Vakaliuci na Cakacaka Vakavunau e Veiyasa i Vuravura

DUA na itukutuku a vakarogoya na iLawalawa Dauvakatulewa ina Peceli e vuravura taucoko ena Vukelulu na ika23 ni Seviteba, 2015. A vakamacalataki kina eso na veisau ena vakayacori ena isoqosoqo me vakayagataki vinaka kina nodra cau na mataveitacini. Oti tale e vica na siga, e wiliki e dua na nodratou ivola na iLawalawa Dauvakatulewa ena Vakarauwai na ika3 ni Okotova, 2015, e tukuni kina: “Eda uqeti ena Filipai 1:10 meda ‘vakadeitaka na veika e bibi sara.’ Me salavata kei na ivakasala qori, e neitou inakinaki [na iLawalawa Dauvakatulewa] me vakaliuci na nodra tokoni vakayalo na tamata ni Kalou kei na kena tokoni na cakacaka vakavunau e veiyasa i vuravura.”

E qai vakamatatataka ena JW Broadcasting o Stephen Lett e lewe ni iLawalawa Dauvakatulewa: “E raica vakabibi na iLawalawa Dauvakatulewa na kena vakaliuci na Matanitu ni Kalou ena cakacaka vakavunau, qori na vuna e caka kina eso na veiveisau ena valenivolavola ni tabana e veiyasa i vuravura me rawa ni vagolei e levu na cau ina yalava. Kena ivakaraitaki, sa sega ni caka se vakalailaitaki eso na itavi e Peceli me rawa nira lai veiqaravi ena yalava eso na lewenivuvale.”

Me tekivu mai na Seviteba, 2015, era sa lesu ina yalava e rauta ni 5,500 na lewenivuvale e Peceli e veiyasa i vuravura. Dua na veisau levu qori, ia e vakilai na veivakalougatataki i Jiova kei na nona veitokoni ena veivakavulici kei na vunau.

Erau a lesi ina yalava e dua na veiwatini mai Sri Lanka, rau a veiqaravi tu e Peceli. Rau okata nodrau ilesilesi vou me dua na sala erau na vakaraitaka kina nodrau nuitaki Jiova kei na nona isoqosoqo. Erau kaya: “Keirau sega ni kila na veika keirau na lai sotava ena yalava. Ia keirau kila ni na tokoni keirau o Jiova. Keirau mani kerea ena masu, ‘Jiova, kerekere, vukei keirau me keirau dau yalorawarawa se mani ituvaki cava keirau sotava me rawa ni keirau painia tudei.’ Ena imatai ni vula, e sega ni levu sara na ka keirau taukena. Ia keirau vakila nona loloma kei na nona kauai o Jiova. Ena gauna qo, sa tiko na neirau ivurevure ni ilavo me vukei keirau ena bula ni veisiga. Na neirau ituvatuva e okati kina na cakacaka ni vale, cakacaka saumi kei na painia. Ia na veivakavulici mai Peceli e veivuke vakalevu ena neirau vakayagataka vinaka na gauna. E sega ni dua na cakacaka e vakatauvatani rawa kei na nodra vukei na tamata mera kila na ka dina. Keirau marau ni rawa ni keirau veivuke ena cakacaka qori ena neirau painia.”

Eso na lewenivuvale e Peceli mai Colombia era lesi ina yalava, era lai vulica e dua na vosa vou ra qai toki ina yalava tu yawa mera vunautaka kina na itukutuku ni Matanitu ni Kalou. Era vu ni veivakalougatataki dina vei ira na mataveitacini ena ivavakoso vou era lewena. E vola e dua na ivakatawa dauveilakoyaki me baleta e dua na veiwatini erau lesi ina dua na ivavakoso a sikova: “Era marautaka vakalevu na mataveitacini na nodrau veivuke na veiwatini. E uqeti ira e levu mera vakaitavi ena cakacaka vakavunau, era vakavulici tale ga na mataveitacini tagane ena itavi me qaravi ena ivavakoso.” Levu era veiqaravi tu e Peceli e liu era dau tu vakarau mera lai veivuke me dua se vica na siga e Peceli ena dua na macawa.

