Au Via Veisautaka Noqu iVakarau ni Bula

NIU se qai yabaki 18 ena 1985, au a kacivi meu lewena na mataivalu ni Rusia. Dua na ka noqu rarawataka na veika tawadodonu kei na veivakalolomataki e yaco tu ena mataivalu. Au kaya lo e lomaqu: ‘Au vinakata meu duatani, meu kua ni vakataki ira ya.’ Ia e dau dredre meu cakava na ka vinaka. Au via veisautaka sara ga na noqu ivakarau ni bula.

Au lesu i vale ni oti noqu veiqaravi ena mataivalu. Au masu vua na Kalou ni oti na pati ena dua na bogi me vukei au ena veiveisau au via cakava. Na siga tarava au lai sikovi noqu Nei sara e iVakadinadina i Jiova. Niu curu yani ena nona vale, au raica nira soqoni toka na lewenilotu. Dua na ka nodra kauaitaki au, au mani nanuma meu dabe tale ga meu vakarorogo.

Au vakadonuya meu vuli iVolatabu, oti ga e ono na vula au papitaiso sara. Au sega ni rawa ni cakava vakataki au na veiveisau ena noqu bula, o Jiova ga e vukei au meu veisautaka na noqu itovo.