Cava e Kaya na iVolatabu ena Sokaloutaki ni iVakatakarakara?

Ena ika25 ni Maji 2022, a caka e dua na soqo ni lotu e St. Peter Basilica mai Itali. E kaya na tabana ni itukutuku ni lotu Katolika na Catholic News Service, ni a duri tu na Tui Tabu o Francis ena mata ni ivakatakarakara nei Meri, e “cuva sobu, bobo qai masu.” E “kerea tiko vei Meri” na vakacegu. E kaya tale ga na tabana ni itukutuku na Vatican News ni masulaka tiko na Tui Tabu vei Meri me vakalougatataka na kawatamata, vakabibi o Rusia kei Ukraine.”

Cava o nanuma? E dodonu meda masu ena ivakatakarakara se vakayagataka meda sokalou kina? Dikeva mada eso na tikinivolatabu qo:

• “Mo kua ni cakava e dua na nomu ivakatakarakara ceuti se na ivakatakarakara ni dua na ka e tu ena lomalagi e cake se na vuravura e ra, se na wai e ruku i vuravura. Mo kua ni cuva vei ira se bacani mo qaravi ira, ni o yau o Jiova na nomu Kalou, na Kalou e vinakata me qaravi duadua ga.”—Lako Yani 20:4, 5.a

• “Na nodra matakau na siliva kei na koula, na cakacaka ni liga ni tamata. E tu na gusudra, ia era sega ni vosa rawa, na mata, ia era sega ni rai rawa, e tu na daligadra, ia era sega ni rogo rawa, na ucu, ia era sega ni boi rawa, e tu na ligadra, ia era sega ni vakila na ka, na yava, ia era sega ni lako rawa, e sega ni cakava rawa e dua na rorogo na nodra itilotilo. Na tamata e buli ira ena vakataki ira ga, kei ira kece na vakararavi vei ira.”—Same 115:4-8.

• “O yau o Jiova. Qori na yacaqu; au sega ni solia na noqu lagilagi vua e dua tale, se na noqu vakacaucautaki ina ivakatakarakara ceuti.”—Aisea 42:8, ivakamacala e ra.

• “Dro tani mai na qaravi matakau.”—1 Korinica 10:14.

• “Qarauna na qaravi matakau.”—1 Joni 5:21.

Me ikuri ni vakamacala ena ka e kaya na iVolatabu ena vakayagataki ni ivakatakarakara ena sokalou, wilika na ulutaga “Na Rai ni iVolatabu—iVakatakarakara,” se sarava na vidio E Vakadonuya na Kalou na iVakatakarakara ena Sokalou?

De dua o na via kila tale ga na ka e tukuna na iVolatabu ena so na ulutaga qo:

• “Cava e Kaya na iVolatabu me Baleta na Goneyalewa o Meri?”

• “Should You Pray to the Virgin Mary?”

• “Miracles and Apparitions—Signs From God?”

• “Ena Sautu Vakacava na Vuravura?”

Photo credit: Vincenzo Pinto/AFP via Getty Images