Gauna Marautaki ni Noqu Veiqaravi

Ena yabaki tarava, e kacivaki ena vuvale e Peceli ni vinakati eso mera bole mera lai veiqaravi ena valenivolavola ni tabana e Sauca Aferika, na vanua ena lai biu kina na misini levu ni tabaivola vou. Au mani solia na yacaqu. Au marau niu digitaki. Eratou digitaki tale ga e le tolu na lewe ni vuvale e Peceli, o Dennis Leech, Bill McLellan, kei Ken Nordin. E tukuni vei keitou ni keitou na lai dede e kea!

Au qiriti tinaqu, au kaya vua: “Na, au via tukuna vei iko e dua na ka. Au na lako tiko i Sauca Aferika!” E marama galugalu o tinaqu ia e dei nona vakabauta kei na nona veiwekani kei Jiova. E sega ni tukuna e levu na ka, au kila ni tokoni au. Erau sega ni cata o Na kei Ta na noqu vakatulewa, ia erau rarawa niu sa na lako sara vakayawa.

LAKO I SAUCA AFERIKA!

Keitou lako na lewe va ina Peceli e Brooklyn, keitou lai vulica me tolu na vula na tabaivola ena uma katakata. Oti keitou sa qai vodo ena waqa ni kako e gole i Cape Town, Sauca Aferika. Au se qai yabaki 20. Ena yakavi keitou vodo ena sitima. Qo e dua na ilakolako balavu mai Cape Town i Johannesburg. Ni kida na mataka, sa qai kele na sitima ena imatai ni tauni lailai ena vanua e via dravuisiga toka, e vakatokai me Karoo. E vanua katakata, e levu tale ga na kuvu. Keitou iro yani ena katubaleka, keitou via kila se vanua vakacava qo. Keitou leqataka vakalevu na neitou ilesilesi. Ni toso na gauna, keitou na lakova tale mai na vanua qo, keitou marautaka vakalevu na kena tauni lalai, e vagagalu tale ga.

Na noqu ilesilesi me vica na yabaki meu qarava tiko na misini totoka ni tabaivola e vereverea tale ga, ya meu tuvana na matanivola me tabaki kina na Vale ni Vakatawa kei na Yadra! E tabaki ena valenivolavola ni tabana na mekesini ena levu na vosa vakaAferika e Sauca Aferika kei na levu tale na vanua vakaAferika. Keitou marau ni vakayagataki vinaka tiko na misini ni tabaivola e vakavuna neitou biubiu mai Kenada!

Toso na gauna, au sa lai veiqaravi ena valenivolavola e qarava na tabaivola, kena vakau, kei na vakadewa. Au osooso vakalevu, ia au marautaka.

VAKAWATI KEI NA ILESILESI VOU

Ena 1968 au vakawati kei na dua na tacida yalewa painia, o Laura Bowen, e tiko voleka ga e Peceli. E dau mai cakacaka tale ga e Peceli me taipa ena Tabana ni Vakadewa. Ena gauna ya era sega ni dau tiko e Peceli na veiwatini vou, keirau mani lesi me keirau painia lavotaki. Au lomaleqa vakalailai. Niu tiko e Peceli me tini na yabaki, e dau vakarautaki na kakana kei na vanua meu tiko kina, ia qo keirau na lai bula vakacava ena ilavo ni painia lavotaki? E veivula e dau soli e 25 na rand, ya me 25 o Laura, 25 tale ga o yau (ena gauna ya e rauta ni $35 ni Merika) kevaka wale ga keirau rawata na aua, veisikovi lesu, kei na levu ni ivola me keirau solia. Ena saumi ena ilavo qori na rede, kakana, veilakoyaki, laurai vakavuniwai, kei na so tale na ka.

Keirau lai painia ena dua na iwasewase lailai volekata na korolevu o Durban, ena Wasawasa vakaIdia. E dua na wiliwili levu ni lewenivanua era Idia, levu vei ira e nodra kawa na lako mai Idia mera mai cakacaka ena loga ni dovu ena icavacava ni veiyabaki ni 1800. Ena gauna qo era qarava tiko eso tale na cakacaka, ia se tiko ga nodra itovo vakavanua kei na kedra kakana, me vaka na kari kana vinaka. Era vosa tale ga vakavalagi, e rawarawa gona me keirau vunau vei ira.

E vinakati vei ira na painia lavotaki e 150 na aua e veivula ena cakacaka vakaitalatala, keirau mani tuvanaka kei Laura e ono na aua ena imatai ni siga. E siga katakata, e tunumaka tale ga. E sega neirau veisikovi lesu kei na vuli iVolatabu, keirau vunau ga e veivale me ono na aua. Oti ga vakalailai au raica sara noqu kaloko, se qai oti ga e 40 na miniti! Au mani vakasamataka, e rawa ni keirau painia lavotaki tiko ga?

