1925​—Duanadrau na Yabaki sa Oti

DARO NA KA E NAMAKI

Ena 1925, era namaka e levu na Gonevuli ni iVolatabu me sa Parataisi na vuravura. Na vuna? E vakamacalataka o Brother Albert Schroeder, a qai lewe ni iLawalawa Dauvakatulewa: “A nanumi tu nira na lako i lomalagi na ivovo ni lumuti mera veiliutaki ena Matanitu ni Kalou. Ia o ira na tagane yalodina me vakataki Eparama, Tevita, kei na so tale, era na vakaturi mera veiliutaki e vuravura mera vakarurugi ena matanitu ni Kalou.” Ni toso tiko na yabaki e sega ni yaco na ka era namaka, macala ga nira yalolailai eso.​—Vkai. 13:12.

Eso na Gonevuli ni iVolatabu era yalolailai, ia e levu era ogaoga tiko ga ena vunau, era kila tale ga ni cakacaka bibi duadua mera vunautaki Jiova. Meda dikeva mada qo e dua na ivakaraitaki ni ka era cakava me kaburaki kina na ka dina ena levu na vanua.

TARA ESO TALE NA SITESENI VOU

Ena 1924, levu era dau vakarorogo ena siteseni ni retio na WBBR. Ena 1925, e tara e dua tale na siteseni vou volekati Chicago, e Illinois. Na yaca ni siteseni vou qori na WORD. E kaya o Ralph Leffler, e dua na idinia e tara na vanua ni kakaburaki qori: “Ena veibogi ni batabata na draki, levu era tu mai vakayawa era dau vakarorogo ena siteseni na WORD.” Kena ivakaraitaki, eratou rogoca na imatai ni kakaburaki e dua na vuvale ratou tu sara mai vakayawa me sivia ni 5,000 na kilomita ena siti o Pilot Station, e Alaska. Ni oti nodratou vakarorogo, ratou volavola vei ratou ena siteseni ni kakaburaki me ratou vakavinavinakataka na nodratou vakayaloqaqataki ena porokaramu vakayalo qori.

E vakamacalataka na Watch Tower ni imatai ni Tiseba 1925, na vuna era rogoca kina e levu era tu mai vakayawa na porokaramu qo, e kaya: “Na WORD e dua na siteseni ni retio e Merika e kaukaua duadua na kena biaulivaliva (e 5,000 na watts). Era rogoca e levu ena Tokalau kei na Ra kei Merika, e Cuba, kei na vualiku kei Alaska. Era tataleitaki kina e levu era se qai rogoca vakadua na dina.”

Ena gauna vata qori, era sasaga tale ga na Gonevuli ni iVolatabu mera vakayagataka na retio me kacivaki kina na itukutuku vinaka e Kenada. Ena 1924, e tara kina na siteseni na CHUC e Saskatoon, e Saskatchewan. Qo e dua vei ira na imatai ni retio ni lotu e Kenada. Ena 1925, e vinakati me sa toki na siteseni lailai qori. Sa mai nona na Watch Tower na siteseni qori, e volia e dua na vale ni iyaloyalo makawa e Saskatoon na Regent Building, e vakavinakataki tale ga me toki mai kina na siteseni.

Na siteseni qori era mai rogoca kina e levu e Saskatchewan na itukutuku vinaka ena imatai ni gauna. Kena ivakaraitaki, e tiko ena dua na tauni yawa e dua na marama o Mrs. Graham, ni rogoca oti e dua na porokaramu, e volavola mai me kerea eso na ivola vakaivolatabu. E nanuma lesu o Brother George Naish: “Nona kere veivuke ‘e vakavulici keitou!’ ni vinakata sara ga vakatotolo na ivola, keitou mani vakauta vua na ivola kece na Studies in the Scriptures.” Oti ga qori, sa vunautaka sara o Mrs. Graham na itukutuku vinaka ni Matanitu ni Kalou, e vunau tale ga ena veivanua yawa.

VAKAMATATATAKI NODA KILA

Ena imatai ni Maji 1925, e tabaki ena Watch Tower e dua na ulutaga bibi “Birth of the Nation” (Tauyavu na Matanitu). Na cava e bibi kina na ulutaga qori? Dua na gauna balavu nodra kila tiko na Gonevuli ni iVolatabu ni tiko na isoqosoqo nei Setani, era lewena na kabula vakayalo ca e lomalagi, e lewa tale ga na veika vakalotu, veika vakabisinisi kei na politiki ni vuravura. Ia e vakayagataka na ulutaga qori “na dauveiqaravi yalodina e vuku” me vukei ira kina na mataveitacini mera kila ni tiko tale ga na isoqosoqo i Jiova mai lomalagi kei vuravura, e duatani sara mai na isoqosoqo nei Setani. Era cakacaka vata na lewe ni isoqosoqo i Jiova mera saqati Setani kei na nona ito. (Maciu 24:45) E vakamacalataka tale ga na dauveiqaravi ni tauyavu na Matanitu ni Kalou ena 1914, e ‘tubu kina na ivalu mai lomalagi’ ena yabaki qori, e kolotaki sobu o Setani kei ira nona timoni, era sa tiko qo e vuravura.​—Vkta. 12:7-9.

Eso na Gonevuli ni iVolatabu e dredre mera ciqoma na kila vou qori. Oya na vuna e tukuni kina ena ulutaga qo: “Ke ra sega ni duavata na dauwilika na Watch Tower na ka e tukuni eke, keitou vakatututaka moni vosovoso ga qai waraka na Turaga, ni oni qaravi koya tiko ena yalodina.”

