Mo Draiva Tiko ga se Kua?

SA VICASAGAVULU na yabaki nomu draiva tiko. O draivataka ga nomu motoka, o lewa ga na vanua o via lako kina. Ia era lomaleqataki iko nomu vuvale kei na nomu itokani, era vinakata mo vakasamataka tale mo draiva tiko ga se kua. O sega ni taura rawa na vuna era lomaleqa kina.

Vakacava o sotava tiko qori? Ke vaka kina, na cava mo cakava mo kila kina ke o se rawa tiko ga ni draiva se sega?

Ena so na vanua, ke ra sa yacova e dua na yabaki ni bula eso na draiva ra qai via vakavoutaka nodra laiseni, ena vinakati me vakadonuya o vuniwai mera draiva tiko ga se sega. O ira na lotu vaKarisito era tiko ena veivanua qori mera muria na kena lawa kei na nodra vakatulewa na vakailesilesi ni matanitu. (Roma 13:1) Ke sega mada ga na lawa va qori ena nomu vanua, e tiko eso na vakatutu mo muria mo kila kina ke o se rawa tiko ga ni draiva se sega.

VAKASAMATAKA VINAKA NOMU DRAIVA

E vakatututaka e dua na website ni dua na isoqosoqo e dau raici ira na itabaqase (National Institute on Aging) e Merika, mera taroga qo:

Sa dredre meu raica na ivakatakilakila e gaunisala se meu rai ena bogi?
Se rawa ni veigoleyaki na domoqu meu raica na iloilo se na vanua e sega ni yacova rawa na iloilo?
Au se rawa ni vukitotolo, kena ivakaraitaki, meu veisautaka na yavaqu mai na siviti ina bereki?
E dau berabera noqu draiva mera yatuni balavu kina na vo ni lori?
Au sa voleka ni coqa vakavica, se levu na kabibi ena noqu motoka niu coqa eso na ka?
Au sa tarovi oti vei ira na ovisa ena ivakarau ni noqu draiva?
Au sa bau sosovu niu draiva tiko?
Au gunuva tiko e dua na wainimate e rawa ni vakaleqa noqu draiva?
Era sa tukuna oti vei au noqu vuvale se itokani nira lomaleqataka noqu ivakarau ni draiva?

Ke o vakaio ena dua se rua na taro qori, de dua e gauna vinaka qo mo sa cakava eso na veiveisau. Kena ivakaraitaki, o rawa ni yalana na levu ni gauna o draiva kina, vakabibi ena bogi. Mo dikeva wasoma nomu ivakarau ni draiva. O rawa ni taroga e dua nomu lewenivuvale se itokani me tukuna nodra nanuma me baleta nomu draiva. De dua o na via tiko ena so na vuli me baleta na qaqarauni ena draiva. Ia ke o vakaio ena levu na taro qori, de dua mo sa kua ga ni draiva.a

ME DUSIMAKI IKO NA IVAKAVUVULI VAKAIVOLATABU

De dua ena dredre meda kidava ni sa veisau tiko noda ivakarau ni draiva. O na sega tale ga ni vinakata me veivosakitaki mo sa kua ni draiva. Ia na ivakavuvuli vakaivolatabu cava o na muria me donu kina nomu rai, mo vakatulewa vinaka tale ga? Meda dikeva mada e rua.

Mo yalomalumalumu tiko ga. (Vkai. 11:2) Ni sa toso noda yabaki, sa na malumalumu mai na matada, na daligada, masela, kei na noda kidava na ka. Kena ivakaraitaki, levu era sa cegu na qito nira sa qase nira kila nira na mavoa totolo. E va tale ga qori na draiva. O koya e yalomalumalumu ena kila na gauna me sa cegu kina na draiva ni leqataki nona bula. (Vkai. 22:3) Ke ra kauai tale ga eso, o koya e yalomalumalumu ena rogoca na ka era tukuna.—Vakatauvatana 2 Samuela 21:15-17.

Kua ni vakadavedra. (Vkru. 22:8) E rawa ni veivakaleqai na motoka ke sega ni draivataki vinaka. Ke draiva tiko ga e dua e sega ni vinaka nona draiva, ena rawa ni vakaleqa nona bula kei na so tale. Ke vakavuna tale ga na coqa, ena rawa ni beitaki ni vakadavedra.

Ke dredre mo vakatulewataka mo sa cegu na draiva se kua, kua ni nanuma ni o na beci kina. E lomani iko o Jiova ena nomu itovo vinaka, me vaka nomu yalomalumalumu, kei na nomu kauaitaka nodra bula eso tale. E yalataka tale ga ni na tokoni iko, e vakacegui iko tale ga. (Aisea 46:4) Ena sega ni biuti iko. Mo kerea vua na vuku kei na yalomatua mo vakatulewataka kina mo sa cegu na draiva se kua.

Sala Meda Veivuke Kina

O ira ga na lewenivuvale e rawa nira veivosaki kei ira na itabaqase me baleta nodra ivakarau ni draiva. Se, de dua o veivolekati kei na itabaqase qori, o rogoca tale ga na ka era tukuna eso tale me baleta nona ivakarau ni draiva. Kua ni vakawalena na ka era tukuna. De dua mo kerei koya mo drau vodo vata, me draiva o koya. Ke veiganiti, vakasalataki koya me baleta nona draiva. Ni o cakava qori, mo biuti iko ena kena ituvaki. Mo vosa ena yalovinaka, mo vosa tale ga vakadodonu. Kua ni vakasamataka vakalevu nona yabaki, mo tukuna vakavinaka vua na ivakarau ni nona draiva. O rawa ni tukuna va qo, “Au lomaleqataka nomu bula ni o draiva,” ia mo kua ga ni tukuna “O sa draiva tiko vakalialia.” Uqeti koya me muria na ivakavuvuli vakaivolatabu ena ulutaga qo.

Meda vakasamataka na nodra rai na itabaqase nira sa na sega ni draiva. De dua ena nanuma ni sa na sega ni cakava rawa vakataki koya eso na ka. O na vukei koya vakacava? Mo veitokoni ni o vukei koya ena so na ka. (Vkai. 17:17) Kua ni waraka sara me kerei iko mo vakavodoki koya de nanuma ni na vakaicolacolataki iko. De dua o rawa ni tuvanaka mo kauti koya ena soqoni, cakacaka vakavunau, volivoli, me laurai tale ga vakavuniwai. Me kila o koya ni o via cakava qori, mo drau veimaliwai kina.—Roma 1:11, 12.

a Mo kila eso tale na itukutuku, raica na ulutaga “Coqa e Gaunisala—O na Taqomaki Vakacava?” ena Yadra! ni Janueri, 2003.