Oti qori sa qai dua neirau ituvatuva vinaka. E veisiga keirau dau vakarautaka na saniwiji, e biu tale ga na kofi se supu ena cemesi. Gauna keirau via cegu kina vakalailai, keirau na vakelea neirau motoka lailai ena dua na vunikau voleka, eso na gauna era dau mai wadravi keirau na gone ni Idia! Oti e vica na siga keirau liaca ni oti ga e 2 se 3 na aua sa toso totolo ga na gauna.

Keirau marautaka me keirau wasea na ka dina vei ira na lewenivanua dau veikauaitaki! Keirau raica nira dau veidokai na Idia, era dau yalovinaka, era lomana tale ga na Kalou. Levu na Idu era taleitaka na itukutuku keirau vunautaka yani. Era taleitaka na veika me baleti Jiova, Jisu, na iVolatabu, na vuravura vou ni vakacegu, kei na nodra inuinui na mate. Oti e dua na yabaki sa 20 na neirau vuli iVolatabu. E veisiga keirau na vakasigalevu kei na dua na vuvale keitou vulica vata tiko na iVolatabu. Dua na ka neirau marau.

Oti ga qori sa veisau na neirau ilesilesi me keirau lai veiqaravi vakaivakatawa ni tabacakacaka ena baravi ena Wasawasa vakaIdia. E veimacawa keirau dau vakaicili ena dua na vuvale, keirau sikova na ivavakoso, keirau cakacaka tale ga kei ira na dautukutuku me keirau vakayaloqaqataki ira. Era okati keirau me keirau lewe ni nodra vuvale, keirau veimaliwai kei na luvedra, keirau taleitaka tale ga na manumanu era susuga tu. Keirau marautaka dina na rua na yabaki ni neirau veiqaravi. Oti qori ratou qiri mai na valenivolavola ni tabana, e tukuni mai, “Keitou nanuma tiko mo drau sa lesu tale mai Peceli.” Au mani tukuna yani, “Keirau marautaka tiko neirau ilesilesi qo.” Ia keirau yalorawarawa me keirau gole ena vanua ga keirau lesi kina.

LESU I PECELI

Noqu ilesilesi e Peceli meu veiqaravi ena Tabana ni Cakacaka, au marau meu cakacaka vata kei na levu na tacida tagane matua. Ena gauna qori ni oti nona veisiko ena ivavakoso na ivakatawa ni tabacakacaka, e dau vakauta nona ripote ina valenivolavola. E dau vola na Tabana ni Cakacaka e dua na ivola ina ivavakoso e yavutaki ena ripote qori. Na inaki ni ivola me veivakayaloqaqataki, me dusimaki ira tale ga ena ka me caka ena so na ituvaki. Era cakacaka vakaukaua na vunivola mera vakadewataka na ivola mai na vosa vaXhosa, Zulu, kei na so tale na vosa ina vosa vakavalagi. Oti ya mera vakadewataka tale ga na ivola vakavalagi ina vosa vakaAferika. Au vakavinavinakataka nodra cakacaka vakaukaua na daunivakadewa meu kila kina na veika dredre era sotava tiko na mataveitacini yago loaloa e Aferika.

Ena gauna ya e veivakaduiduitaki na ivakarau ni veiliutaki e Sauca Aferika. Sa dui tu ga na vanua mera tiko kina na dui matatamata, e sega gona ni levu na gauna mera veimaliwai kina na duidui matatamata. O ira na tacida yago loaloa era vosataka ga na nodra vosa, vunau ga ena nodra vosa, era lewena tale ga na ivavakoso e vosataka na nodra vosa.

Au sega ni veikilai vakalevu kei ira na yago loaloa ni qarava na ivavakoso au lewena na yalava e vosa vakavalagi. Ia qo au sa rawa ni kila eso na ka me baleti ira na yago loaloa, na nodra itovo kei na ivakarau vakavanua. Au kila tale ga na veika dredre era sotava na tacida ena ka e vauca na nodra itovo vakavanua kei na vakabauta vakalotu. Dua na ka nodra yaloqaqa mera biuta na itovo e sega ni vakaivolatabu, mera tusaqati tale ga vakaukaua ena nodra vuvale kei na koro nira sega ni muria na ivalavala vakatevoro! E levu na dravudravua ena veikorokoro, e levu tale ga era sega ni vuli vinaka sara, ia era doka na iVolatabu.

Au marau niu bau vakaitavi ena so na veilewai e vauca na galala ni sokalou kei na tawaveitovaki. E vakadeitaka sara ga noqu vakabauta niu raica nodra yalodina kei na yaloqaqa na gone ni iVakadinadina i Jiova, era vakatalai mai koronivuli nira sega ni via vakaitavi ena masu kei na lagasere.

Dua tale na ituvaki dredre era sotava na tacida ena dua na matanitu lailai e Aferika, e kilai ena gauna ya me o Swaziland. Ni mate o Tui Sobhuza na iKarua, e vinakati vei ira na lewenivanua e kea mera muria na ivakarau vakavanua ni mate e dua. Era na toroya na tagane na uludra, era na kotiva tale ga vakalekaleka na yalewa na uludra. Era tusaqati e levu na tacida nira sega ni via vakaitavi ena ivalavala qori e vakamarautaki kina o koya e mate. E uqeti keirau sara ga nodra yalodina vei Jiova! E levu na ka keirau vulica vei ira na tacida e Aferika me baleta na yalodina kei na vosovoso, qori e vakadeitaka sara ga neirau vakabauta.

