O sa Vakavakarau Tiko ena iVakananumi?

E bibi dina na iotioti ni Lakosivia e tiko kina o Jisu. E sa vakarau mate, e vinakata gona me kania kei ratou na nona yapositolo na kakana ni Lakosivia, oti me qai tauyavutaka na iVakayakavi ni Turaga, na soqo ena vakayacori tiko e veiyabaki. E mani talai Pita kei Joni me rau lai vakarautaka na rumu. (Lu 22:7-13; raica na iyaloyalo ena waqana.) Na cava eda vulica? E bibi meda vakavakarau ena iVakananumi ena ika27 ni Maji. De dua sa tuvanaka tu na ivavakoso na tacida me vunau, na vakarautaki ni madrai kei na waini kei na so tale na ka. Ia na cava meda cakava yadudua meda vakavakarau kina ena iVakananumi?

Vakarautaka na lomamu. Wilika qai vakasamataka vakatitobu na tikinivolatabu ni iVakananumi. Ena tiko na kena ituvatuva ena Dikeva na iVolatabu e Veisiga. E matailalai sara na ituvatuva ena iKuri B12 ena iVolatabu Vakadewa ni Vuravura Vou. (Raica tale ga na ilavelave ni iVola ni Soqoni ni Noda Bula vaKarisito kei na Cakacaka Vakaitalatala ni Epereli 2020.) Ena sokalou vakavuvale, e rawa nira vulica vata na vuvale na bibi ni ivoli nira rai ena iDusidusi ni Vakadidike ni iVakadinadina i Jiova.

Veisureti. Mo vakaitavi vakalevu ena veisureti ni iVakananumi. Vakasamataki ira o rawa ni sureta, me vakataki ira na veisikovi lesu, ira na vuli iVolatabu tu e liu, veikilai, kei ira na wekamu. Mera vakadeitaka na qase ni ivavakoso mera sureti na malumu tu vakayalo. Nanuma, ke dua e sega ni tiko ena nomu yalava, o rawa ni kila na vanua kei na gauna e vakayacori kina na iVakananumi ena nona yasayasa ni o tabaka BALETI KEIMAMI ena jw.org qai digia “iVakananumi.”

Na cava tale eda rawa ni cakava nida vakavakarau?