Qo na ka e kaya o Tom Eyre e dua na painia mai Peritania, me baleta nodra rai e levu na Gonevuli ni iVolatabu ena ulutaga qori: “Era taleitaka na mataveitacini na kena vakamacalataki na Vakatakila 12. Na gauna keimami kila kina ni sa tauyavu mai lomalagi na Matanitu ni Kalou, keimami marau ni wasea na itukutuku vinaka vei ira eso tale. Keimami sa qai via vunau ga vakalevu, keimami raica tale ga na sala e liutaki ira tiko kina na nona tamata o Jiova kei na veika totoka ena cakava ena gauna se bera mai.”

MERA IVAKADINADINA I JIOVA

Nikua, era kila vinaka na iVakadinadina i Jiova na ka e tukuni ena Aisea 43:10: “‘O kemuni na noqu ivakadinadina,’ e kaya o Jiova, ‘Io na noqu dauveiqaravi au digitaka.’” Ia ni bera na 1925, e sega ni dau vakamacalataki vakalevu ena noda ivola na tikinivolatabu qo. Ia e qai veisau qori. Ena 1925, e veivosakitaki ena Watch Tower na ulutaga me baleta na Aisea 43:10 kei na 12, ena 11 na itabataba ni mekesini!

Ni cava na Okosita 1925, era soqo vata na Gonevuli ni iVolatabu ena soqo ni veiwasewase e Indianapolis, e Indiana, Merika. E vola e dua na itukutuku o Brother Joseph F. Rutherford ena porokaramu ni soqo mera kidavaki kina na vulagi. E va qo: “Eda mai soqo vata nikua meda vakayaloqaqataki . . . vua na Turaga me rawa nida gumatua tale ena cakacaka vakavunau meda nona ivakadinadina.” Era uqeti na tiko ena soqo siga walu qori mera vakadinadinataki Jiova ena gauna veiganiti kece.

Ena Vakarauwai na ika29 ni Okosita, e vosa o Brother Rutherford ena ulutaga “A Call to Action” (E Vinakati na Cakacaka). E vakabibitaka ena ivunau qori mera vunau: “E kaya o Jiova vei ira nona tamata . . . : ‘O kemuni ga na noqu ivakadinadina . . . o yau ga na Kalou.’ Sa qai vakaroti ira ena vica na vosa qo: ‘Vakaduria na kaunikuila vei ira na lewe ni veivanua.’ E sega tale ni dua e vuravura me cakava qori, o ira ga na nona tamata ni uqeti ira nona yalo tabu, era nona ivakadinadina.”​—Aisea 43:12; 62:10.

Ni sa oti nona ivunau o Brother Rutherford, e wilika e dua na itukutuku e kena ulutaga “Message of Hope” (iTukutuku Veivakacegui), era duavata kece na vakarorogo ena ulutaga qori, ni tukuni kina ni Matanitu duadua ga ni Kalou ena kauta mai “na vakacegu, na tikovinaka, na bulabula vinaka, na bula, na galala kei na marau me tawamudu.” Toso na gauna, sa qai vakadewataki ena vica tale na vosa na inakinaki qori, e tabaki tale ga. E veisoliyaki e rauta ni 40 na milioni na kena ilavelave.

Era sega ni vakatokai sara na Gonevuli ni iVolatabu ena yaca iVakadinadina i Jiova me vica tale na yabaki. Ia ni toso na gauna, era sa qai kila na bibi ni nodra itavi mera nona ivakadinadina.

LESUVI IRA NA TATALEITAKI

Ni sa tubu na kedra iwiliwili na Gonevuli ni iVolatabu e veiyasa i vuravura, era uqeti gona mera kua wale ga ni solia na ivola, ia mera sikovi ira lesu na tataleitaki. Ni oti na kena veisoliyaki na tikidua Message of Hope, e kaya na Bulletina: “Ni sikovi ira lesu ga na taura na tikidua Message of Hope.”

E tabaki ena Bulletin ni Janueri 1925, na ka e tukuna e dua na Gonevuli ni iVolatabu e Plano, e Texas: “Keimami kurabui sara ga nira vakarorogo o ira ena yalava sa tarai oti vakavica ni vakatauvatani kei na yalava vovou. Dua na tauni lailai ena neimami yalava keimami sa vunau oti kina vakalima ena tini na yabaki sa oti. . . . Wale ga qo, e lai vunau tale e kea o Sister Hendrix kei tinaqu, rau solia kina e levu na ivola ni vakatauvatani e liu.”

E kaya e dua na tacida tagane painia mai Panama: “Na imatai ni gauna au lai vunau kina, levu era cemuri au mai, ia niu lesu yani ena ikarua se ikatolu ni gauna, era sa vakarorogo. Levu na ka au cakava ena yabaki qo, e okati kina noqu sikovi ira lesu au a vunau kina ena vica na gauna sa oti, au marautaka sara ga na kena vuavuaivinaka.”

VAKANAMATA INA GAUNA SE BERA MAI

Ni cava na 1925, e volavola vei ira na painia o Brother Rutherford qai vakamacalataka na ka sa rawati ena nodra vunau ena yabaki ya kei na ka mera cakava tarava. E kaya: “E dua na itavi bibi oni qarava ena yabaki sa oti, nomuni vakacegui ira e levu era rarawa tu. E vakamarautaki kemuni na cakacaka qo . . . Ia ena yabaki mai qo ena levu tale tu na sala moni vunautaka kina na Kalou kei na nona matanitu, moni muria tale ga na nona ivakatagedegede. . . . Meda domo vata mada ga meda vakalagilagia na Kalou kei na noda Tui.”

Ni cava na 1925, era tuvanaka na tacida me vakalevutaki na Peceli e Brooklyn. Ena 1926, e tekivu kina na tarataravaki levu duadua ena isoqosoqo.