CAKACAKA TALE ENA VANUA NI TABAIVOLA

Ena 1981 au lesi meu veivuke ena kena vakarautaki na iwalewale ni tabaivola e vakayagataki kina na kompiuta. Au mani lesu tale ina vanua ni tabaivola. Dua na gauna marautaki dina qori! Sa veiveisau tiko na iwalewale ni tabaivola. Dua na dauveivoli e solia ina valenivolavola ni tabana e dua na misini me tovolei mada, e sega ni saumi. E mani kau tani kina na ciwa na misini makawa, e biu mai e lima na misini vou. E voli tale ga mai e dua na misini levu. Sa levu sara na tabaivola!

E veivuke vakalevu na kompiuta ni tuvani na vosa ena draunipepa ni vakayagataki na porokaramu na MEPS, na Multilanguage Electronic Publishing System. Sa veisau sara na iwalewale ni tabaivola mai na gauna keitou lako kina e Sauca Aferika! (Aisea 60:17) Keitou sa vakawati kece, eratou painia na dui wati keitou eratou lomani Jiova tale ga. Keirau se tiko ga e Peceli kei Bill. O Ken kei Dennis rau sa vakavuvale, rau tiko voleka ga.

Sa levu tiko ga na cakacaka ena valenivolavola ni tabana. E vakadewataki na ivola vakaivolatabu, e tabaki tale ga ena levu sara na vosa qai vakau ina so tale na valenivolavola ni tabana. E vinakati gona me dua tale na valenivolavola. Era tara na mataveitacini e dua ena vanua rairai vinaka ena ra kei Johannesburg, e mani vakatabui ena 1987. Au marautaka niu bau vakaitavi ena tubu qori, meu lewena tale ga na Komiti ni Tabana e Sauca Aferika me vica vata na yabaki.

DUA TALE NA ILESILESI VOU!

Keirau kurabui vakalevu ena 2001 niu sureti meu lewe ni Komiti ni Tabana tauyavu vou e Merika. Keirau rarawa ni keirau sa biuta mai neirau ilesilesi kei na itokani e Sauca Aferika, ia keirau marau me keirau lewe ni vuvale e Peceli mai Merika.

Keirau lomaleqa ni sa biu tu yani o tinai Laura, sa kenamarama. Keirau sega ni veivuke rawa ni keirau tiko mai Niu Yoka ia ratou lomasoli na taci Laura me ratou vukei koya vakayago, vakailavo tale ga. Ratou kaya, “Keitou sega ni rawa ni veiqaravi vakatabakidua, ia ke keitou qaravi Na, ena rawa ni drau tomana tiko ga nomudrau ilesilesi.” Dua na ka neirau vakavinavinakataki ratou.

E vakaraitaka tale ga na yalo qori o tuakaqu kei watina, rau tiko mai Toronto, e Kenada. Erau qaravi tinai keitou tiko ni sa yada. Sa mai tu vata kei rau me sivia e 20 na yabaki. Keirau vakavinavinakataka vakalevu na nodrau lomani koya, kei na nodrau qaravi koya ni oti ga neirau yaco yani e Niu Yoka. Keirau kalougata vakalevu nira tiko na lewenivuvale era veitokoni, era yalorawarawa tale ga mera cakava eso na veiveisau mera qarava kina na itubutubu itabaqase e dau dredre ena so na gauna!

Na noqu ilesilesi e Merika ya na tabana ni tabaivola me vica vata na yabaki, e vakayagataki kina e levu na iyaya vovou, e rawarawa tale ga. Wale tiko ga qo au veiqaravi ena Tabana ni Volivoli. Dua na ka neirau marau ni sa oti qo e 20 na yabaki neirau lewena tiko na valenivolavola ni tabana levu qo. Na kedra iwiliwili na lewenivuvale e rauta ni 5,000 kei na 2,000 tale era dau gole mai mera veivuke!

Ena 60 na yabaki sa oti, au sega sara ga ni tadra niu na mai tu eke. E dau tokoni au tu ga o Laura ena veiyabaki kece qori. E dua na gauna marautaki dina vei au! Keirau marautaka na ilesilesi kece keirau qarava vaka kina o ira keirau cakacaka vata, wili kina o ira ena valenivolavola ni tabana e veiyasa i vuravura keirau sikova. Ena gauna qo au sa sivia na yabaki 80, sa lailai ga na itavi au qarava ni sa levu na tacida gone era vakavulici mera qarava na itavi qori.

E vola na daunisame: “E marau na matanitu e nona Kalou o Jiova.” (Same 33:12) E dina sara ga na vosa qori! Au marau vakalevu niu rawa ni qaravi Jiova kei ira nona tamata mamarau.