1921 Duanadrau na Yabaki sa Oti

“NA ITAVI cava eda vakanamata kina ena yabaki qo?” Qori na ka era tarogi kina na Gonevuli ni iVolatabu gugumatua ena Watch Tower ni Janueri 1, 1921. E saumi ena Aisea 61:1, 2, ni uqeti ira mera nanuma tiko nodra ilesilesi mera vunau: “Ni sa lumuti au ko Jiova, me’u vunautaka na irogorogo vinaka vei ira era sa yalomalumalumu . . . , me’u vunautaka na yabaki vinaka i Jiova; kei na siga sa ia kina na veisausaumi na noda Kalou.”

DAUVUNAU YALOQAQA

Mera vakayacora na nodra ilesilesi na Gonevuli ni iVolatabu ena vinakati mera yaloqaqa. Era na vunautaka na “irogorogo vinaka” vei ira na yalomalumalumu, era vunautaka tale ga “na siga [ni] veisausaumi” vei ira na tamata ca.

O Brother J. H. Hoskin, e tiko mai Kenada, e yaloqaqa me vunau ni tusaqati mada ga. Ena 1921 rau sota kei na dua na italatala ni Wesele. E tekivuna o Brother Hoskin na veivosaki ni kaya: “Me daru duavata ena ka e kaya na iVolatabu, kevaka mada ga daru duidui ena so na ka se dodonu tiko ga me daru veitalanoataka vakavinaka ena veiyaloni.” A sega ni yaco qori. E kaya o Brother Hoskin: “E vica ga na miniti neirau veivosaki ni sa tukia vakaukaua o italatala na katuba, au nanuma sara ga ni na lutu i ra na kena iloilo levu.”

E kailavaka o talatala: “Vacava mo lai vosa ga vei ira na sega tu ni lotu?” E sega ni sauma o Brother Hoskin, ni sa biubiu, e kaya lo ga, “Vaka sara ga au vosa tiko vua e dua e sega ni lotu!”

Ni vunau o italatala ena siga tarava e vakaucacataki au tale. E tukuna o Brother Hoskin: “E vakasalataki ira nona lewe ni lotu mera qarauni au, niu tamata lasulasu duadua meu bau butuka na tauni ya, meu vakamatei.” E sega sara ga ni yalolailai o Brother Hoskin, e vunau tiko ga qai vuavuaivinaka nona cakacaka. E kaya: “Au marautaka vakalevu noqu vunau e kea. Era tukuna mada ga eso, ‘Keimami kila ni o tamata ni Kalou!’ ra qai tukuna nira tu vakarau mera veivuke keu vinakata e dua na ka.”

VULI VAKAVUVALE, YADUDUA

Me rawa nira toso na tataleitaki, era tabaka kina na Gonevuli ni iVolatabu eso na porokaramu ni vuli ena Golden Age.a E vakarautaki na taro me baleti ira na gone mera veivosakitaka kei na nodra itubutubu. Era na “taroga na taro qori na itubutubu mera qai raica na gone na kena isau ena iVolatabu.” Eso na taro me vaka na “E vica na ivola e lewe ni iVolatabu?,” e vakavulica eso na ka rawarawa mai na iVolatabu. Eso tale me vaka “Vakacava mera namaka na lotu vaKarisito nira na vakacacani?,” e vakarautaki ira na gone mera yaloqaqa ni vunau.

E vakarautaki tale ga na taro kei na kedra isau vei ira na Gonevuli ni iVolatabu era kila toka e levu na ka mai na iVolatabu. E rawa ni laurai na kena isau ena imatai ni ivola mai na Studies in the Scriptures. Levu sara na dauwiliwili e yaga vei ira na porokaramu qo, ia e kacivaka na Golden Age ena Tiseba 21, 1921, ni sa na sega tale ni tabaki na taro qori. Na vuna?

DUA NA IVOLA VOU!

Na ivola *The Harp of God*

iVakatakilakila e volai kina na levu ni draunipepa sa wiliki

Taro me saumi

Era liaca na tacida era liutaka tiko na cakacaka ni vinakati me tuvanaki na nodra vulica na yavu ni ka dina o ira na gonevuli vou ni iVolatabu. Oya na vuna e sevutaki kina na ivola The Harp of God (Na Api ni Kalou) ena Noveba 1921. O ira na tataleitaki era taura na ivola e rawa tale ga nira vuli kina. Nira vulica vakataki ira era kila kina na “ituvatuva ni Kalou me vakalougatataka na kawatamata mera bula tawamudu.” E caka vakacava na vuli qo?

Ni dua e taura na ivola qori, sa na toka tale ga e loma e dua na tikinipepa e toka kina na levu ni draunipepa me wilika ena ivola. Ena macawa tarava ena vakau tale yani e dua na tikinipepa e toka kina eso na taro e yavutaki ena ka sa wilika oti, ena volai tale ga kina na ka me wilika ena macawa tarava.

E veimacawa ena taura kina o gonevuli na nona tikinipepa e vakau yani ena ivavakoso, e caka tiko qori me 12 na macawa. Era dau vakauta na tikinipepa qori na itabaqase ena ivavakoso se o ira e dredre mera lako e veivale. Kena ivakaraitaki, e kaya o Anna K. Gardner, mai Millvale, e Pennsylvania, Merika: “Ni sa sevutaki na Harp of God, sa rawa ni levu na nona cakacaka o tuakaqu, o Thayle, sa dredre na nona veitosoyaki, oya me vakauta e veimacawa na tikinipepa e tu kina na taro.” Ni vakaotia na nona vuli o gonevuli ena qai sikovi koya yani e dua me vulica e levu tale na ka mai na iVolatabu.

