Keirau ‘Tubu ena Vanua Keirau Teivaki Kina’ ena Veivuke i Jiova

Rau vuli e Kiliati na Kassholms ena 1979, toso na gauna rau ‘teivaki’ se lesi me rau lai veiqaravi e Irani, Mauritius, Myanmar, Tanzania, Uganda, kei Zaire. Rau rogoca e Kiliati nona ivakasala e dua na dauniveivakavulici o Jack Redford, e yaga vakalevu vei rau ni rau “teivaki,” rau “cavuraki” qai “teivaki tale” ena levu na gauna. Me rau vakamacalataka mada.

Mats, talanoataka mada nomu mai kila na ka dina.

Mats: A tiko e Poladi o Ta ena iKarua ni iValu Levu, e raica e levu na veivakaisini ni Lotu Katolika. Ia e dau kaya tu ga: “E tiko na ka dina!” Toso na gauna, au sa qai kila ni dina o Ta. Au volia eso na ivola makawa. Dua vei ira na ivola karakarawa, The Truth That Leads to Eternal Life (Na Ka Dina sa Basika ki na Bula Tawamudu). Au taleitaka sara ga na kena ulutaga, au mani wilika na ivola taucoko ena bogi tiko ga ya. Ena mataka tarava, au kila niu sa kunea na ka dina!

Tekivu ena Epereli 1972, au wilika e levu nodra ivola na iVakadinadina i Jiova, e saumi sara ga noqu taro. Au vaka na dauveivoli ena vakatautauvata i Jisu, ni gauna e kunea kina e dua na mataniciva saulevu, e lai volitaka na ka kece e tu vua me volia kina. Au “volitaka” gona noqu isausau meu vuli ena univesiti meu vuniwai, meu volia kina na “mataniciva” ni ka dina au sa kunea. (Maciu 13:45, 46) Au papitaiso ena ika10 ni Tiseba, 1972.

Ena yabaki tarava, rau vulica na iVolatabu noqu itubutubu kei taciqu, ratou qai papitaiso. Ena Julai 1973, au tekivu painia tudei. Era gumatua na painia ena neitou ivavakoso, e dua vei ira o Ann-Catrin, e goneyalewa totoka, e matua vakayalo. Keirau veitaleitaki sara qai vakamau ena 1975. Oti, keirau tiko me va na yabaki ena tauni o Strömsund, e dua na vanua rairai vinaka e Suwiteni, e yalava vuavuaivinaka tale ga.

Ann-Catrin: E vulica o Ta na dina ni sa voleka ni oti nona vuli ena univesiti e Stockholm. Au se qai vula tolu ena gauna qori, ia e dau kauti au o Ta ina soqoni kei na cakacaka vakavunau. E cata qori o Na, e via vaqara cala vei ira na iVakadinadina i Jiova. Ia e dreve ga, toso na gauna e papitaiso tale ga. Au papitaiso niu yabaki 13, au painia sara niu yabaki 16. Au veiqaravi e Umeå, ni vinakati kina vakalevu na dautukutuku, oti au qai painia lavotaki.

Ni keirau vakamau oti kei Mats, keirau marautaka neirau vukea eso mera kila na ka dina. Dua vei ira o Maivor, e dua na goneyalewa e biuta na qito me rawa ni painia, rau mai painia vata kei taciqu gone duadua. Oti rau lai vuli e Kiliati ena 1984, rau lai kaulotu sara i Ecuador.

Na levu ni vanua drau kaulotu kina, drau muria vakacava na ivakasala mo drau “tubu ena vanua [drau] tei kina”?

Mats: Keirau “teivaki” vakavica ena neirau ilesilesi vou. Ia keirau saga me ‘ti na wakai keirau’ vei Jisu, ni keirau solia neirau vinaka me keirau vakatotomuri koya, vakabibi nona yalomalumalumu. (Kolo. 2:6, 7) Kena ivakaraitaki, keirau sega ni vinakata mera vakatotomuria na mataveitacini na ka e matau vei keirau, ia keirau saga me keirau kila na vuna era cakava kina eso na ka. Keirau via kila nodra rai kei na nodra itovo vakavanua. Na levu ga ni neirau vakatotomuri Jisu, keirau kila ni keirau sa qai ‘teivaki tiko ga ena bati ni uciwai’ me keirau tubu ena vanua keirau lesi kina.—Same 1:2, 3.

Ann-Catrin: Me rawa ni tubu e dua na vunikau e teivaki tale, e vinakati na katakata ni matanisiga. E dau vakaraitaka tu ga vei keirau o Jiova ni vaka na “matanisiga.” (Same 84:11) E vakalougatataki keirau ni vakayagataki ira na mataveitacini dau loloma. Kena ivakaraitaki, ena neirau ivavakoso lailai e Tehran e Irani, era kauaitaki keirau me vakataki ira ga ena gauna vakaivolatabu. Keirau via tu ga e Irani, ia ena Julai 1980, e vakatabui noda cakacaka e kea, mani vakaroti me keirau biubiu ena loma ni 48 na aua. Keirau mani lesi i Zaire, e Aferika (gauna qo sa o Congo).

