iTuvatuva Vakavuvale —Dikevi ni Tikinivolatabu e Veisiga
1 Na itubutubu dauloloma ena saga me vakarautaka na kakana vinaka vei ira na luvena ena veisiga. O koya e bibi duadua oya na nodra vakani vakayalo ena Vosa ni Kalou. (Maciu 4:4) Dua na sala oni rawa ni bucina kina vei ira na luvemuni mera taleitaka na kakana vakayalo ra qai ‘tubu cake mera vakabulai,’ oya na nomuni dau veivosakitaka vakavuvale na tikinivolatabu e veisiga kei na kena ivakamacala. (1 Pita 2:2, VV) Gauna cava beka e rawa ni caka kina oqo ena nomuni ituvatuva vakavuvale?
2 Gauna ni Kana: Ni dikevi na tikinivolatabu e veisiga ena mataka, era na nanumi Jiova tiko kina na lewenivuvale ena siga taucoko oya. (Same 16:8) E navuca e dua na tina me dau wilika qai veitalanoataka kei luvena na tikinivolatabu e veisiga kei na kena ivakamacala ena gauna ni katalau, rau qai dau masu vata ni bera ni lai vuli. E vakaukauataki luvena me dei nona vakabauta ni uqeti mai koronivuli na yalo ni boletaki vanua, itovo vakasisila, qai vukei koya tale ga me dau vunau ena doudou vei ira na gonevuli kei ira na qasenivuli. Dina ni iVakadinadina taudua ga ena nona koronivuli, ia a sega ni bau galili.
3 Ke sega ni veiganiti me veivosakitaki na tikinivolatabu e veisiga ena mataka, oni rawa ni qai raica vata vakavuvale ena dua tale na gauna, de dua ni bera na vakayakavi. So tale ga na vuvale era dau veitalanoataka kina na ka era sotava ena cakacala vakavunau se so na tikina era taleitaka ena nodra wili iVolatabu vakataki ira. Levu era nanuma lesu ni gauna ni vakayakavi vaka oqori e dau marautaki dina vei ira vakavuvale.
4 Ena Bogi: E so na vuvale era dau raica vata na tikinivolatabu e veisiga ni bera nodra moce ena bogi. Rawa ni gauna vinaka tale ga oqo mera masu vata kina. Era na vakila na gone ni rawa nira veivolekati kei na Kalou kevaka era dau rogoca na nomuni vakamacalataki Jiova na itubutubu vaka kina na nomuni masu vua e veisiga.
5 Me vakalougatataka mada ga o Jiova na nomuni sasaga mera kila na ka dina na luvemuni ena nomuni vakayagataka vinaka na Dikeva na iVolatabu e Veisiga.