Taro Na Dauwiliwili
E vola na daunisame o Tevita ena Same 61:8, ni na vakacaucautaka na yaca ni Kalou me “tawamudu.” Kena ibalebale ya ni na sega sara ga ni mate?
Sega. E dina na ka e vola o Tevita, e donu vinaka.
Dikeva mada na ka e tukuna ena tikinivolatabu qo kei na vica tale na tikinivolatabu e tautauvata: “Au na qai sere ena vakacaucau ina yacamuni me tawamudu niu vakayacora na noqu bubului ena veisiga.” “Au vakacaucautaki kemuni, i Jiova na noqu Kalou, ena lomaqu taucoko, au na qai vakalagilagia na yacamuni me tawamudu.” “Au na vakacaucautaka na yacamuni me tawamudu, io me tawamudu.”—Same 61:8; 86:12; 145:1, 2.
Vakacava a vakalevutaka tiko ga o Tevita na ka e vola, ni nanuma ni na sega sara ni mate? E kila o Tevita ni sa tukuna oti o Jiova nira na mate na tamata ivalavala ca, e vakaraitaka tale ga ni dua vei ira qori o koya. (Vkte. 3:3, 17-19; Same 51:4, 5) Kena ikuri, e kila ni o ira mada ga na tagane e vakadonuya na Kalou me vakataki Eparama, Aisake, kei Jekope era sa mate. E kila tiko ni dua na siga ena mate tale ga. (Same 37:25; 39:4) Na ka e vola qori ena Same 61:8 e vakaraitaka na levu ni nona vinakata me vakacaucautaka na Kalou me tawamudu, ya ena gauna kece e bula tiko kina.—2 Sam. 7:12.
Eso na ka e vola o Tevita e vakamacalataka na ka e sotava ena gauna ya me vaka eda raica ena ivakamacala taumada, se ulu ni Same 18, 51, kei na 52. Ena Same 23, e vakamacalataki Jiova o Tevita me iVakatawanisipi e dau veidusimaki, veivakacegui, e dau veitaqomaki. O Tevita e vaka sara ga na ivakatawanisipi qori. E vinakata me qarava na Kalou ‘ena veisiga kece ni nona bula.’—Same 23:6.
Mo nanuma tale ga ni ka e vola o Tevita e uqeti koya kina o Jiova. E okati kina eso na parofisai me baleta na ka ena yaco ena gauna mai muri. Kena ivakaraitaki, e vola o Tevita ena Same 110 na gauna ena “dabe” kina na nona Turaga ‘ena liga imatau ni Kalou’ mai lomalagi qai soli vua na lewa. Na cava me cakava? Me vakamalumalumutaki ira na meca ni Kalou, me “vakataulewa” tale ga “vei ira na veimatanitu” e vuravura. O Tevita e tubui koya na Mesaia ena veiliutaki mai lomalagi, me “bete tawamudu” tale ga. (Same 110:1-6) E tukuna o Jisu ni baleti koya na parofisai ena Same 110, ena vakayacori tale ga ena dua na gauna se bera mai.—Maciu 22:41-45.
Io, e uqeti vakalou o Tevita me vola na ka me baleta na nona gauna kei na gauna se bera mai, ni na vakaturi me vakacaucautaki Jiova me tawamudu. Eda kila gona ena Same 37:10, 11, 29 ni vakamacalataka na ituvaki e Isireli makawa, vaka kina na ka ena yaco e vuravura raraba ni sa na vakayacora na Kalou na nona vosa ni yalayala.—Raica na parakaravu 8 ena ulutaga “Daru na Tiko Vata Mai Parataisi” ena itabataba qo.
E vakaraitaka na Same 61:8 kei na so tale na tikinivolatabu e tautauvata, ni vinakata o Tevita me vakacaucautaki Jiova e Isireli makawa me yacova sara ni mate. E dusia tale ga na ka ena qai cakava ena dua na gauna sa tu qo e liu, ni na vakaturi koya tale o Jiova.