e keri ni bibi cake mai na taledi na noda ‘solia na noda vinaka kece’ nida sere vei Jiova.

iTavi ni iVakatagi ni Oti na Gauna i Tevita

9. Ke o donuya na vakatabui ni valenisoro ena gauna ni veiliutaki i Solomoni, vakamacalataka na ka o na rairai raica se rogoca.

⁹ Ena gauna ni veiliutaki i Solomoni, a bibi tale ga ena sokalou savasava na ivakatagi. Ni vakatabui na valenisoro, a dua sara ga na kena mataivakatagi, ra qai le 120 na uvu davui. (Wilika 2 Veigauna 5:​12.) E tukuna na iVolatabu ni o ira na “uvu davui [era bete taucoko] kei ira na dausere, me ra domo vata ga, ko rogo vata e na sere, kei na vakavinavinaka vei Jiova; . . . ‘Sa vinaka ko koya, ni sa tawa mudu na nona loloma.’ ” Ena gauna ga e rogo kina na domo ni sere, “sa qai sinai na vale e na o” me ivakaraitaki ni nona veivakadonui o Jiova. Sa na matalau mada ga qai vakatubuqoroqoro na rogoca na rorogo ni davui kei na duavata ni domodra na udolu vakacaca na daulagasere!​—2 Vei. 5:​13.

10, 11. Eda kila vakacava nira vakayagataka na ivakatagi ena nodra sokalou na lotu vaKarisito taumada?

¹⁰ Era dau vakayagataka tale ga na ivakatagi ena nodra sokalou na lotu vaKarisito taumada. E macala nira dau soqoni ga e vale na lotu vaKarisito ena imatai ni senitiuri, sega ni valeniveitavaki se valenisoro. Nira dau tusaqati se sotava eso tale na dredre, e dau yalani kina na ka era cakava ena gauna ni soqoni. Ia era dau vakacaucautaka ga na Kalou ena sere.

¹¹ A vakasalataki ira na tacina lotu vaKarisito e Kolosa na yapositolo o Paula: “Ni . . . veivakamasuti tiko ga ena same, ena sere ni veivakacaucautaki vua na Kalou, ena sere vakayalo e salavata kei na yalololoma.” (Kolo. 3:​16) Ena gauna erau bala kina e valeniveivesu o Paula kei Sailasa, a sega ni tu vei rau e dua na ivolanisere, ia erau dau “masu rau qai vakacaucautaka na Kalou ena sere.” (Caka. 16:25) Ke o bala e valeniveivesu, e vica na sere mai na noda ivolanisere o na rawa ni nanuma na qaqana mo lagata?

12. Eda na rawa ni vakaraitaka vakacava nida raica vakabibi na sere ena noda ivolanisere?

¹² Ni bibi ena noda sokalou na ivakatagi, e vinaka meda taroga: ‘Au dau raica vakabibi na ivakatagi? Au dau saga vagumatua meu totolo yani ena soqoni, soqo siga dua se siga rua, kei na soqo siga tolu meu lagata vata kei ira na taciqu na imatai ni sere, au qai lagasere mai vu ni lomaqu? Au dau vukei ira na luvequ mera raica vakabibi na sere e dau laga ena maliwa ni Koronivuli ni Vuli Vunau kei na Soqoni ni Cakacaka se na maliwa ni ivunau soqovi levu kei na vuli Vale ni Vakatawa, mera kua ni raica qori me gauna ni vakacagicagi se ra veilakoyaki vakaveitalia mera nanuma mera vakadodoyava?’ E bibi ena noda sokalou na lagasere. Io, se da mani ‘kenadau’ se da se ‘vuli,’ meda sere ga vei Jiova nida rawa ni duavata kece kina, e dodonu tale ga meda cakava qori.​—Vakatauvatana 2 Korinica 8:​12.

Veiveisau ni Toso na Gauna

13, 14. Ena yaga vakacava na noda lagasere mai vu ni lomada ena gauna ni soqoni? Tukuna na kena ivakaraitaki.