Na gauna au rogoca kina ni keirau sa lesi i Aferika, dua na ka noqu tagi. Au lomaleqataka na itukutuku au rogoca me baleta na gata kei na veimataqali mate e kea. Ia rau qai kaya vei keirau e rua na tacida rau a veiqaravi dede tu kea: “Drau kua ni rere. Drau se bera mada ga ni lesu mai Aferika! Drau na taleitaka.” Keirau qai taleitaka dina! Era dau veikauaitaki na mataveitacini, era dau loloma. Oti tale e ono na yabaki ni keirau sa biuti Zaire ena vuku ni vakatatabu, au dredre lo ga ni sa veisau noqu rai, au tukuna tale ga vei Jiova ena masu: “Kerekere, me keirau tiko ga e Aferika.”

Na cava drau marautaka ena vica na yabaki sa oti?

Mats: Au via tukuna ga ni keirau mai veitokani vinaka sara kei ira na daukaulotu era gole mai na veivanua, e duidui tale ga nodra isususu. Eso tale na vanua keirau lesi kina, keirau marautaka ni levu na neirau vuli iVolatabu, eso na gauna keirau ya20! Au na sega vakadua ni guilecava nodra veikauaitaki na mataveitacini e Aferika. Ni keirau dau sikova eso na ivavakoso e Tanzania, keirau vakelea neirau lori na Volkswagen Kombi, ena yasa ni nodra itikotiko na tacida. E levu sara na ka era vakarautaka vei keirau “ni vakatauvatani kei na ka era rawata.” (2 Kor. 8:3) Dua na ka keirau dau vakanamata kina, ya na neirau gauna ni veitalanoa ni cava e dua na siga. Keirau dau veitalanoataka kei Ann-Catrin na ka e yaco ena siga qori, keirau qai vakavinavinakataki Jiova ena nona tokoni keirau.

Ann-Catrin: Au marautaka vakalevu noqu kilai ira na tacida mai veiyasa i vuravura. Keirau vulica eso na vosa vou, me vaka na Farsi, Varanise, Luganda, kei na Swahili, keirau vulica tale ga nodra itovo vakavanua. Keirau vakavulica eso na tacida vovou, keimami veitokani vinaka, keimami qaravi Jiova tale ga “ena duavata.”—Sefa. 3:9.

Keirau raica tale ga e levu na ibulibuli totoka nei Jiova. Na gauna kece keirau ciqoma kina e dua na ilesilesi vou, vaka ga e vakasarasarataki keirau tiko o Jiova ena vanua qori. E vakavulici keirau ena levu na ka keirau na sega ni vulica rawa vakataki keirau.

Cava eso na ituvaki dredre drau sotava, drau vosota vakacava?

Mats: Eso na gauna keirau tauvimate, e tauvi keirau tale ga na malaria. Vica na gauna e vinakati me sele vakatotolo o Ann-Catrin. Keirau leqataki rau tale ga na neirau itubutubu itabaqase; keirau vakavinavinaka gona ni ratou veivuke tiko ena veiqaravi o ratou na gone vei keirau. Ratou veiqaravi tale ga ena vosovoso, marau, kei na loloma. (1 Tim. 5:4) Ia ni keirau yawa mai vale, eso na gauna keirau rarawa, keirau diva me levu na ka keirau vukei ratou kina na neirau itubutubu.

Ann-Catrin: Ena 1983, ni keirau veiqaravi tiko e Zaire, au tauvi cholera, e bibi na kequ mate. E tukuna o vuniwai vei Mats: “Mo kauti koya tani vakatotolo eke!” Ena siga ga e tarava, keirau vuka sara ga i Suwiteni ena waqavuka ni kako, qori ga na waqavuka e rawa ni kauti keirau.

Mats: Keirau nanuma sara ga ni sa na oti e keri na neirau veiqaravi vakadaukaulotu, dua na ka neirau tagi. E cala na nanuma nei vuniwai, ia e qai bula vinaka tale o Ann-Catrin. Oti tale e dua na yabaki, keirau lesu i Zaire, ena dua na ivavakoso lailai vosa vakaSwahili e Lubumbashi.

Ann-Catrin: Ni keirau tiko e Lubumbashi, e lutudole na luvei keirau. E sega ni namaki me keirau vakaluveni, ia e mositi keirau na nona yali. Ena gauna dredre ya, e solia vei keirau o Jiova e dua na iloloma keirau sega ni namaka. E tauyavu e levu sara na neirau vuli iVolatabu. Sega mada ga ni dua na yabaki, e tubu na iwiliwili ni dautukutuku mai na 35 ina 70, e tubu tale ga o ira na tiko ena soqoni mai na 40 ina 220. Keirau ogaoga vakalevu ena vunau, e vakalougatataki keirau o Jiova niu vakila sara ga na lomavakacegu. Keirau dau vakasamataki luvei keirau vakalevu, keirau dau veitalanoataki koya tale ga. Keirau vakanamata tu ina gauna me vakaotia kina vakadua o Jiova na mosi ni loma i keirau.