NA ITAVI ME QARAVI

Ni cava na yabaki e qai vakauta o Brother J. F. Rutherford e dua na ivola vei ira kece na lewe ni kalasi. E vola ni “sa rabailevu sara na kena kacivaki na itukutuku vinaka ni Matanitu ni Kalou ena yabaki qo, e vuavuaivinaka tale ga ni vakatauvatani kei na veiyabaki sa sivi.” E qai kuria: “Se levu tale na cakacaka e tu me qaravi. Uqeta eso tale mera vakaitavi ena cakacaka marautaki qo.” Era muria na Gonevuli ni iVolatabu na ivakasala qori. Ena 1922 era gumatua ni vunautaka na Matanitu ni Kalou.

iTokani Yaloqaqa

Era vakaraitaka na Gonevuli ni iVolatabu na veilomani vakaveitacini nira dau veivukei. Era veitokani yaloqaqa “ena gauna ni rarawa” me vaka e laurai ena italanoa e tarava.—Vkai. 17:17.

Ena Tusiti, Me 31, 1921, e yaco e dua na ituvaki ena siti o Tulsa, mai Oklahoma, e Merika qai kilai me Tulsa Race Massacre, ni curu e valeniveivesu e dua na turaga yago loaloa ni beitaki ena nona vakasaurarataka e dua na marama yago vulavula. Era veivala kina e dua na ilala yago vulavula sivia na 1,000 kei na dua na ilala lailai era yago loaloa, e mani tete totolo na vala qori ena dua na vanua era vakaitikotiko kina na yago loaloa e Greenwood, qai butakoci kina e sivia e 1,400 na vale kei na bisinisi, e kama tale ga. E 36 ga e volatukutukutaki nira mate kina ia e rairai vica na drau na kedra iwiliwili dina.

E vakamacalataka na ka e yaco o Brother Richard J. Hill, e dua na Gonevuli ni iVolatabu yago loaloa e vakaitikotiko e Greenwood: “Ena siga e yaco kina na veivala qori, se qai oti ga na neimami soqoni vakaivavakoso. Ni oti ga qori sa rogo mai na veivanavanai. E yaco tiko qori me lai bogilevu sara.” Ia ena mataka ni Vukelulu ena June 1 sa qai ca ga na ituvaki. “Era lako mai eso ra qai kaya ke keitou via taqomaki me keitou gole sara vakatotolo ina vale ni soqo.” E gole sara o Brother Hill, o watina, kei na lima na luvedrau ina vanua qori. Era lai vakarurugi kina e rauta ni le 3,000 na yago loaloa, tagane kei na yalewa ra qai yadravi tu vei ira na sotia e lesia yani na matanitu mera lai veivakameautaki.

Na gauna tale ga qori e vakaraitaka na yaloqaqa o Brother Arthur Claus, e yago vulavula, ena vakatulewa e cakava. “Niu rogoca ga na veivala kei na nodra sa veicicivi e Greenwood, nira butako ra qai vakamakama, au via lai raica noqu itokani o Brother Hill.”

E vakavulica o Arthur Claus e 14 na gone ni vakayagataka na ivola The Harp of God

Ni yaco yani ena itikotiko nei Brother Hill, rau sota kei na dua na turaga yago vulavula e veivolekati nodrau vale qai tauri dakai tu. E nanuma na turaga qori, rau veitokani tale ga kei Brother Hill ni o Arthur e dua vei ira na vakacaca tiko. E kailavaka yani: “Cava o mai cakava eke?”

E kaya o Arthur: “Ke a sega ni taleitaka noqu ivakamacala, ke a vanai au sara ga. Au vakadeitaka vua ni keirau veitokani kei Brother Hill, levu tale ga na gauna au dau gade yani ina vale qori.” Rau qai taqomaka vinaka na vale vei ira na butako tiko mai.

Sega ni dede sa qai kila o Arthur ni ratou vakaicili tiko ena vale ni soqo o Brother Hill kei na nona vuvale. E tukuni vei Arthur nira sega ni rawa ni biubiu ena vanua qori na yago loaloa vakavo ke vakadonuya o Jenerali Barrett, na vakailesilesi e veiliutaki tiko ekea. E kaya o Arthur: “E dredre na veivosaki kei koya. Niu vakamacalataka vua na ka au via cakava, e taroga sara mai: ‘O na taqomaka na vuvale qo qai vakarautaka na ka ratou gadreva?’ Sega ni bera noqu vakadonuya ena marau.”

Ni soli ga na ivola ni veivakadonui, e gole totolo sara o Arthur ina vale ni soqo. E vakaraitaka sara vua na vakailesilesi tiko e kea, qai kaya mai: “Sa saini sara tu ga qo o Jenerali! O kila ni o se qai imatai ni tamata mo mai kauta e dua ena vanua qo ena siga taucoko nikua?” Totolo wale ga nodratou lai kunei mai o Brother Hill kei na nona vuvale. Ratou vodo kece ena motoka nei Arthur me ratou gole i vale.

E qarauna sara o Brother Claus me taqomaki vinaka o Brother Hill kei na nona vuvale. Na nona ivakaraitaki ni itokani yaloqaqa o Arthur e uqeti ira eso tale. E kaya: “Na turaga rau veivolekati kei Brother Hill e mai veivuke ena taqomaki ni nona vale, sa qai dokai keda sara vakalevu na iVakadinadina i Jiova. E levu era taleitaka na ka dina nira raica nira sega ni veivakaduiduitaki na tamata ni Kalou, se mera nanuma nira uasivia e dua tale.”

a E veisau na Golden Age me Consolation ena 1937, me Awake! ena 1946.