‘E Vinaka Noda Toro Voleka Vua na Kalou’!

1-2. (a) Na cava meda cakava meda veitokani voleka kina kei na dua? (b) Cava eda na vulica ena ulutaga qo?

VAKACAVA e tiko nomu itokani voleka? Cava o cakava mo drau veitokani kina? De dua drau dau veimaliwai vakalevu, o kila kina na ka dredre e sotava, na ka e taleitaka kei na ka e cata. O kila tale ga eso nona itovo talei o via vakatotomuria. O volekati koya sara ga.

² E vinakati na gauna kei na sasaga mo veitokani voleka kina kei na dua. E va tale ga qori noda via veitokani voleka kei na Kalou o Jiova. Eda na vulica ena ulutaga qo, na ka meda cakava meda veivolekati kina kei na noda Kalou, kei na kena yaga vei keda. Meda veivosakitaka mada qo na vuna e vinaka kina meda veivolekati kei Jiova, na noda iTokani vinaka duadua.

3. Na cava meda vakasamataka kina vakatitobu na vinaka ni noda toro volekati Jiova? Vakatauvatana.

³ E macala ni o duavata ni vinaka noda toro voleka vei Jiova. Nida vakasamataka vakatitobu na kena vinaka, eda na via toro volekati koya tiko ga. (Same 63:​6-8) Kena ivakaraitaki, eda kila ni na vinaka vei keda nida kania na kakana bulabula, vakaukaua yago, vakacegu vinaka, meda gunu wai tale ga vakalevu. Ia e levu era sega ni kauaitaka qori, era vakawalena kina nodra bula. Na levu ga ni noda vakasamataka na yaga ni noda tiko bulabula, ena rawarawa tale ga meda cakava tiko ga. E va tale ga qori nida kila na vinaka ni noda toro volekati Jiova. Ia nida vakasamataka vakatitobu na kena yaga, eda na via toro volekata tiko ga noda iTokani.​—Same 119:​27-30.

4. Na cava nona rai na daunisame e vola na Same 73:28?

⁴ Wilika Same 73:28. E Livai o koya e vola na ika73 ni Same, e lesi me dau lagasere ena valenisoro i Jiova. E rairai qaravi Jiova ena yalodina ena loma ni dua na gauna. Ia e kila ni bibi me nanuma tiko na vinaka ni nona “toro voleka vua na Kalou,” kei na kena yaga vei ira eso tale. Na cava eso na kena yaga?

EDA NA MARAU NIDA “TORO VOLEKA VUA NA KALOU”

5. (a) Na cava eda marau kina nida veivolekati kei Jiova? (b) Me vaka e tukuni ena Vosa Vakaibalebale 2:​6-16, tukuna eso na ivakaraitaki ni kena yaga vei iko na ivakasala i Jiova qai taqomaki iko.

⁵ Eda na marau vakalevu nida veivolekati kei Jiova. (Same 65:4) E levu tu na vuna eda marau kina. E yaga noda muria na ivakasala ena Vosa ni Kalou. Ena taqomaki keda meda kua ni cakava na ka ca kei na ivalavala ca bibi. (Wilika Vosa Vakaibalebale 2:​6-16.) Ya na vuna e tukuna kina na iVolatabu: “E marau na tamata e kunea na vuku kei koya e rawata na yalomatua.”​—Vkai. 3:13.

6. Na cava e vakavuna nona sega ni marau na daunisame?

⁶ E macala nira dau rarawa na itokani i Jiova ena so na gauna. Kena ivakaraitaki, a sega ni marau o koya a vola na ika73 ni Same ni sa tekivu cala nona rai. E cudru ni vakasamataka na nodra tikovinaka na tamata ca era sega ni via kauaitaka na Kalou kei na nona ivakatagedegede, e vinakata tale ga me taukena na ka e tu vei ira. E nanuma ni o ira na tamata dokadoka qai voravora era na vutuniyau tu ga, era bulabula vinaka, era sega tale ga ni rarawa. (Same 73:​3-7, 12) Na levu ni nona rarawa na daunisame e tekivu veinanuyaka ke yaga tiko nona qaravi Jiova. E kaya ena levu ni nona rarawa: “E sega ni yaga dina na noqu vakasavasavataka na lomaqu qai savata na ligaqu e sega ni cala.”​—Same 73:13.

