Meda Maqosa Tiko Ga Ena Cakacaka Vakaitalatala​—Tu Vakarau Mo Veisau

VUNA E BIBI KINA: Era veisureti na lumuti kei na so tale na sipi mera mai “gunuva wale na wai ni bula” na tamata kece. (Vta 22:17) Na wai e dusia na isolisoli kece e vakarautaka o Jiova mera vakabulai kina mai na ivalavala ca kei na mate o ira na talairawarawa. Mera vukei gona o ira e duidui na nodra itovo kei na vakabauta vakalotu, e vinakati meda wasea na “itukutuku vinaka tawamudu” ena sala mera taleitaka kina.—Vta 14:6.

KA MO CAKAVA:

• Digia e dua na ulutaga kei na tikinivolatabu ena uqeta na lomadra ena nomu yalava. O rawa ni digia e dua na vakatutu se dua na ulutaga o raica ni laulau. Na ulutaga kei na tikinivolatabu cava e dau taleitaki vakalevu? Na itukutuku butakatakata cava era kauaitaka na lewenivanua? Na ulutaga cava era na taleitaka vakalevu na marama se o ira na turaga?

• Mo muria na veikidavaki se ivakarau e matau ena nomu yalava.—2Ko 6:3, 4

• Mo kila vinaka na ivola kei na vidio ena Teaching Toolbox, mo rawa ni vakaraitaka vua e tataleitaki

• Me download na ka e vakarautaki ena nodra vosa o ira o na rairai sotava ena yalava

• Veisautaka nomu ulutaga me ganiti itaukeinivale. (1Ko 9:19-23) Kena ivakaraitaki, cava o na kaya ke o sotava e dua se qai takali ga na wekana lomani?

SARAVA NA VIDIO, QAI SAUMA NA TARO QO:

• Na ulutaga cava e vakamacalataka o dautukutuku vei itaukeinivale?

• Na ituvaki cava e sotava tiko o itaukeinivale?

• Na tikinivolatabu cava e veiganiti ena ituvaki qo? Na vuna?

• O na veisautaka vakacava na nomu ivakamacala mera taleitaka ena yalava?