E dua na tacida tagane a veiqaravi tu ena Peceli e Japani me 31 na yabaki. A lesi ina dua na ivavakoso e Kumamoto e rua ga na kena qase. A vakarau vakavinakataki tiko na Vale ni Soqoni ena ivavakoso ya, mani lalawataka na tacida qori me kua ni cakacaka me rua na macawa. Ni bera ni tekivu na cakacaka ena Vale ni Soqoni, a kurei Kumamoto e dua na uneune e 7.0 na kena kaukaua. A mani lesi na tacida a veiqaravi tu e Peceli e liu me liutaka na cakacaka ni vakacoko kei na veivakatawani ena gauna ni uneune. E kaya: “Niu rai lesu, au rawa ni kaya ni biuti au o Jiova ena vanua e vinakati kina vakalevu na veivuke.”

Rau a veiqaravi tu ena valenivolavola ni tabana na Australasia o Phil kei Sugar, erau kaya: “Gauna keirau lesi kina, keirau vakadeitaka me keirau bula rawarawa ga. Keirau kerea na veidusimaki i Jiova ena masu me vukei keirau me keirau vakatulewa vinaka, me tokona tale ga na neirau vakatulewa. Keirau vinakata me keirau lai veiqaravi e vanuatani. Keirau vakila ni vakalougatataka dina o Jiova na neirau sasaga qai vukei keirau vakalevu ena neirau veiqaravi!” Ena gauna qo, rau sa veiqaravi tiko na veiwatini ena dua na iwasewase lailai vakavalagi ena yanuyanu o Samal, Davao, ena Yatu Filipaini. E 34 na dautukutuku ena iwasewase qori, qai 9 na painia tudei. E rauta ni le 120 era taleitaka mera sikovi ena yalava. Erau kaya o Phil kei Sugar: “E cakacaka marautaki dina qo. Keirau marau ni keirau a nuitaki Jiova. E vaqaqacotaka sara ga na neirau vakabauta kei na neirau lomani Jiova!”

E kaya e dua na tacida yalewa dawai mai Rusia a lesi me painia lavotaki: “Na painia e sala vinaka meu tokona kina na cakacaka bibi duadua, na cakacaka ena vakayacori ga vakadua, oya na kena vunautaki na Matanitu ni Kalou. Au marautaka dina nona vakayagataki au o Jiova.” Sa ono tiko nona vuli iVolatabu ena gauna qo, eratou cavutu mai Iraki, Nigeria, Sri Lanka, Siria, kei Zambia.

Levu na lewenivuvale ena Peceli e Zambia era sa painia tudei tiko ena gauna qo, era marautaka vakalevu nodra vakaitavi ena cakacaka vakavunau. E kaya o Andrew e painia tiko kei watina: “Oti toka ga vakalailai neirau biubiu mai Peceli, keirau vukea e dua na gonetagane yabaki tini kei na dua na veiwatini me ratou kila na wilivola kei na volavola. O gonetagane sa vakarau vakaitavi tiko ena imatai ni gauna ena koronivuli. O rau na veiwatini erau a tiko ena iVakananumi, erau sega tale ga ni calata na soqoni. Erau dau qacoya na nodrau vuli iVolatabu. Keirau kila ni rawati ga qori ena veidusimaki, veitokoni, kei na veivakalougatataki i Jiova.”

Dua na veiwatini vou o Edson kei Artness mai Zambia, erau a lesi tale ga ina yalava. E kaya o Artness: “Na veika keirau vulica e Peceli e vukei keirau ena kena vakayagataki vakavuku na veika ga sa tu vei keirau. Keirau vakila kina na marau, qai sega na dinau. Keirau sega ni veivutunitaka na veiqaravi e Peceli. Keirau vulica kina me keirau dau yalorawarawa ni yaco na veisau, qai nuitaka na veivuke i Jiova. Qori e vakaukauataka neirau vakabauta, e veivuke tale ga me keirau yalodina vei Jiova.”