¹³ A vakamacalataki ena Zion’s Watch Tower ena sivia na 100 na yabaki sa oti e dua na vuna e bibi kina na sere ena noda ivolanisere. A tukuni kina: “Na lagasere e sala vinaka me uqeta kina na nodra vakasama kei na lomadra na tamata ni Kalou na ka dina.” E levu na qaqanisere era yavutaki ena iVolatabu, na noda vulica gona eso na qaqa ni noda sere e dua na sala vinaka me uqeta kina na lomada na ka dina. Ena levu na gauna, na noda lagasere mai vu ni lomada e dau tarai ira dina era se qai gole yani ena imatai ni gauna ena noda soqoni.

¹⁴ A lesu tiko mai na cakacaka o C. T. Russell ena dua na yakavi ena 1869 qai gole tiko e vale, a rogoca sara na domo ni sere ni gole tiko mai na olo ena ruku ni dua na itabavale. A sa vakadeitaka tu ena gauna qori ni na sega ni kila na ka dina me baleta na Kalou. A mani vakatulewataka me vakaogai koya ga ena nona bisinisi ni nanuma ke rawata eso na ilavo, ena rawa ni vukei ira vakayago na lewenivanua ke sega ni vukei ira rawa vakayalo. Ni curu yani o Brother Russell ina olo buto qai tauvi kuvu, e raica ni caka tiko kina na lotu. A dabe sara me vakarorogo. Me vaka a qai vola ena dua na gauna e muri, na ka a rogoca ena bogi oya “lakovata kei na veivuke ni Kalou, sa veirauti sara ga me vakaukauataki kina na nona vakabauta ni uqeti vakalou na iVolatabu.” O raica rawa na ka e vagolei Brother Russell ina soqoni? Io, na lagasere.

15. Na veisau cava e vakayacori ena noda kilaka vakaivolatabu e veiganiti kina me vakavoutaki na noda ivolanisere?

¹⁵ Ni toso na gauna, sa veiveisau na noda kilaka vakaivolatabu. E tukuna na Vosa Vakaibalebale 4:​18: “Na nodra sala na yalododonu sa vaka na rarama sa cila tu, sa levu cake tiko na kena rarama ka yacova na siga levu.” Ni veisau na ivakamacala vakaivolatabu eda sa kila tu mai, kena ibalebale ena veisau tale ga na qaqa ni noda sere. Ena loma ni 25 na yabaki sa oti, eda marautaka voli mai kina na iVakadinadina i Jiova ena levu na vanua na vakayagataki ni ivolanisere Vakacaucautaki Jiova ena Sere.b Me tekivu mai na gauna se qai tabaki kina na ivolanisere oya, sa vakararamataki eso na ulutaga vakaivolatabu, eso gona na vosa era vakayagataki ena ivolanisere oya e sa sega ni vakayagataki nikua. Kena ivakaraitaki, eda sa sega ni tukuna na “bobula yalodina ka vuku,” ia e sa vakayagataki na “dauveiqaravi” me dusia na ilawalawa oya. Me salavata gona kei na ivakavuvuli eda muria, e veiganiti kina me vakavoutaki na noda ivolanisere.

16. Ena yaga vakacava na noda ivolanisere vou ena noda muria na nona ivakasala na yapositolo o Paula ena Efeso 5:​19?

¹⁶ Ena vuku ni veisau ni noda kilaka vakaivolatabu kei na so tale na vuna, e vakadonuya kina na iLawalawa Dauvakatulewa me taba e dua na ivolanisere vou, Sere Vei Jiova. Sa vakalailaitaki na iwiliwili ni sere me 135, ni sa lailai gona na sere me vulici, e dodonu me rawarawa na noda wiligusutaka eso na qaqa ni noda sere vou. Qori e salavata kei na ivakasala i Paula ena Efeso 5:​19.​—Wilika.