7. Na cava meda cakava nida rarawa? (Raica tale ga ena waqana.)

⁷ A rarawa tiko na daunisame, ia e sega ni vakalaiva qori me vakamalumalumutaki koya. Na cava e cakava? E “curu ina itikotiko tabu lagilagi ni Kalou,” na vanua e vakadodonutaka kina o Jiova nona rai. (Same 73:​17-19) Nida rarawa, e kila qori o Jiova na noda iTokani dredre. Ke da masu vua me dusimaki keda, qai muria na ivakasala ena nona Vosa kei na ivavakoso, ena vakaukauataki keda meda vosota tiko noda rarawa. Ke da nuiqawaqawa mada ga, ena vakacegui keda o Jiova, ena vakayaloqaqataki keda tale ga.​—Same 94:19.a

ENA VAKAINAKI NODA BULA, ENA DEI NODA INUINUI

8. Na cava eso tale na sala ena vinaka kina vei keda noda toro voleka vua na Kalou?

⁸ Na cava e rua tale na sala ena vinaka kina vei keda noda toro voleka vua na Kalou? Kena imatai, ena vakainaki noda bula. Kena ikarua, ena dei noda inuinui ena gauna se bera mai. (Jere. 29:11) Meda dikeva mada na kena yaga.

9. E vakainaki vakacava noda bula nida volekati Jiova?

⁹ Nida volekati Jiova, ena vakainaki noda bula. Levu nikua era vakabauta ni sega ni bula na Kalou. Era nanuma ni sega ni vakainaki noda bula, toso tale ga na gauna eda sa na yali yani. Ia nida mai vulica na iVolatabu, eda vakadeitaka ni “bula dina tiko [na Kalou], ni na vakaicovitaki ira tale ga era vakasaqarai koya ena yalogu.” (Iper. 11:6) Nikua mada ga eda vakila tiko na marau nida qarava na Tamada vakalomalagi o Jiova, nida a buli ga meda cakava qori.​—Vkru. 10:​12, 13.

10. Me vaka e tukuni ena Same 37:​29, na cava nodra inuinui na nuitaki Jiova?

¹⁰ Levu nikua era vakanuinui tu ga ena bula qo, me vaka na cakacaka, vakavuvale, kei na nodra maroroi ilavo me baleta na gauna se bera mai. Era sega ni nuitaka na Kalou. Ia o keda na tamata i Jiova, eda vakanuinui vua. (Same 25:​3-5; 1 Tim. 6:17) Eda nuitaka na Kalou e noda itokani voleka, eda nuitaka tale ga nona yalayala. Dua vei ira na yalayala qori na noda qaravi koya me tawamudu e Parataisi.​—Wilika Same 37:29.

11. Ena vinaka vakacava vei keda noda toro voleka vua na Kalou? Cava nona rai o Jiova?

¹¹ E levu tale na sala ena vinaka kina vei keda noda toro voleka vua na Kalou. Kena ivakaraitaki, e yalataka o Jiova ni na vosoti ira na veivutunitaka nodra ivalavala ca nira volekati koya. (Aisea 1:18) Ni vosoti keda, ena sega ni ora tale tiko na lomada ena noda cala makawa. (Same 32:​1-5) Eda marau tale ga nida vakamarautaki Jiova. (Vkai. 23:15) Io, e levu tale tu na sala e vakalougatataki keda kina na Kalou nida volekati koya. Ena rawa vakacava nida toro voleka tiko ga vua?

EDA NA ‘TORO VOLEKA VAKACAVA VUA NA KALOU?’

12. Na cava o sa cakava mo toro voleka kina vua na Kalou?

¹² Ke o sa papitaiso, o sa cakava e levu na ka mo toro voleka kina vei Jiova. O sa vulica e levu na ka dina me baleta na Kalou o Jiova kei Karisito Jisu, o sa veivutunitaka nomu cala makawa, o vakaraitaka nomu vakabauta na Kalou, o qai saga vagumatua mo talairawarawa vua. Ia mo toro voleka vua na Kalou, e dodonu mo cakava tiko ga na ka kece qori.​—Kolo. 2:6.

13. Na cava e tolu na ka meda cakava meda toro voleka tiko ga kina vei Jiova?

¹³ Na cava eso tale na ka meda cakava meda toro voleka kina vei Jiova? (1) E bibi meda wilika qai vulica tiko ga na iVolatabu. Nida cakava qori, me kua ni noda inaki meda via kila ga eso na ka me baleta na Kalou. Ia meda saga meda kila na ka e vinakata vei keda, kei na noda muria na ivakavuvuli vakaivolatabu ena nona Vosa. (Efeso 5:​15-17) (2) E bibi meda vaqaqacotaka noda vakabauta nida vakasamataka vakatitobu e levu na ivakadinadina ni nona lomani keda. (3) E bibi meda cata tiko ga na ka e cata o Jiova, qai kua ni vakailala kei ira na dau cakava na ka ca.​—Same 1:1; 101:3.

14. Me vaka e tukuni ena 1 Korinica 10:​31, na cava eso na ka meda cakava e veisiga ena vakamarautaki Jiova? (Raica tale ga na iyaloyalo.)