Mats: Dua na gauna, e malumalumu sara ga o Ann-Catrin, e oca vakalevu. Ena gauna tale ga qori, au qai kila ni sa tauvi au tiko na kenisa ni wawa, e vinakati me caka vei au e dua na veisele levu. Ia au sa bula vinaka ena gauna qo, sa toso vinaka tale tiko ga o Ann-Catrin.

Keirau liaca ni sega ni o keirau ga keirau sotava tiko na leqa. Ni oti na labakawa ena 1994 e Rwanda, keirau lai sikova e levu na tacida ena keba ni isenivalu. Ni keirau raica nodra vakabauta, vosota, kei na veikauaitaki, keirau vulica kina ni tu vei Jiova na kaukaua me tokoni ira nona tamata ena gauna dredre.—Same 55:22.

Ann-Catrin: Keirau sotava e dua tale na ituvaki ni keirau lai tiko ena vakatabui ni valenivolavola ni tabana e Uganda ena 2007. Oti na soqo qori, keitou lako tiko i Nairobi e Kenya kei na so na daukaulotu kei na lewenivuvale e Peceli, rauta ni keimami le 25. Ni bera ni keimami yaco ena iyala ni vanua e Kenya, e cici tiko mai liu e dua na motoka qai ceba mai ena neitou yasana qai coqa na lori keitou vodo tiko kina. E mate sara ga o draiva kei na lima tale na tacida; e dua tale na tacida yalewa e qai lai mate e valenibula. Keirau vinakata sara ga me keirau sotavi ratou tale na itokani qori!—Jope 14:13-15.

E taura na gauna me qai mavo noqu mavoa. Ia e vica vei keitou na coqa ena siga qori, keitou nuiqawaqawa vakalevu. E dau yacovi au qori ena bogi, au yadra mai niu vakila ni tavatukituki na utoqu. Au domobula sara ga. Ia ni keirau masu vagumatua vei Jiova, keirau wilika tale ga eso na neirau tikinivolatabu taleitaki, e vakacegui keirau sara ga. E yaga tale ga na neirau lai raici vuniwai. Ena gauna qo keirau sa sega sara ni nuiqawaqawa vakalevu, ia keirau kerei Jiova me vakacegui ira tale ga era sotava tiko na ituvaki qori.

Drau tukuna ni drau vosota rawa na ituvaki dredre ni tauri kemudrau tiko o Jiova “me vaka na yaloka droka.” Cava na kena ibalebale ya?

Mats: Na vosa qori e vu mai na vosa vakaSwahili “Tumebebwa kama mayai mabichi,” se “Keirau tauri tiko me vaka na yaloka droka.” Me vaka ga nona taura vinaka e dua na yaloka droka me kua ni kavoro, e tokoni keirau tale ga vakayalololoma o Jiova ena neirau ilesilesi kece. E dau vakarautaka tu ga na ka keirau gadreva, e sivia tale. Dua na sala keirau vakila kina na loloma kei na veitokoni i Jiova, ya na nodratou kauaitaki keirau na lewe ni iLawalawa Dauvakatulewa.

Ann-Catrin: Qo e dua na italanoa ni nona tokoni keirau vakayalololoma o Jiova. Dua na siga e qiritaki mai vei au ni sa davo bibi tu e valenibula e Suwiteni o Ta. Se qai bula mada ga o Mats ena malaria. Keirau sega tale ga ni sauma rawa neirau tikite ni vuka i vale, keirau mani nanuma me volitaki na neirau motoka. Oti qori, e rua tale mai na qiri; matai e dua na veiwatini, ni rau rogoca ga na keirau ituvaki, rau via sauma e dua na tikite. Kena ikarua, e dua na tacida yalewa itabaqase e maroroya tu eso nona ilavo ena tavaya, e vola tu kina “Vua e dua me vukei.” E totolo wale nona vukei keirau o Jiova!—Iper. 13:6.

Ena 50 vakacaca na yabaki ni nomudrau veiqaravi vakatabakidua, cava drau vulica?

Ann-Catrin: Au vulica ni vu ni neirau kaukaua me keirau ‘tiko vakacegu qai vakanuinui tiko.’ Ni keirau nuitaki Jiova, ena vala ena vuku i keirau. (Aisea 30:15; 2 Vei. 20:15, 17) Ni keirau qaravi Jiova ena neirau vinaka taucoko ena neirau ilesilesi kece, e sega ni tukuni rawa na levu ni ka keirau vakalougatataki kina.

Mats: Au vulica meu nuitaki Jiova ena ituvaki kece qai raica na sala ena vukei au kina. (Same 37:5) E dau vukei au tu ga me vaka e yalataka. Keirau vakadinadinataka tiko ga qori ena neirau ilesilesi ena Peceli e Myanmar.

Keirau vakanuinui tu nira na vakadinadinataka tale ga na itabagone era via vakalevutaka nodra veiqaravi na dei ni loloma i Jiova e vakaraitaka vei keirau. Keirau nuidei nira na tubu bulabula ena vanua e teivaki ira kina o Jiova, ke ra vinakata.