Vakaraitaka ni o Taleitaka na Sere

17. Na cava meda vakasamataka me kua ni tarova kina na noda lagasere ena soqoni na noda leqataka nida na vakamadualaki?

¹⁷ Vakacava me tarova na noda lagasere ena soqoni na noda leqataka nida na vakamadualaki? Vakasamataka ga va qo: “Eda dau tarabe kece” ena vosa nida ivalavala ca. (Jeme. 3:2) Ia qori e sega ni tarova na noda vakalagilagi Jiova nida vunau e veivale. Ena rairai sega ni vinaka tale ga na noda lagasere nida ivalavala ca, ia me kua ni tarova qori na noda vakalagilagia na Kalou ena sere. E “cakava na gusu ni tamata” o Jiova, e marau ni rogoca na domoda nida vakalagilagi koya ena sere.​—Lako 4:​11.

18. Tukuna eso na vakatutu mo vulica kina na qaqa ni sere.

¹⁸ E sa vakarautaki ena vica vata na vosa na CD Sing to Jehovah​—Vocal Renditions. E totoka na kena ivakatagi qai lagati vakamatasere na sere vou, o na marautaka dina na nomu rogoca. Ni o rogoca wasoma, o na vulica totolo kina eso na qaqa ni noda sere vou. E levu na sere ni o lagata na qaqana ena dua na laini, e vaka ga o sa kila rawa tu na qaqana e tarava. Ni o vakatagitaka gona na CD, e vinaka mo lagata tale tiko ga na kena italetale. Ke o vakamatauna mai vale mo lagata na qaqana o qai rogoca na kena ivakatagi, o na sega ni madua na lagasere ena Kingdom Hall.

19. Na cava soti e caka ena kena vakarautaki na ivakatagi ni noda sere?

¹⁹ E rawarawa sara meda raica vakamamada na ivakatagi eda dau rogoca ni bera ni tekivu na porokaramu ena noda soqo siga dua, siga rua, kei na soqo siga tolu. E dua na cakacaka levu e vakayacori ena kena vakarautaki. Ni digitaki oti na ivakatagi, sa na qai volai vinaka na nodra itavi na le 64 era lewe ni Watchtower orchestra. Era na lesuva tiko me vica vata na aua na ka mera vakatovotovotaka, oti sa qai lai katoni ena studio e Patterson, Niu Yoka. E le tini vei ira qori era gole mai na so tale na vanua. Era raica me ka dokai na nodra veivuke ena kena vakarautaki na ivakatagi totoka me vakayagataki ena noda soqo. Qori e ivakaraitaki tale ga ni nodra veinanumi, e veiganiti kina meda vakavinavinakataka na nodra sasaga. Ni kerei keda gona na jeameni ni noda soqo siga dua se siga rua kei na soqo siga tolu meda dabe da rogoca na ivakatagi e vakarautaki, meda cakava sara qori.

20. Na cava o nakita dei mo cakava?

²⁰ E kauai o Jiova ena noda sere ni veivakalagilagi, qai raica vakabibi qori. Ena vakamarautaka na lomana na noda lagasere mai vu ni lomada nida sokalou vua. Io, eda kenadau se da se vuli, meda “sere vei Jiova”!​—Same 104:33.

[iVakamacala e ra]

Na Cava o Nanuma?

• Na ivakaraitaki cava ena gauna vakaivolatabu e kilai kina ni bibi dina ena noda sokalou na ivakatagi?

• Erau veisemati vakacava na kena muri na ivakaro i Jisu ena Maciu 22:37 kei na noda lagasere mai vu ni lomada?

• Eda na vakaraitaka vakacava nida taleitaka na sere ena noda ivolanisere?

[iYaloyalo ena tabana e 23]

O dau vukei luvemu me kua ni veilakoyaki vakaveitalia ni caka tiko na lagasere?

[iYaloyalo ena tabana e 24]

O sa vulica tiko e vale na qaqa ni sere vou?