Vakayagataka na Katokatoni
1. Me ikuri ni ivola tabaki, na isolisoli cava tale e yaga vei keda?
1 Levu era taleitaka na website na jw.org mera wilika kina na vosa rogo vinaka ni ka dina, e donu tale ga. (Dauv. 12:10) Vakacava, o dau vakayagataka na katokatoni? O rawa ni rogoca kina e levu na itukutuku ena noda website. Ena yaga vakacava vei keda?
2. Ena yaga vakacava ena noda vuli vakataki keda se vuli vakavuvale na katokatoni?
2 Noda Vuli Vakataki Keda se Vuli Vakavuvale: Eda na vakayagataka vinaka noda gauna nida rogoca na katokatoni ni iVolatabu, mekesini, se ivola nida veitosoyaki se qarava noda itavi ena veisiga. (Efeso 5:15, 16) Nida rogoca na katokatoni da qai vakamuria na kena ilavelave, ena sega ni duadua tu ga kina na ka e caka ena noda sokalou vakavuvale. Ke da via vakavinakataka noda wili ivola se da vulica e dua na vosa, ena yaga sara nida rogoca na katokatoni ena noda vuli vakataki keda.
3. O cei ena noda yalava e rawa ni yaga vei ira na katokatoni?
3 Yaga ena Cakacaka Vakaitalatala: Ena yalava, era na via rogoca na katokatoni o ira era dau osooso. Se da sotava e dua e duatani nona vosa, ena via vakarorogo ke rogoca na itukutuku ni Matanitu ena nona “vosanisucu.” (Caka. 2:6-8) Eso na vanua e dau kena ivakarau mera vakarorogo. Kena ivakaraitaki, dau kena ivakarau vei ira ena vosa na Hmong mera tukuna se vakadewataka ga e gusu na kedra itukutuku vei ira na gone, ena sega ni volai. O ira na vakarorogo era na maroroya vinaka na itukutuku qori. Levu na vanua vakaAferika era dau vuli ga nira rogoca na italanoa.
4. Na cava eda rawa ni taroga nida vukei ira na wekada ena yalava?
4 Vakacava ena noda yalava? O rawa ni vakaraitaka e dua na katokatoni me rogoca o itaukeinivale ena nona vosa ga? Vakacava meda vakauta ena imeli na katokatoni me yaga vua e dua? Se download na katokatoni ena disi (CD) me soli vua na itaukeinivale e tataleitaki kei na kena ilavelave? Eda rawa ni ripotetaka na ivola kece e katoni, brochure, mekesini se tikidua eda solia ena cakacaka vakaitalatala. E vakarautaki na katokatoni me yaga ena noda vuli vakataki keda, me teivaki tale ga kina na sore ni ka dina ni Matanitu.—1 Kor. 3:6.