¹⁴ Wilika 1 Korinica 10:31. E bibi meda cakava tiko ga na ka e vakamarautaki Jiova. E sega ni okati ga kina na noda cakacaka vakaitalatala kei na noda tiko ena soqoni. Na noda vakamarautaki Jiova e wili kina na ka eda cakava ena veisiga. Kena ivakaraitaki, ena marau o Jiova nida daudina ena ka kece kei na noda wasea na ka e tu vei keda. (2 Kor. 8:21; 9:⁠7) E vinakata tale ga o Jiova meda raica vakabibi na isolisoli ni bula. Eda na toro voleka vua na iVurevure ni bula nida lewa vinaka na ka eda kania, gunuva, eda na qarauna vinaka tale ga noda bula meda bulabula tiko ga. Nida saga meda vakamarautaki Jiova ena ka lalai mada ga, ena lomani keda vakalevu.​—Luke 16:10.

15. Na cava e vinakata o Jiova meda cakava?

¹⁵ E yalovinaka o Jiova vei ira na yalododonu kei ira na sega ni yalododonu. (Maciu 5:45) E vinakata meda cakava tale ga qori. Kena ivakaraitaki, e dodonu meda ‘kua ni vosavakacacataka e dua, meda kua ni dau veiba, meda qai yalomalua vei ira kece na tamata.’ (Taito 3:2) Kena ibalebale, eda na sega ni beci ira eso tale baleta ni sega ni tautauvata noda vakabauta. (2 Tim. 2:​23-25) Eda na toro voleka vei Jiova nida dau vakaraitaka na yalovinaka kei na veinanumi.

MEDA TORO “VOLEKA VUA NA KALOU” NIDA CAKA CALA

16. Na cava e nanuma o koya e vola na ika73 ni Same ni toso na gauna?

¹⁶ Vakacava ke toso na gauna o nanuma ni sega ni ganiti iko na loloma i Jiova? Me vaka eda veivosakitaka mai, a va tale ga qori nona rai o koya e vola na ika73 ni Same. E kaya: “Sa voleka ni lako sese na yavaqu, sa voleka ni tidara na noqu ilakolako.” (Same 73:2) E kaya ni “sa gaga” na lomana, e “lecaika” tale ga me “vaka na manumanu lialia” ena mata i Jiova. (Same 73:​21, 22) Vakacava e nanuma ni sega ni ganiti koya na loloma i Jiova ena vuku ni nona ivalavala ca?

17. (a) Na cava e rairai cakava na daunisame ni yalolailai? (b) Cava eda vulica vua? (Raica tale ga na iyaloyalo.)

¹⁷ E dua ga na gauna lekaleka a nanuma kina na daunisame ni sa biuti koya o Jiova. Kena irairai ni gauna sara ga e yalolailai tu kina, e liaca ni vinakati me toro voleka vua na Kalou. Eda kila qori ena ka e kaya: “Ia qo au sa dau tiko vata kei kemuni [Jiova], oni sa taura tu na ligaqu imatau. Oni tuberi au ena nomuni ivakasala, oti oni na liutaki au meu lagilagi.” (Same 73:​23, 24) Na cava eda vulica? Nida malumalumu se yalolailai, meda kerei Jiova me vakaukauataki keda, ni o koya ga na noda uluvatu. (Same 73:26; 94:18) Ni tidara vakalekaleka na yavada, meda lesu vei Jiova nida nuidei ni “tu vakarau [me] veivosoti.” (Same 86:5) E bibi gona meda toro voleka vua na noda Kalou, vakabibi nida yalolailai.​—Same 103:​13, 14.

“TORO VOLEKA VUA NA KALOU” ME TAWAMUDU

18. Na cava e sega ni vakaiyalayala kina noda rawa ni toro voleka vei Jiova?

¹⁸ E sega ni vakaiyalayala noda rawa ni toro voleka vei Jiova kei na noda saga meda kilai koya vinaka. E kaya na iVolatabu ni sala i Jiova, nona vuku kei na ka e kila e ‘dredre ni kilai.’​—Roma 11:33.

19. Na cava e tukuna na Same me baleta na gauna se bera mai?

¹⁹ E kaya na Same 79:13: “O keimami, na nomuni tamata kei na sipi ni nomuni veico, keimami na vakavinavinakataki kemuni me tawamudu, keimami na qai cavuta na veivakacaucautaki vei kemuni mai na dua na itabatamata ina dua tale na itabatamata.” Ni o toro voleka tiko ga vua na Kalou, o na nuidei tale ga ni o na vakalougatataki me tawamudu. O na kaya ena nuidei: “Na Kalou e uluvatu ni lomaqu qai noqu ivotavota tawamudu.”​—Same 73:26.