SALA MEDA VALUTA KINA NA YALO NI VEICATI

2 | Kua ni Sauma na Ca

iVakavuvuli Vakaivolatabu:

“Kua ni sauma na ca e caka vei kemuni. . . . Ke rawa, saga moni veiyaloni kei ira na tamata kece. . . . ni kua ni sauma na ca e caka vei kemuni, . . . ni volai: ‘“E noqu na veisausaumi, au na sauma,” e kaya o Jiova.’”—ROMA 12:17-19.

Kena iBalebale:

Eda dau cudru ke dua e vakacudrui keda. Ia e sega ni vinakata na Kalou meda sauma na ca e caka vei keda. E uqeti keda ga meda waraki koya, me qai vakadodonutaka na ka kece.—Same 37:7, 10.

Ka o Rawa ni Cakava:

Ke da sauma na ca e caka vei keda, ena vakavuna ga e levu na veicati. Ke dua gona e vakacudrui iko se vaka vu leqa, kua ni sauma lesu. Tovolea mo tauri iko vakamalua, qai sauma ena yalovinaka. Eso na gauna ena vinaka mo guilecava ga na ka e yaco. (Vosa Vakaibalebale 19:11) Ia eso tale na gauna, e ka vakayalomatua mo ripotetaka. Kena ivakaraitaki, ke caka vei iko e dua na ka e okati me basulawa, rawa ni o ripotetaka vei ira na ovisa se vakailesilesi.

E veivakaleqai na yalo ni veicati

Vakacava ke o sa cakava oti kece na ka o rawata mo walia kina ena sala malumu, ia o se cati tiko ga? Kua ga ni sauma na ca e caka vei iko. Na vuna? Ena sega ni yaco kina e levu na leqa. Ni o sega ni sauma lesu, o sa valuta kina na yalo ni veicati. Mo nuitaka ga na veidusimaki ni Kalou me wali kina na ituvaki qori. E kaya na iVolatabu: “Vakararavi vua, ena qai yavala ena vukumu o koya.”—Same 37:3-5.

iTalanoa Dina—ADRIÁN

Vorata na Yalo ni Via Sauma na Ca

Ni se itabagone o Adrián, e voravora nona itovo qai dau sauma na ca kece e caka vua. E kaya: “Levu na gauna au lai coko tu ena veivanavanai, vakavica noqu voleka sara ni mate.”

E tekivu vulica na iVolatabu o Adrián ni yabaki 16. E kaya: “Toso tiko noqu vuli iVolatabu au liaca ni dodonu meu veisautaka na noqu itovo.” A vinakati vua me valuta na yalo ni veicati qai muduka nona itovo voravora. E yaga vakalevu vua na ka e vulica ena Roma 12:17-19, ya me kua ni sauma na ca. E kaya: “Au vakadeitaka ni na vakaotia o Jiova na veika tawadodonu ena nona gauna kei na sala e donu vua. Toso na gauna, sa tekivu veisau vakamalua na noqu itovo.”

Dua na siga era buturaki Adrián e dua na ilala daubasulawa, era dau veimecaki tu i liu. E kaya nodra iliuliu: “Mai daru veivacu, vacava!” E kaya o Adrián: “Dua na ka noqu via sauma lesu.” Ia e masu lo ga vei Jiova qai biubiu.

E kaya o Adrián: “Keirau sota tale na nodra iliuliu ya ena siga tarava. E tuburi au na cudru katakata, ia au masu lo vei Jiova me vukei au meu lewa vinaka na noqu cudru. Au kurabui ni gole mai na cauravou ya qai kaya: ‘Vosoti au ena ka e yaco ena bogi. Kila na cava, au via vakataki iko. Au via vulica na iVolatabu.’ Au marau sara ga niu lewa vinaka na noqu cudru! Keirau vuli iVolatabu rawa kina kei na cauravou ya.”