NODA BULA VAKARISITO

E Yaga Tiko Vei Iko Nomu Dikeva na iVolatabu e Veisiga?

Vakacava e okati tale ga ena nomu ituvatuva nomu wilika na tikinivolatabu e veisiga kei na kena ivakamacala ena Dikeva na iVolatabu e Veisiga? Ke sega, vakacava mo okata qori ena nomu ituvatuva? Levu era dikeva e veimataka na tikinivolatabu mera vakasamataka tiko na tikina bibi qori nira qarava na nodra itavi e veisiga. (Jos 1:8; Sm 119:97) Sala cava ena rawa ni yaga kina vakalevu nomu dikeva na tikinivolatabu? Wilika na tikina wavolita mo kila na kena itukutuku. Vakasamataka e dua na italanoa vakaivolatabu e tautauvata kei na tikinivolatabu ena mataka qori. Saga mo muria sara na kena ivakavuvuli. Ni o yavutaka nomu vakatulewa ena Vosa ni Kalou, ena dusimaki iko, ena yaga tale ga.—Sm 119:105.

Era dau dikeva na iVolatabu e veimataka na lewenivuvale e Peceli. Levu na ka era veivosakitaka sa biu tale ga ena JW Broadcasting^® ena iwasewase POROKARAMU KEI NA SOQO. Gauna cava sara o sarava kina e dua na vidio kei na vica tale? De dua e yaga sara ga vei iko eso na vidio qori. Kena ivakaraitaki, e yaga vakacava ena nomu vakatulewa na italanoa kei Loti?

SARAVA NA VIDIO KUA NI LOMANI VURAVURA (1JN 2:15), OTI QAI SAUMA NA TARO QO:

Na ivakavuvuli vakaivolatabu cava e yavutaki kina na tikinivolatabu ena mataka qori?
Eda kila vakacava ena ka e cakava o Loti ni rerevaki na noda lomani vuravura kei na ka e tu kina? —Vte 13:12; 14:12; 19:3, 12, 13, 24-26
Eda na vakaraitaka vakacava nida lomani Jiova, sega ni ka e tu e vuravura?

iYaloyalo: E vakasamataka tiko ena siga taucoko na tacida tagane qo na tikinivolatabu e veimataka kei na kena ivakamacala. 1. Ni wiliwili tiko, e raitayaloyalotaki rau tiko na agilosi ni rau sa taura na liga i Loti kei na nona vuvale me ratou dro mai Sotoma. 2. Ni vakasigalevu tiko, e raitayaloyalotaka tiko ga na ka e wilika ena mataka ya. 3. Ni sa tiko e vale ena yakavi, e raitayaloyalotaka tiko ga na ka e wilika ena mataka ya ni lobi isulu tiko. — Au na vakaraitaka vakacava ena siga taucoko niu mareqeta na Vosa ni Kalou?